7 сорла

7 сорла (7 август) — григориан кечышот почеш идалыкын 219-ше (кужемдыме ийлаште — 220-шо) кечыже. Идалык пытыме марте 146 кече кодеш.

Пайрем да шарныктарыше кече-влак

•  Кирибати — Самырык-влакын кечышт (руш. День молодёжи).
•  Колумбий — Бояка воктене кредалмаш кече (руш. День Битвы при Бояке).
•  Кот-д’Ивуар — Эрыкан лийме кече (руш. День независимости).
• Шӱдырым погымо кече (руш. День собирания звёзд).
• Кеҥеж Анна (руш. Анна Летняя).
• Кутырышо профессионалын кечыже (руш. День профессионального оратора).
• Маяк кече (руш. День маяка).

Лӱмгече

• Православий лӱм-влак: Александр, Аттал, Виттий, Епагаф, Макарий (Макар), Матур, Понтин (Понтий), Сакт (Санкт), Христофор, Анна, Евпраксия, Ираида, Олимпиада.

Эртынчык-влак

Тугак ончо: Категорий:Сорла тылзын 7 кечысе событий-влак

Марий тӱняште

• 1917 ий — Козьмодемьянск олаште «Наш край» уезд газетын икымше номерже лектын.

Тӱня мучко

• 1720 ий — Йӱдвел Сар кайыме жапыште руш войска-влак Гренгам отро воктене швед-влакым кырен шалатеныт.
• 1941 ий — Кугу Ачамланде Сар жапыште лётчик Виктор Талалихин йӱдым тушман бомбардировщикым таран дене волтен шуэн. Тиде эртымгорнышто икымше йӱд таран лийын.
• 1988 ий — Америка гыч Линн Кокс у рекордым шынден. АУШ гыч Россий марте теҥыз гоч ийын вончышо икымше айдеме лийын. Тидын деч посна тале ӱдырамаш шуко рекордым шынден: тудак Байкалын йӱштӧ вӱдыштыжӧ 4 шагат утла ийын кертын, Кукын, Магелланын пролившымат ийын вончымылан тудым рекорд книгашке пуртымо.

Шочыныт

Тугак ончо: Категорий:Сорла тылзын 7 кечынже шочшо-влак

• 1945 ий — Валерий Алексеевич Никитин, туныктыш да ял озанлык пашаеҥ, Россий Федераций ял озанлыкын сулло пашаеҥже. Шочын-кушкын тудо Кужэҥер кундем Нуръялыште. Онычсо паша корныжо Марий совхоз техникум дене кылдалтын: агрономлан, вуйлатышын алмаштышыжланат тыршен. А вара Медведево райипсолкомын ял озанлык кучем вуйлатышыже лийын. 1985-2005-ше ийлаште Марий аграрный колледжын вуйлатышыжлан шоген. Суапле пашажлан Йошкар Знамя Паша орден да кугыжаныш чап танык дене палемдалтын.
• 1963 ий — Андрей Эрнестович Сиберт, сӱретче. Йошкар-Олашке 20 ияш годымжо толын. Тӱрлӧ газет да журнал редакцийлаште пашам ыштен. Италийыште, Японийыште, Америкыште да моло эллаштат эртаралтше калык-влак кокласе карикатур конкурслаште лауреат лӱмым сулен. Америкысе карикатурист-влакын калыкле ушемын чолга сӱретчыже.
• 1961 ий — Сергей Васильевич Лялин, мер пашаеҥ. Томск кундемыште шочын-кушкын. 9 ий тудо студент-влак профсоюз ушемын вуйлатышыже лийын, шкежым активист семын ончыктен. Самырык-влаклан «Марфуся» фестивальын авторжо. «Молодёжный курьер» газетын иктешлымыже почеш 1998-ше ийыште Сергей Васильевич «Идалыкын айдемыже» лийын. Юлтехын попечитель-влак Советын еҥже.
• 1964 ий — Валерий Михайлович Киткаев, журналист. Шернур кундем Ананур ялыште шочын. Кӱшыл шинчымашым Марий кугыжаныш педагогик институтышто налын. Паша корныжо Пуял школ, «Ямде лий» газет, Тошто Торъял школ да «Марий Эл» газет редакцийыште эртен. 2001-ше ий гыч У Торъял кундемысе газетыште тыршаш тӱҥалын, а ик ий гыч «Торъял ӱжара» газетым почын.
• 1969 ий — Сергей Иванович Таныгин, сӱретче. Кужэҥер кундемыште шочын-кушшо талантан сӱретчын паша корныжо Марий самырык театрыште тӱҥалын, а кызыт гын тудо М. Шкетан лӱмеш кугыжаныш драме театрыште пашам ышта. «Морко сем», «Ой, луй модеш», «Калевала» драма-влаклан костюм да декораций эскиз-влакым ямдылен. Тудын пашаже-влакым Йошкар-Оласе тоштерлаште ужаш лиеш.

Коленыт

Тугак ончо: Категорий:Сорла тылзын 7 кечынже колышо-влак

Калык пале

• Игече шокшо да кечан – телым лум шагал лиеш.
• Аннан кечыже. Тиде кечын шушаш теле могай лийшашым мужедыныт. Эрдене юалге гын, телат йӱштӧ лиеш. Южо кундемлаште лач тиде кечын икымше пареҥгым тамленыт, а Илян кечын икымше киндым.