Швец, Дмитрий Васильевич

Дмитрий Васильевич Швец
Шочмо кече	2 теле 1920(1920-12-02)
Шочмо вер	Ольговка[d], Жамбыл район[d], Йӱдвел-Казахстан область[d]
Колымо кече	30 ага 1992(1992-05-30) (71 ий)
Колымо вер	Йошкар-Ола, Марий Автоном Совет Социализм Республик, Россий
Эл	СССР →  Россий
Профессий	тӱҥ эмлызын алмаштышыже
Шанче алан	терапий
Паша вер	Марий АССР-ын Республикысе эмлымверже; МАССР-ын Тазалыкаралтыш министерствыже
Званий
Награде да премий

Дми́трий Васи́льевич Швец (2 теле 1920, Ольговка^[d], Жамбыл район^[d] — 30 ага 1992, Йошкар-Ола, Марий Автоном Совет Социализм Республик) ― совет тазалыкаралтыш пашаеҥ, эмлызе-терапевт. Марий АССР-ын Республикысе эмлымверыште тӱҥ эмлызын алмаштышыже (1948―1952), МАССР Тазалыкаралтыш министерствын тӱҥ терапевтше (1952―1974). РСФСР-ын сулло эмлызыже (1960). Кугу Ачамланде сарын участникше. 1950 ий гыч ВКП(б)-н йыжыҥъеҥже.

Илыш корныжо

1920 ий 2 декабрьыште Туркестан АССР-ысе Аулиеатин уездысе Ольговка ялыште (кызыт ― Казахстанын Йӱдвел-Казахстан областьын Жамбыл районжо) кулаклан шотлымо кресаньыкын ешыштыже шочын, 1929 ийыште ешыж дене Марий автоном областьысе Йошкар-Олаш куснен.

1941 ийыште Озаҥысе медицине институтын 3 курсшым, тиде ийынак ― Саратов медицине институтын сар-медицине факультетшым тунем пытарен.

1941 ий июльышто шке кумылын фронтыш каен. Кугу Ачамланде сарын участникше: 4-ше Украин фронтысо зенит дивизионын 149-ше лӱйкалыше бригадын, истребитель полкын кугурак эмлызыже, 61-ше ФЭП-ын 415-ше СЭГ пӧлкан начальникше, медицине службын капитанже. Сусырген, кок гана ушым йомдарен (контузий). 1948 ий майыште медицине службын подполковникше лӱмпале дене сарзе службым мучашлен. Медаль-влак дене, нунын коклаште «Сарзылык суаплан» медаль дене суапландаралтын.

1947 ийыште ЦУИВ пеленысе Москосо сар-медицине факультетым тунем пытарен. 1948 ий гыч уэш Йошкар-Олаште: Марий АССР-ын Республикысе эмлымверыште тӱҥ эмлызын алмаштышыже, 1952―1974 ийлаште ― МАССР Тазалыкаралтыш министерствын тӱҥ терапевтше, 1974―1984 ийлаште ― МАССР-ын Республикысе эмлымверын терапий пӧлкажым вуйлатыше. Марий республикыште санитар авиаций йӧн дене писын кардиоревматологий полыш службым, ЭКГ-м тораш колтымо кышкарым чоҥен.

1950 ийыште ВКП(б)-ш пурен. 1971—1980 ийлаште Марий АССР Кӱшыл Каҥашын VIII―X созывысе депутатшылан сайлалтын.

Тазалыкаралтыш аланыште суапшылан 1960 ийыште РСФСР-ын сулло эмлызыже" чаплӱмым пуымо. Октябрь Революций, Паша Йошкар Тисте орден-влак дене, медаль-влак да кок гана Марий АССР Кӱшыл Каҥаш Президиумын Чаптаныкше дене суапландаралтын.

1992 ий 30 майыште Йошкар-Олаште колен.

Чаплӱм ден суаптар-влак

• РСФСР-ын сулло эмлызыже (1960);
• Марий АССР-ын сулло эмлызыже (1957);
• Октябрь Революций орден;
• Паша Йошкар Тисте орден (1966);
• «Сарзылык суаплан» медаль (03.06.1944);
• «1941—1945 ийласе Кугу Ачамланде сарыште Германийым сеҥымылан» медаль (09.05.1945);
• «Чапле пашалан. Владимир Ильич Ленинын шочмыжлан 100 ий темме лӱмеш» медаль
• Марий АССР Кӱшыл Каҥаш Президиумын Чаптаныкше (1970, 1980).

Палемдымаш

Литератур

• Александров Н. А., Мочалов С. Г. Развитие здравоохранения в Марийской АССР. ― Йошкар-Ола: Марийское книжное издательство, 1980. ― 216 с.: ил.
• Швец Дмитрий Васильевич // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 402. — 2032 экз. — ISBN 5-87898-357-0.
• Швец Дмитрий Васильевич // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 821. — 872 с. — 3505 экз. — ISBN 978-5-94950-049-1.
• Двинянинов А. В., Мочаев В. А. Швец Дмитрий Васильевич // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 497. — 606 с. — 1500 экз. — ISBN 978-5-905314-35-3.