20 сорла

←
→
Сорла
← →Сорла
	2026 ий

20 сорла (20 август) — григориан кечышот почеш идалыкын 232-шо (кужемдыме ийлаште — 233-шо) кечыже. Идалык пытыме марте 133 кече кодеш.

Йошкар-Олаште ☀️ Кече 4 шагатат 23 минутлан лектеш, 19 шагатат 13 минутлан шинчеш. Кечын кужытшо 🕒 14 шагатат 50 минут.
🌓 Икымше чырык (6.84 тылзе кече).

Пайрем да шарныктарыше кече-влак

— Шыҥан тӱнямбал кечыже (руш. Всемирный день комара).
— Йогыланымын тӱнямбал кечыже (руш. Всемирный день лени).
Чебурашкын шочмо кечыже (руш. День рождения Чебурашки).

Лӱмгече

Православий лӱм-влак: Александр, Алексий, Антоний, Астерий, Афанасий, Василий, Димитрий, Дометий, Елисей, Иоанн, Иперихий, Марин, Меркурий, Митрофан, Михаил, Мокий, Наркисс, Никанор, Ор, Пётр, Пимен, Созонт, Феодосий, Потамия.

Эртынчык-влак

Тугак ончо: Категорий:Сорла тылзын 20 кечысе событий-влак

1721 ий — Петергофышто фонтан ден каскад-влакым пашаш колтымо.
1812 ий — Российысе чыла армий вуйлытышылан Михаил Кутузовым шогалтыме.
1930 ий — Москошто авиаций институтым почыныт.

Шочыныт

Тугак ончо: Категорий:Сорла тылзын 20 кечынже шочшо-влак

1916 ий — Пётр Афанасьевич Алмакаев, партий да кугыжаныш пашаеҥ, паша герой. Маскасола кундем гыч. Паша корныжо республикысе тӱрлӧ партий орган дене кылдалтын. Суапле пашажлан Йошкар Шÿдыр да Йошкар Знамя Паша орден-влак дене, ятыр чап танык дене палемдалтын. «Годы и люди: воспоминания и размышления» книган авторжо.
1920 ий — Иван Васильевич Полянин, марий совет кугыжаныш да озанлык пашаеҥ. СССР Кӱшыл Каҥашын V созыв депутатше (1958—1962). 1943 ий гыч ВКП(б)-ын йыжыҥъеҥже. Кугу Ачамланде сарын участникше.
1922 ий — Нина Евсеевна Попова, актриса, РСФСР-ын сулло да МАССР-ын калык артисткыже. Шернур посёлкышто шочын. Йошкар-Оласе сем училищым тунем лекмек, Руш драмтеатрын актрисыже лийын: 50 ий наре сценыште тӱрлӧ рольым чоҥен.
1947 ий — Владимир Васильевич Унженин, туныктыш да мер пашаеҥ, сӱретче, Марий Элысе тӱвыран сулло пашаеҥже. Шкеже Киров вел Пыжанъю кундем гыч. 1975—2014-ше ийлаште тудо Вӱлеҥер (Мари-Ошаево) ялысе кыдалаш школын вуйлатышыжлан пашам ыштен. Ятыр ий Марий калык погынын делегатше лийын. Тыгак Владимир Васильевич уста сӱретче семын чапланен. Тудын ончерже-влак Йошкар-Олаште да моло кундемлаштат эртеныт. «Родительская слава» орденын медальже дене супландаралтын.
1952 ий — Раисия Александровна Смирнова, партий да тӱвыра пашаеҥ. Шкеже Морко кундем Унчо гыч. Тӱҥалтыш шинчымашым Шлань школышто налын гын, кыдалаш шинчымашым Унчо да Шеҥше школлаште поген. Йошкар-Оласе тӱвыра училищым тунем лекмек, Кожлаер ялысе тӱвыра пӧртышто пашам ыштен, вара районысо тӱвыра пӧлкаш вончен. 1980-ше ий гыч Раисия Александровна районысо комитетыште секретарь сомылым шуктен. Йочасадыштат тыршен, 1996-шо ий гыч — тӱвыра пашаште. Ончыч Морко тӱвыра полат вуйлатышын алмаштышыже лийын, 2 ий наре директор сомылым шуктен. Умбакыже паша корныжо верысе тоштерыште эртен. Уло ӱмыржым да вий-куатшым Раисия Алексндровна калыклан пӧлеклен, тӱвырам нӧлтымаште ятыр тыршен. Суапле пашажлан таумут да чап танык-влак дене палемдалтын.
1951 ий — Ибраев Василий Николаевич, Марий Эл Республикысе капкультурын сулло пашаеҥже. У Торъял кундем Шӱкшан ялыште шочын. 1982 ий гыч У Торъял йоча спорт школын директоржылан тыршаш тӱҥалын. Спорт школын тунемшыже-влак грек-рим кучедалмаш дене тӱнямбал, Россий кумдыклаште призер радамыште лийыныт. Василий Николаевич Ибраевын кок тунемшыже спорт мастер нормативым шуктен. Шкежат Россий Федерацийын физический культур да спортын отличникше, Марий АССР физический культурын сулло пашаеҥже.
1966 ий — Вячеслав Михайлович Мамаев, марий карт, Шернур кундемысе марий юмын йӱла ушем вуйлатыше. Шернур кундем Чемей почиҥга ялыште шочын.
1977 ий — Рамиля Раульевна Салихова, журналист. Йошкар-Олаште шочын-кушшо чолга ӱдыр чонлан келшыше паша вержымат тыштак муын. 2001-ше ий гыч тудо «Пульс-Радиошто» тыршаш тӱҥалын да 5 ий гыч тӱҥ редактор марте шуын. Икмыняр ий Рен-ТВ 12 регион да «Марий Эл ТВ» телекомпаний-влакын редакторжылан тыршен. Рамиля Раульевна ‒ «МЭТР» телеканалын шеф-редакторжо.

Коленыт

Тугак ончо: Категорий:Сорла тылзын 20 кечынже колышо-влак

1945 — Николай Орлов, марий сотыеҥ, туныктышо, кусарыше, мер пашаеҥ, «У куралше» икымше марий букварьын авторжо.
1969 — Прокопий Васильевич Рудаков, совет озанлык да партий пашаеҥ. 1919 ий гыч РКП(б)-ын йыжыҥъеҥже. Российысе Граждан сар ден Кугу Ачамланде сар-влакын участникше. Кугу Ачамланде сар жапыште — Марий АССР-ысе Звенигово район Кожласола селаште 3071 №-ан эвакогоспитальын политике шотышто начальникын алмаштышыже, майор. Ленин орденын кавалерже (1967).
1992 — Пётр Речкин, марий серызе, кусарыше, журналист, СССР Журналист-влак ушемын йыжыҥъеҥже.

Калык пале

Тӱтыра кече лекме деч вара пыта — игече сай лиеш.
Маринан кечыже. Ты кечын тыгай калык палым эскереныт: турня-влак кечывалвелыш чоҥештат гын, шыже ондак толеш. Тиде кече деч вара чодырашке емыжлан коштмым чарненыт.