31 сорла

←
→
Сорла
← →Сорла
	2026 ий

31 сорла (31 август) — григориан кечышот почеш идалыкын 243-шо (кужемдыме ийлаште — 244-ше) кечыже. Идалык пытыме марте 122 кече кодеш.

Йошкар-Олаште ☀️ Кече 4 шагатат 48 минутлан лектеш, 18 шагатат 48 минутлан шинчеш. Кечын кужытшо 🕒 14 шагатат 0 минут.
🌖 Катыкем толшо тылзе (17.84 тылзе кече).

Пайрем да шарныктарыше кече-влак

Россий — Ветеринар пашаеҥын кечыже (руш. День ветеринарного работника России).
Всецарица Шочынава масак юмоҥан пайремже (руш. Праздник чудотворной иконы Божией Матери Всецарица).
Имне кече (руш. День лошади).

Лӱмгече

Православий лӱм-влак: Варнава, Георгий, Григорий, Дионисий, Евгений, Емилиан, Ерм, Ермипп, Иларион, Иоанн, Лавр, Лев, Лука, Макарий, Михаил, Полиен, Серапион, Софроний, Флор, Христофор, Иулиания, Иулитта.

Эртынчык-влак

Тугак ончо: Категорий:Сорла тылзын 31 кечысе событий-влак

Марий тӱняште

1938 ий — Яков Эшпай лӱмеш кугыжаныш филармонийым почыныт.

Тӱня мучко

1935 ий — Донбасс шахтёр Алексей Стаханов мландышӱйым лукмо нормым 14 пачаш кугемден. Тыге «стахановский движений» шочын.
1986 ий — Новороссийск воктене «Адмирал Нахимов» пассажир лайнер вӱд йымак каен.
1990 ий — ГДР ден ФРГ-ын ушнымышт нерген вашкелшыкыш кидпалым пыштыме.

Шочыныт

Тугак ончо: Категорий:Сорла тылзын 31 кечынже шочшо-влак

1940 ий — Людмила Константиновна Елизарова, туныктыш пашаеҥ, Марий Эл Республикын калык туныктышыжо. Тудо Узбекистаныште шочын-кушкын. Марий кугыжаныш педагогике институтым тунем лекмеке, Волжск оласе 3-шо №-ан школышто туныктышылан пашам ышташ тӱҥалын, вара 7-ше да 6-шо №-ан школлаште тыршен. Чыла школыштат Людмила Константиновна тоштер пашам вӱден шоген, профессионал конкурслаште ятыр гана сеҥышыш лектын.
1945 ий — Виталий Лаврентьевич Богданов, журналист да поэт. Шернур кундем Купран ял гыч. 24 ий «Марий Эл» газет редакцийыште пашам ыштен. Сылнымут аланыштат кугу чапым сулен: «Мый шыргыжмашым шочынам тӱрлаш» книган авторжо. Калык кызытат тудын пашаже-влакым куанен лудеш да порын шарна.
1946 ий — Александр Александрович Соловьёв, полиграфист, Марий Эл Республикысе тӱвыран сулло пашаеҥже. Тудо Провой кундем Нурда ял гыч. Кугыжаныш савыктыш комитет вуйлатышын алмаштышыжлан да тӱҥ инженерлан 7 ий тыршыме деч вара, республикысе полиграфий-редакций ушемын вуйлатышыжлан шогалын. 1993-2002-шо ийлаште марий савыктыш комбинатын вуйлатышыже лийын.
1955 ий — Наталия Игоревна Кожанова, туныктыш пашаеҥ да журналист, Марий Эл Республикысе шанчын сулло пашаеҥже. Паша корныжо Марий кугыжаныш техник университет дене кылдалтын. «12 регион» телекомпаний ушемыште тыршен.
1955 ий — Александр Иванович Винокуров, туныктыш пашаеҥ. Татарстан кундем Альметьевск олаште шочын. Паша корныжо Юлтех университет дене кылдалтын. Химий шанче кандидат. Марий Эл Республикын сулло туныктышын пашаеҥже.
1966 ий — Зоя Висвис (Зоя Александровна Тимофеева), марий серызе, поэтессе, журналист. Паша корныжо «Кугарня» ден «Ямде лий» газет-влак ден кылдалтын. Россий серызе-влак ушемын йыжыҥъеҥже. Марий Элысе тÿвыран сулло пашаеҥже.
1967 ий — Александр Коковихин, руш серызе, поэт, амалкалче, Марий Эл Республикысе Олык Ипай лӱмеш Кугыжаныш самырыктукым премийын лауреатше (1998), Россий серызе-влак ушемын йыжыҥъеҥже (2001).

Коленыт

Тугак ончо: Категорий:Сорла тылзын 31 кечынже колышо-влак

1954 ий — Дмитрий Константинович Зеленин, руш да совет этнограф, диалектолог да фольклорист.

Калык пале

Озанлык пашаеҥ-влак ожно тиде кечын пакча але нурышто кушшо полин вондым луктыныт да онченыт: вожшо пенгыде гын, вес ийын уржа-сорла сай лиеш.
Чодыра ӱмбалне юж кандалге гын, шокшо игечылан.
Флорын да Лаврын кечышт. Ты кечын кресаньык-влак шке имньыштым кандареныт, нимогай пашаш луктын огытыл. Ӱдырамаш-влак икте-весе дек унала кошташ тӱҥалыныт.