2 пургыж

←
→
Пургыж
← →Пургыж
	2026 ий

2 пургыж (2 февраль) — григориан кечышот почеш идалыкын 33-шо кечыже. Идалык пытыме марте 332 (кужемдыме ийлаште — 333) кече кодеш.

Йошкар-Олаште ☀️ Кече 7 шагатат 31 минутлан лектеш, 16 шагатат 5 минутлан шинчеш. Кечын кужытшо 🕒 8 шагатат 34 минут.
🌕 Тичмаш тылзе (14.55 тылзе кече).

Пайрем да шарныктарыше кече-влак

Тугак ончо: Категорий:Пургыж тылзын 2 кечысе пайрем-влак

— Вӱдан да купан вершӧрын тӱнямбал кечыже (руш. Всемирный день водно-болотных угодий).
Россий — Российын Сарзе чап кечыже. Йошкар Армийын немыч-фашист войскам Сталинград кредалмаште кырен шалатыме кече (1943) (руш. День воинской славы России — День разгрома Красной Армией немецко-фашистских войск в Сталинградской битве (1943).
Азербайджан — Самырык-влакын кечышт (руш. День молодёжи Азербайджана).
Испаний, Канар отро-влак — Канделярий гыч Юмынаван кечыже (руш. День Богоматери из Канделярии).
США, Канаде — Сурок кече (руш. День сурка).
Франций — Мелна кече (руш. Блинный день).
Шоҥшо кече (руш. День ежа).
Кычкыме пий-влакын кечышт (руш. День ездовых собак).
«Ы» буква кече (руш. День буквы «Ы»).
Алте преподобный Евфимийым шарныме кече (руш. День памяти преподобного Евфимия Великого).

Лӱмгече

Католик лӱм: Корнелий (Корнилий).
Православий лӱм-влак: Агна, Василид, Васс, Евсевий, Евтихий, Евфимий, Захария, Инна, Лев, Лаврентий, Павел, Пинна, Римма, Фирс.

Эртынчык-влак

Тугак ончо: Категорий:Пургыж тылзын 2 кечысе событий-влак

1701 — Пётр Первый кугыжа Балтий теҥыз флотым ыштыме нерген кÿштыкым луктын.
1892 — США гыч Уильям Пейнтер кÿртньö пробкым ыштымылан патентым налын.
1922 — Джеймс Джойсын «Улисс» романже ош тÿням ужын. Тудо кызытат модернизм шÿлышан эн сай произведенийлан шотлалтеш.
Лач тиде кечын марий пашазе-влак Горький олашке колхозник-ударник-влакын погынымашышкышт каеныт. 500 еҥ ече ӱмбак шогалын, мӱндыр корныш тарванен да 12 февральыште мöҥгö пöртылын.

Шочыныт

Тугак ончо: Категорий:Пургыж тылзын 2 кечынже шочшо-влак

1933 — Михаил Андреевич Шалагин, спорт пашаеҥ, тоштер пашам виктарыше. Марий АССР кап-кыл тӱвыран сулло пашаеҥже (1990). Шкеже У Торъял кундем гыч. 21 ий «Урожай» спорт ушемын вуйлатышыже лийын. А 1997-ше ийыште Спорт чап тоштерым почын да вуйлаташ тӱҥалын.
1945 — Роза Ивановна Яковлева, Россий Федерацийын сулло туныктышыжо, Марий Эл Республикын сулло туныктыш пашаеҥже. Шернур кундемыште шочын. Паша корныжо Шернур кыдалаш школышто тӱҥалын. Умбакыже Роза Ивановна районысо да посёлкысо погын-влакын депутатше лийын. Кугу мер пашажлан 1981-ше ийыште «Почёт пале» орден дене палемдалтын.
1947 — Валерий Васильевич Марьин, Россий Федерацийын почётан чоҥышыжо. Шернур кундем гыч. 23 ий «Маригражданстрой» ушемыште тыршен, а 1997-ше ийыште Марий Эл республикысе чоҥымо да архитектур министерствыште пашам ышташ тӱҥалын, вара уэш «Маригражданстрой» ушемыш пöртылын.
1985 — Вера Викторовна Николаева, «Вената» дуэтын солисткыже. Поранча кундемын талантан шочшыжо. Тыгак «Марий памаш» калык ансамбльыш коштеш.

Коленыт

Тугак ончо: Категорий:Пургыж тылзын 2 кечынже колышо-влак

1990 — Пауль Аристэ, эстон йылмызе-шанчызе.
1944 — Павел Александрович Тезиков, Пашазе-кресаньык Йошкар армийын сержантше, Кугу Ачамланде сарын салтакше, Совет Ушемын Талешкыже (1944).
2005 — Григорий Иванов (Григорий Васильевич Иванов), марий серызе, почеламутчо, журналист, кусарыше, Россий Журналист-влак ушемын йыжъеҥже. «Паша ветеран» медаль дене палемдалтын.
2012 — Владимир Фёдорович Быков, совет озанлык пашаеҥ, Социалистический Паша Герой.

Калык пале

Игече шошым ончыкта: кечан – чевер шошылан, пылан – пораным вучыман.
Епимын кечыже. Тиде кечын тыгай калык палым эскереныт: пырыс кÿварым удыра гын, поран лиеш. Кечывал кечын кече шыратен онча – шушаш кеҥеж йÿран лийшаш, кугу мардеж пуа гын – идалык мучко ночко игече шога.