15 пургыж

←
→
Пургыж
← →Пургыж
	2026 ий

15 пургыж (15 февраль) — григориан кечышот почеш идалыкын 46-шо кечыже. Идалык пытыме марте 319 кече (кужемдыме ийлаште — 320) кече кодеш.

Йошкар-Олаште ☀️ Кече 7 шагатат 2 минутлан лектеш, 16 шагатат 34 минутлан шинчеш. Кечын кужытшо 🕒 9 шагатат 32 минут.
🌘 Шоҥго тылзе (27.55 тылзе кече).

Пайрем да шарныктарыше кече-влак

— Операцийысе медшӱжарын тӱнямбал кечыже (руш. Международный день операционной медицинской сестры).
Россий, Белоруссий — Интернационалист салтак-влакым шарныме кече (руш. День памяти воинов-интернационалистов).
Юмым вашлийме (руш. Сретение Господне).
Пиал пышкемым кылдыме кече (руш. День завязывания узелков на счастье).
Шергашын йоҥгалтме кече (руш. День звона колец).

Лӱмгече

Католик лӱм-влак: Зигфрид, Клод, Иовит, Кенан, Фаустин.
Православий лӱм: Василий.

Событий-влак

Тугак ончо: Категорий:Пургыж тылзын 15 кечысе событий-влак

Шочыныт

Тугак ончо: Категорий:Пургыж тылзын 15 кечынже шочшо-влак

1913 — Семён Михайлович Калугин, совет сарзе да администраций пашаеҥ. Кугу Ачамланде сар жапыште — Белорус фронтышто 65-ше армийын 105-ше лӱйкалыше корпус топографий службын сарзе топографше, майор; подполковник (1947). Марий АССР Шанче-краевед тоштерын (кызыт — Марий Эл Республикын Т. Евсеев лӱмеш калыкле тоштерже) директоржо (1961—1963). 1942 ий гыч ВКП(б) йыжъеҥ.
1936 — Краснов, Петр Васильевич, журналист да мер пашаеҥ. Шкеже Волжск кундем Кӱшыл Азъял гыч. «Молодой коммунист» газет редакторлан 9 ий тыршыме деч вара Марий книга савыктышыште ыштен. 1988-1996-шо ийлаште Марий радион вуйлатышыже, тыгодымак телерадиокомитет вуйлатышын алмаштышыже сомылым шуктен. Суапле пашажлан кугыжаныш чап танык дене палемдалтын.
1952 — Ломоносов, Ион Константинович . 1975-ше ий гыч Йошкар-Оласе проект да чоҥышо ушемыште пашам ыштен: инженер–геодезистлан тӱҥалын да тӱҥ инженер марте кушкын. А 1992-шо ийыште Ион Константинович «Йошкар–Ола» ушемын тӱҥ вуйлатышыжлан шогалын.
1937 — Наумова, Людмила Александровна, туныктыш пашаеҥ, Россий Федерацийын сулло туныктышыжо. Советский кундем Шурга ялыште шочын. Паша корныжо Советский кундемысак Мананмучаш да Алексеевский посёлкысо школла дене кылдалтын. Тӱҥалтыш класс туныктышылан 40 ий наре тыршен.
1952 — Ратюков, Юрий Никифорович, туныктышо, Марий Элын сулло туныктыш пашаеҥже, Россий Федерацийын сулло туныктышыжо шочын. Козьмодемьянск оласе 3-шо №-ан школышто вуйлатыше мартеат шуын. Ятыр туныктыш проектым илышыш шындарен. «Идалыкын вуйлатышыже» Россий кӱкшытысӧ конкурсын лауреатше.
1973 — Журавлёв, Сергей Александрович — российысе шанче пашаеҥ, йылмым шымлызе, кӱшыл школын туныктышыжо. Филологий шанче кандидат (2004), Марий кугыжаныш университетын руш йылме, сылнымут да журналистике кафедрын доцентше (2008). 2023 ий 1 июль гыч — Марий кугыжаныш университетын историй-филологий факультетын деканже.

Коленыт

Тугак ончо: Категорий:Пургыж тылзын 15 кечынже колышо-влак

1960 — Никандр Лекайн, марий серызе, журналист, СССР Серызе-влак ушемын йыжъеҥже (1960), Марий АССР-ын Калык серызыже (1957), 1941—1945 ийласе Кугу Ачамланде сарын участникше.
2015 — Анатолий Степанович Подойников, совет да российысе футболист, тренер. «Спартак» (Йошкар-Ола) футбол клубын защитникше (1963—1968). Марий АССР / Марий Эл Республикын Йошкар-Оласе СДЮШОР-ын тренерже (1969—2010). РСФСР-ын сулло тренерже (1978). Футбол дене СССР-ын спорт мастерже (1967).

Калык пале

Йӱд каваште шуко шӱдыр коеш — шошо вара веле толшаш.
Игече могай лиеш, шошат тугаяк лийшаш.