Иванов, Григорий Васильевич
| Григорий Васильевич Иванов | |
|---|---|
 | |
| Шочмо кече | 1937 ий 21 пургыж |
| Шочмо вер | РСФСР, Марий АССР, Маскасола кундем, Куяр посёлко |
| Колымо кече | 2005 ий 2 пургыж (67 ий) |
| Колымо вер | Йошкар-Ола |
| Гражданлык |
 СССР Россий |
| Паша сомыл | серызе, почеламутчо, журналист |
| Награде да премий |
|
Григорий Васильевич Иванов (21 пургыж 1937, Куяр, Марий Автоном Совет Социализм Республик — 2 пургыж 2005, Йошкар-Ола) — марий серызе, почеламутчо, журналист, кусарыше, Россий журналист-влак ушемын йыжъеҥже[1].
Илыш корныжо
Григорий Иванов 1937 ий 21 пургыжышто Марий Эл Республикын кызытсе Медведево район Куяр ялеш кресаньык ешеш шочын. 1945 ийыште тӱҥалтыш школыш каен. Изиж годымак тулык кодын, Лӱльпан йоча пӧртыштӧ ончен кушкын. Вара Оршанке район Ошлаэҥер ялеш илен, Тошто Крешын школышто, У Торъял механизаций училищыште тунемын. Икмыняр ий М. Шкетан лӱмеш колхозышто шофёрлан да трактористлан пашам ыштен. Кыдалаш шинчымашым Оршанке посёлкысо кас школышто налын[1].
1964 ий гыч журналист пашаште. Ончыч Медведево район «Коммунизм корно» газетыште пашам ыштен. Вара Оршанкыш илаш куснен да «Вперёд» газет редакцийын пашаеҥже лийын. Шуко ий дубляж дене редактор алмаштышылан пашам ыштен. Шкешотан марий газет «Калык ой» лекташ тӱҥалмеке, тудын тӱҥ редакторжо лийын[1].
Григорий Иванов Тошто Крешыныште тунеммыж годым почеламутым возаш тӱҥалын. 1970-ше ийлаште ик гана веле огыл «Сылнымут шыже» семинар-каҥашлаште лийын. Лектышыжлан «Йошкар тӱмыр» да «Ӱжӱвӱр муро» книга-влак лийыныт. Тудо йоча поэт семын утларак палыме. Тудын самырык лудшо-влаклан пӧлеклалтше шуко почеламутшо «Ямде лий» газетыште, «Пионер йӱк», «Кече» журналлаште, «Эрвий» альманахыште савыкталтыныт. Тудо кӱчык почеламутын мастарже. Тудын кидше гыч почеламут-тушто, почеламут-задаче, шараде да моло миниатюр-влак лектыныт, кудышт йоча садлан, изирак школьник-влаклан сборниклашке пурталтыныт[1].
Григорий Иванов кугыеҥ-влакланат возен. Тудын почеламутшо-влак образный йылме, келге шонымаш дене ойыртемалтыт. Поэмыже-влак сюжет дене кумылаҥдат.
Поэтын эн сай почеламутшо-влак руш йылмыш кусаралтыныт, Йошкар-Олаште да Кировышто тӱшкан сборниклаште савыкталтыныт.
Григорий Иванов журналист-влак ушемын еҥже. «Паша ветеран» медаль дене палемдалтын[1].
Тӱҥ произведенийже-влак
- Йошкар тӱмыр : почеламут-вл. Йошкар-Ола, 1975. 32 с.
- Ӱжӱвӱр муро : почеламут, поэма [Песня иволги : стихи, поэма]. Йошкар-Ола, 1980. 104 с.
- Вашлийым туштым : почеламут-вл. [Встреча с загадкой : стихи]. Йошкар-Ола, 1983. 48 с.
- Ужар лӱҥгалтыш : почеламут-вл. [Зеленые качели : стихи]. Йошкар-Ола, 1988. 28 с.
- Лесникын эргыже : поэма гыч ужаш // Эрвий. Юзо памаш. Йошкар-Ола, 1989. С. 127—134.
- Кечылан шыргыжам : почеламут, поэма [Улыбаюсь солнцу : поэма, стихи]. Йошкар-Ола, 1992. 72 с.
- Шомак изоҥгыр : почеламут-вл. // Ончыко. 1994. № 4. С. 151—154 ; 1995. № 4. С. 143—146.
- Илыш пӧрдемыште : почеламут-вл. // Ончыко. 2002. № 5. С. 77—81. Эльэрэс : поэме // Ончыко. 2003. № 3. С. 84—103.
Руш йылмыш кусарыме произведенийже-влак
- Подскажи словечко : стихи / пер. Н.Кропинова//Дружба. Мир, в котором я живу. Йошкар-Ола, 1997. С. 245—248.
- Стихи / пер. В. Морозова//Дружба. Время пить херши. Йошкар- Ола, 2007. С. 321—328.
Суаптар да чаплӱм
«Паша ветеран» медаль;- Россий журналист-влак ушемын йыжъеҥже[1].
Палемдымаш
Литератур
- Писатели Марий Эл: биобиблиографический справочник / сост.: А. Васинкин, В. Абукаев и др. — Йошкар-Ола: Марийское книжное издательство, 2008. — 752 с. С. 253—254.
- Г. В. Иванов // Земля Оршанская. Йошкар-Ола, 1994. С. 29—30.
- Авипов А. Ӱжӱвӱр мура, ӱжӱвӱр ӱжеш // Марий Эл. 1992. 28 окт.
- Абукаев-Эмгак В. Тракторист гыч поэт марте // Марий Эл. 2002. 14 июнь.