27 сӱрем

27 сӱрем (27 июль) — григориан кечышот почеш идалыкын 208-ше (кужемдыме ийлаште — 209-ше) кечыже. Идалык пытыме марте 157 кече кодеш.

Пайрем да шарныктарыше кече-влак

•  Россий — Торгайыше пашаеҥын кечыже (руш. День работника торговли) — сӱрем тылзын 4-ше шуматкечын палемдалтеш.
•  Вьетнам — Вьетнам сарыште колышо-влакым шарныме кече (руш. День памяти жертв Вьетнамской войны).
• Акилын, Дозорын кечышт (руш. День Акилы, Дозоры).
• Ковбойын кечыже (руш. День ковбоя).
• Шотланд вискин кечыже (руш. День шотландского виски).
• Вич тыглай вашлиймашын кечыже (руш. День пяти случайных встреч).
• Мӧҥгысӧ кушкыл ден коштмо кече (руш. День прогулки с домашними растениями).

Лӱмгече

• Католик лӱм-влак: Наталья, Юлия.
• Православий лӱм-влак: Акила, Еллий (Гелий, Елий, Элий, Элли), Иларий (Иларион, Илларион), Иоанн (Иван), Ираклий, Иуст (Иуста, Юст), Константин, Никодим, Николай, Онисим (Анис, Анисим), Пётр, Стефан (Степан), Феодор (Фёдор).

Эртынчык-влак

Тугак ончо: Категорий:Сӱрем тылзын 27 кечысе событий-влак

Тӱня мучко

• 1900 ий — Гамбургер кочкышым икымше гана ыштеныт.
• 1921 ий — Кумдан палыме шымлызе Фредерик Грант Бантинг инсулиным ыштыме нерген докладым лудын.
• 1952 ий — Юл да Дон эҥер-влакым ушышо каналым почыныт. Ушештарена: тиде каналым политзаключённый-влак 5 ий кӱнченыт.

Марий тӱняште

• 1955 ий — Козьмодемьянскыште Андрей Эшпай лӱмеш сымыктыш школым почыныт.

Шочыныт

Тугак ончо: Категорий:Сӱрем тылзын 27 кечынже шочшо-влак

• 1942 ий — Виктор Викторович Севастьянов, Россий Федерацийын сулло эмлызыже. Астрахань олаште шочын. Озаҥысе мединститутым тунем лекмеке, Йошкар-Олашке толын да республикысе эмлымверыште невропатологлан пашам ышташ тӱҥалын. 1999-ше ийыште Виктор Викторович «Кутырымо патологий да нейрореабилитаций шотышто республикысе рӱдерым» почын да тӱҥ эмлызылан шогалын, калыкыште тиде рудерым Севастьновын рӱдерже маныт. Виктор Викторович Нью-Йоркысо шанче академийын чолга шанчыеҥже.
• 1949 ий — Павел Яковлевич Булгаков, журналист, редакций пашаеҥ, Марий Эл Республикын сулло журналистше. Йошкар-Олаште шочын-кушкын. Маскасола кундемысе газет редакцийыште икмыняр ий тыршыме деч вара Марий Республикысе журналист-влак ушемын секретарьже лийын. 3 ий «Республика» парламент газетын редакторжо лийын, а 1999-ше ийыште «7 дней» газетын тӱҥ редакторжо сомылым шукташ тӱҥалын.
• 1951 ий — Владимир Дмитриевич Шаров, шанче-этнограф. Калык-влак кокласе политике шотышто специалистлан тыршыме деч ончыч Марий шанче да шымлыше институтын пашаеҥже лийын. Кызытсе этнополитик кыл шотышто экспертлан шотлалтеш. 80 наре шанче пашан авторжо. Историй шанче кандидат.
• 1954 ий — Татьяна Багишевна Никитина, шанче-археолог, Марий Эл Республикысе шанчын сулло пашаеҥже. Йошкар-Олаште шочын-кушкын. Тудат марий шанче да шымлыше институтышто пашам ыштен да вуйлатышын алмаштышыже лийын. 2 ий финно-угор шанче рӱдерым вуйлатен. Утларак Татьяна Багишевна марий калыкын XIII, XIV, XV-ше курымласе историйым шымлен, 60 наре шанче пашам савыктен. Ик тыгай монографийланже кугыжаныш премий денат палемдалтын.
• 1966 ий — Евгений Михайлович Бочкарёв, амалкалче. Морко кундем Шеҥше селаште шочын-кушкын. 1993-1996-шо ийлаште экономике кыл шотышто министерствын кертежъеҥже лийын. 1998-ше ийыште «Пивовар» ушемын вуйлатышыжлан шогалын. Марий Эл Республикысе кугыжаныш погынын депутатшат лийын. «Деловая Россия» мер ушемысе марий пӧлкажын вуйлатышыже. Экономик шанче кандидат.

Коленыт

Тугак ончо: Категорий:Сӱрем тылзын 27 кечынже колышо-влак

• 1873 — Тютчев, Фёдор Иванович.
• 1990 — Василий Сапеев, марий серызе, почеламутчо, туныктышо, педагогике шанче кандидат (1982), СССР Серызе-влак ушемын йыжъеҥже (1971), РСФСР-ын сулло туныктышыжо (1965), 1941—1945 ийласе Кугу Ачамланде сарын участникше.

Калык пале

• Йӱд кава яндар да шӱдыран гын, кечан игече шыже марте шога.
• Акилан кечыже. Пасушто шурным тӱредыныт, киндым погеныт. Ялысе калык пасу тӱреш погынен, сай шурно лектышым йодын. Кӧршӧкеш пучымышым шолтеныт да пасуводыжлан луктын шынденыт.
• Кинде шумым, марий-влак тыге эскерыныт. Кинде кӱмӧ годым шурно савыш волгалтеш — кинде лектыш чапле лиеш. Умыр волгенче чот коеш – кинде лектышан лиеш. Шырка годым умыр игече ок лий гын, кинде эксык-пырчыже шагал лектышан лиеш.