Быков, Владимир Фёдорович

Владимир Фёдорович Быков
Владимир Фёдорович Быков
Шочмо кече	14 вӱдшор 1931
Шочмо вер	Данилово (Йошкар-Ола), Йошкар-Ола оласе йырвел, Марий Эл Республик, Россий;
Колымо кече	2 пургыж 2012 (80 ий)
Колымо вер	Пурсанур, Медведево район, Марий Эл Республик, Россий;
Эл	СССР; Россий;
Паша сомыл	комбайнёр, водитель
Награде да премий	; ;

Владимир Фёдорович Быков (14 вӱдшор 1931, Данилово (Йошкар-Ола), Марий Эл Республик — 2 пургыж 2012, Пурсанур, Марий Эл Республик) — совет озанлык пашаеҥ, Социалист Паша Талешке.

Илыш корныжо

1931 ий апрельыште Марий АССР Медведево вел — Княжна ялыште (кызыт — Йошкар-Оласе Данилово ял) шочын. Шке ялыштыже ныл классан школым тунем пытарен, но умбакыже шинчымашым налаш логалын огыл. Владимир 12 ияшак пасушто пашам ыштен, имньым виктарен. Тудын икымше суаптарже, кудым Володя йылт самырык рвезе налын — «Кугу Ачамланде сарыште пашам чаплын ыштымыжлан» медаль.

1949 ийыште Владимир Быков У Торъял селасе ялозанлыкым механизацийлыме школыш тунемаш пурен. Ик ий гыч, комбайнерын таныккагазшым налмеке, Кузнецово селаште верланыше Йошкар-Оласе МТС-ыш пашашке толын. Армий деч ончыч пашам ыштыме икымше комбайнже С-4 лийын, тудын двигательжым вич парняж гай пален. 23 ияш Владимир Фёдоровичым армийыш налыныт. Туркмен республикыште, Ашхабадыште, разведбатальонышто артиллерий мастерлан служитлен.

1957 ийыште мӧҥгӧ пӧртылмекше, угыч комбайнерлан пашам ышташ тӱҥалын. 1960 ийыште пошкудо ялласе колхоз-влак «Семёновский» кугу совхозыш ушненыт, тудым уста вуйлатыше, ончычсо туныктышо Сергей Степанович Жилин вуйлатен. Совхоз пасу кумдаҥын, технике шуко лийын, чапле шурно кушкын. Владимир Быковынат шийме паша лектышыже кугемын. Владимир Фёдорович С-4М, СК-3, СК-4 комбайнлаште пашам ыштен, 1969 ий гыч «Сибиряк» комбайн дене тыршен.

В. Ф. Быковын паша сеҥымашыже нерген Марий АССР-ын Кӱшыл Каҥаш Президиумын Чап кагазше, ВДНХ-ан кум шӧртньӧ медальже, «Россий Федерацийын сулло механизаторжо» чаплӱм ончыктат.

1972 ийыште Быков Владимир Фёдорович Ленин орден дене суапландаралтын, а 1975 ийыште Совет Ушемын кӱшыл суаптаржым — Социалист Паша Талешкын Шӧртньӧ Шӱдыржым налын. Индешымше вичияшыште тудо шкенжын кум вичияшлык планымат темен.

Владимир Фёдорович Быков комбайн штурвал ончылно чылаже 40 ий пашам ыштен. Теле пагытлан совхозышто автомобиль водительлан пашам ыштен але газ котельныйыште дежурствыш коштын.

Тудо 2002 ийыште, 72 ийыш тошкалмыж годым, сулен налме канышыш лектын. 2012 ий 2 февральыште илыш гыч каен.

Литератур

А. Н. Кропотов. Возрождение («Семёновка» племзаводын 50 ий темме вашеш). Йошкар-Ола, 2006.