Калыкле сылнысӱрет галерей (Йошкар-Ола)
| Калыкле сылнысӱрет галерей | |
|---|---|
| руш. Национальная художественная галерея | |
 | |
| Негызлалтын | 2007 ий 4 кылме |
| Верланымаш | |
| Адрес |
 Россий: Йошкар-Ола, Ленин проспект, 24 |
| Директор | Бурнашева Елена Эдуардовна |
| Сайт | rmii.ru/afisha_gal |
 |
|
 РУВИКИ.Медиаште медиафайл-влак | |
Калыкле сылнысӱрет галерей (руш. Национальная художественная галерея) — Йошкар-Олаште Республикысе сӱрет сымыктыш тоштерыш пурышо ужаш. 2007 ий 4 ноябрьыште почылтын. Марий Элысе сӱретче-влакын сӱретыштын эре улшо экспозицийышт деч посна галерейыште Российысе да тӱнямбалысе музей-влакын тӱрлӧ коллекцийыштын, тыгак посна коллекций-влакын ончерышт эре эртат.
Историй
Галерей 2007 ий 4 ноябрьыште «Жапын чурийже» ончер дене почылтын, тушто республикысе кугу тоштер-влакын коллекцийышт гыч Марий Элын тӱвыра поянлыкшым ончыктымо. Почмашым Калыкын икоян улмо кечыжлан да Марий Эл Республикын кечыжлан келыштарыме.
2007 ийыште галерейыште «Тоштер. Сем. Йоча-влак» Россий кӱкшытан поро кумылым ончыктышо проект эртен. Мероприятийым тулык йоча-влаклан келыштарыме.
2008 ий мучаште галерейыште Тоштер-влакын Тӱнямбал каҥашыштын Российысе комитет Президиумын кумдаҥдыме заседанийже эртен.
2010 ий шошым галерейыште «Руш тоштер: виртуал филиал» информациян-туныктымаш рӱдер пашам тӱҥалын.
2011 ий шыжым «Олан портретше: вашталтше Йошкар-Ола — Юл кундемын чинче падырашыже» творческий акцийым эртарыме. Моско, Пермь край да Юл кундемысе федеральный округысо республикла гыч 24 профессионал сӱретче участвоватлен. Участник-влак Йошкар-Олан чоҥалтше архитектур чурийжым палемденыт. Проектын лектышыже семын тыгаяк лӱман ончер да 100 утла аралтыш единицылан фондым пойдарымаш лийын.
Тудо ийынак Калыкле сылнысӱрет галерей базеш тӱрлӧ социал да капкыл вий йӧнан дене йоча ден самырык-влаклан Ресурслык рӱдер почылтын, тудо Кугыжаныш Руш тоштерын программыже-влакым тораште улмо формат дене шымлаш полша.
Галерей кӧргыштӧ руш-швейцар сӱретче Александр Бенуа ди Стеттон персонал ончерже, Калининградысе янтарь тоштерын фондшо гыч «Балтикын шӧртньыжӧ» ончер, Зураб Церетелин персонал ончерже, Сальвадор Далин произведенийлажын ончерже эртеныт.
Оралте
Галерей оралте олан покшелне, Оболенский-Ноготков площадьыште верланен, тудым Чарлан икымше сарзывуйжо лӱмеш манме, тудлан тыштак имнян чапкӱм шогалтыме. 2007 ийыште Уэшшочмаш саманысе архитектур стиль дене чоҥымо. Оралтын посна ойыртемже семын шагатан башне улеш. Шагатын кӱшыл шола лукыштыжо почылтшо капкаште Юмын Аван сынсӱретше лектеш, а вара ӱлыл шола лукышто тудын сынсӱретше дене изи осёл кая, тудо марий мландыш Юмынаван толмыжым символ семын ончыкта. Изи осёл пурла ӱлыл капкаш пура. Капка петырналтеш, а пурла кӱшыл лукышто угыч Кавасе Кугыжанватын поро сугыньым пуышо сынсӱретше лектеш.
Галерейын экспозиций заллашкыже сигнализацийын, климат-контрольын, пожарым йӧртымашын да волгалтарымашын кызытсе жаплык системышт шындалтын.
Экспозиций-влак
Галерейыште «Марий тӱс» лӱман эреак улшо экспозиций ончыкталтеш. Экспозицийыште Республикысе сӱрет сымыктыш тоштерын фондшо гыч марий тӱр, сӧрастарыш, калык вургем, сӱрет-влак ончыкталтыт (классике да этнофутуризм)[1][2].
Палемдымаш
- ↑ «Марий Тÿс» - «Марийский колорит». Республиканский музей изобразительных искусств. Тергыме кече: 3 вӱдшор 2016. Архивлыме 11 вӱдшор 2016 ий.
- ↑ Марийский колорит. МариМедиа. Тергыме кече: 3 вӱдшор 2016. Архивировано из оригинала 14 ага 2016 ий.
Кылвер-влак
- Афиша галереи. Сайт Республиканского музея изобразительных искусств.
- Галерея. Сайт Республиканского музея изобразительных искусств.
