2 теле

←
→
Теле
← →Теле
	2026 ий

2 теле (2 декабрь) — григориан кечышот почеш идалыкын 336-шо (кужемдыме ийлаште — 337-ше) кечыже. Идалык пытыме марте 29 кече кодеш.

Йошкар-Олаште ☀️ Кече 8 шагатат 10 минутлан лектеш, 15 шагатат 25 минутлан шинчеш. Кечын кужытшо 🕒 7 шагатат 14 минут.
🌗 Пытартыш чырык (22.24 тылзе кече).

Пайрем да шарныктарыше кече-влак

ООН — Куллыкым кораҥдыме верч кучедалме тӱнямбал кече (руш. Международный день борьбы за отмену рабства).
Россий — Российысе банк пашаеҥын кечыже (руш. День банковского работника России).
2D-сӱретчын кечыже (руш. День 2D-художников).
Оладьи мелнан кечыже (руш. День оладьев).
Фортунын кечыже (руш. День фортуны).
Мамык ныжылгылыкын кечыже (руш. День пушистой нежности).

Лӱмгече

Эртынчык-влак

Тугак ончо: Категорий:Теле тылзын 2 кечысе событий-влак

1905 — С. Чавайн Озаҥ учитель семинарийыште «Ото» почеламутым возен.

Шочыныт

Тугак ончо: Категорий:Теле тылзын 2 кечынже шочшо-влак

1902 — Софья Никитична Тимофеева, марий совет туныктышо, мер пашаеҥ. Марий автоном область / Марий АССР-ысе Курыкмарий районысо Пӹнгелйал школын туныктышыжо, директоржо (1924―1949). РСФСР школын сулло туныктышыжо (1949). Марий Элысе ӱдырамаш-влак кокла гыч Ленин орденын икымше кавалерже (1939). РСФСР Кӱшыл Каҥашын депутатше (1938 ий гыч). 1926 ий гыч ВКП(б)-ын йыжыҥъеҥже.
1913 — Александр Константинович Денисов, совет шанчызе-чодыразе, ялозанлык шанче доктор, профессор. Марий политехник институтын чодыра озанлык да дендрологий кафедрын вуйлатышыже (1971—1979). Марий АССР-ын сулло чодыразыже (1966), Марий АССР-ын сулло шанче да техник пашаеҥже (1972). РСФСР чодыра озанлык министерстве пелен Шанче-техник каҥашын йыжъеҥже. Кугу Ачамланде сарын салтакше.
1920 — Дмитрий Васильевич Швец, совет тазалыкаралтыш пашаеҥ, эмлызе-терапевт. Марий АССР-ын Республикысе эмлымверыште тӱҥ эмлызын алмаштышыже (1948―1952), МАССР Тазалыкаралтыш министерствын тӱҥ терапевтше (1952―1974). РСФСР-ын сулло эмлызыже (1960). Кугу Ачамланде сарын участникше. 1950 ий гыч ВКП(б)-н йыжыҥъеҥже.
1932 — Николай Володькин, курыкмарий серызе, поэт, туныктышо.
1932 — Геннадий Павлович Лосев, совет тоштер пашам виктарыше, гид-экскурсовод, краевед, журналист, педагог. Марий Элын Йӱрнӧ посёлкысо Историй-сӱретсымыктыш тоштерым негызлыше.
1937 — Александр Смоликов, руш серызе, поэт, Россий серызе-влак ушемын йыжъеҥже (1982).
1938 — Алексей Васинов, руш серызе, поэт, журналист, СССР журналист-влак ушемын йыжъеҥже (1971).
1946 — Михаил Абрамович Салес, совет да российысе театр режиссёр, актёр, театр пашаеҥ, Российын калык артистше (1994).
1983 — Рауль Гарифулин (Рауль Рафаилович Гарифулин), марий актер, радиовӱдышӧ, мурызо.

Коленыт

Тугак ончо: Категорий:Теле тылзын 2 кечынже колышо-влак

1980 — Егор Андрианович Федосеев, совет сарзе пашаеҥ. Кугу Ачамланде сар жапыште — касвел фронтлаште 117-ше лӱйкалыше дивизийын 275-ше лӱйкалыше полкысо лӱйкалыше ротыжын, 1063-шо лӱйкалыше полкысо батальонын да 237-ше гаубичный артиллерий полкын комсоргшо, старший лейтенант; майор. Совет Ушемын Талешкыже лӱмлан темлалтын, но Йошкар Тисте орден дене суапландаралтын (1944). 1943 ий гыч ВКП(б)-ын йыжыҥъеҥже.
2007 — Зинаида Ивановна Кашина, совет партий кугыжаныш пашаеҥ, туныктышо. Марий АССР Кӱшыл Каҥаш председательын алмаштышыже (1951—1955), МАССР Кӱшыл Каҥаш Президиум председательын алмаштышыже, секретарьже (1963—1967, 1967—1975). КПСС XX погынын делегатше (1961). ВКП(б)-ын йыжыҥъеҥже.

Калык пале

Вӱташте вольык тӱкедылеш — поранлан.
Пылан гын, игече лывыртышаш.
Кава ояр — йӱштылан, вудака — лывыртышлан.