Кушнарёв, Вениамин Михайлович

Вениамин Михайлович Кушнарёв
Шочмо кече	14 шорыкйол 1902(1902-01-14)
Шочмо вер	Новороговский[d], Кавказ пӧлка[d], Кубань область[d], Россий империй
Колымо кече	19 сорла 1986(1986-08-19) (84 ий)
Колымо вер	Переделкино[d], Моско область, РСФСР, СССР
Паша сомыл	политик
Награде да премий

Вениами́н Михáйлович Кушнарёв (14 шорыкйол 1902, Новороговский^[d], Кавказ пӧлка^[d], Кубань область^[d], Россий империй — 19 сорла 1986, Переделкино^[d], Моско область, РСФСР, СССР) — совет партий пашаеҥ, ВКП(б) Марий обкомын 1-ше секретарьже. СССР Кӱшыл Каҥашын 1-ше созывысе депутатше (1941 ий гыч).

Илыш корныжо

Кубань казакын ешыштыже шочын. 1919 ий вӱдшор — шыжа тылзын — Верный олаште (кызыт — Алматы) сад куштышо школын секретарьже. 1919 ийыште комсомол радамыш пурен. 1919 ий шыжа — 1921 ий шорыкйол тылзын — Верный оласе облисполкомышто пӱтынь российысе переписьын возкалышыже. 1921 ий шорыкйол — ага тылзын — Верный оласе сад куштышо школ пелен ялозанлык ферме вуйлатышын полышкалышыже.

1921 ий ага — сӱрем тылзын — Ташкентысе кидпаша школын тунемшыже. 1921 ий сӱрем — 1922 ий идым тылзын — Ташкент партий школын тунемшыже.

1922 ий идым — 1923 ий вӱдшор тылзын — Туркестан АССР-ысе Чимбай оласе мланде пӧлкам вуйлатыше. 1923 ий вӱдшор — шыжа тылзын — Туркестан АССР Чимбай оласе ВКП(б) комитетын учёт-статистике пӧлкажым вуйлатыше.

1923 ий идым тылзе гыч РКП(б)-н йыжъеҥже.

1923 ий шыжа — 1924 ий вӱдшор тылзын — Ташкентысе профессий ушем-влак каҥашын шотлышыжо.

1924 ий вӱдшор — 1926 ий ӱярня — Йошкар Армийыште: Эрвел Бухарасе РККА-н 1-ше имнешке полкын политике салтакше.

1926 ий ӱярня — 1929 ий ӱярня — илышйӧным ситарыше пӧлкан вуйлатышыже, 1929 ий ӱярня — 1932 ий вӱдшор тылзын — кадр шотышто вуйлатыше, Ташкентысе «Союзнефть» трестысе 2-шо секторын начальникше. 1932 ий вӱдшор — 1933 ий пургыж тылзын — Ташкентысе «Союзсера» трестысе 2-шо секторын начальникше. 1933 ий пургыж — 1934 ий вӱдшор тылзын — Ташкентысе Узбек республикысе «Заготскот» конторын кадр йодышыжым вӱдышӧ.

1934 ий вӱдшор — 1937 ий сӱрем — Москосо кочкыш йӧнозанлык академийын студентше. Кочкыш йӧнозанлыкысе инженер-технолог шинчымашым налын.

1937 ий сӱрем — 1938 ий марте — Орджоникидзе крайысе пашазе депутат исполнитель комитет председательын пашажым шуктышо. 1938 ий идым — 1939 ий пургыж тылзын — Москосо ВКП(б) ЦК-н муткучышо организаторжо.

1939 ий ӱярня тылзын 2-шо кечыже — 1942 ий вӱдшор тылзын 30-шо кечыже — Марий кундемысе ВКП(б) комитетын 1-ше секретарьже. ВКП(б) XVIII погынын делегатше (1939). СССР Кӱшыл Каҥашын депутатше (1941 ий гыч, уэш сайлыме). Кугу Ачамланде сар жапыште Марий АССР-ын пашажым кӱлеш семын виктарен кертын огыл, Сӱзлэҥер да Сурокышто верланыше сарзе-влак неле илышйӧныш логалыныт, кочкышым ситарыдымылан кӧра, чер пошен да шуко салтак шужен колен. 1942 ий телым, инспектор маршал К. Ворошиловын иктешлымашыж дене, паша олмыж гыч кораҥдыме, фронтыш колтымо.

1942 ий ага тылзе гыч — Йошкар Армийыште, Кугу Ачамланде сарын салтакше. 1942 ий ага — 1944 ий шорыкйол тылзын — Йӱдвел-Касвел фронтын 27-ше армийын тыл виктемысе политике пӧлкан инспекторжо, начальникын алмаштышыже. 1944 ий шорыкйол — 1946 ий сорла тылзын — 2-шо да 1-ше Белорус фронтласе 70-ше армийын политике шотышто интендантын алмаштышыже.

1946 ий идым — 1948 ий пургыж тылзын — Курск кундемысе пашазе депутат-влак советын исполнитель комитет председательжын алмаштышыже. 1948 ий пургыж — 1955 ий пеледыш тылзын — Курск кундемысе пашазе депутат-влак советысе исполнитель комитетын верысе йӧнозанлык пӧлкам вуйлатышыже. 1955 ий пеледыш — 1957 ий пеледыш тылзын — Курск кундемысе Кинде трестын вуйлатышыже. 1956 ийыште, пашам кодыде, Москосо КПСС РК пелен Кӱшыл партий школым тунем пытарен.

1957 ий пеледыш — 1983 ий сӱрем тылзын — Курск олаште сулен налме канышыште. 1983 ий сӱрем — 1986 ий сорла тылзын — Моско кундемысе Переделкино посёлкысо партий ветеран-влакын пӧртыштышт илен.

Лӱмпале

• майор;
• подполковник.

Суаптар

• Йошкар Шӱдыр орден (1944);
• I степенян Ачамланде сар орден (1945, 6.11.1985);
• медаль-влак.

Палемдымаш

Литератур

• Кушнарёв Вениамин Михайлович // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 474. — 872 с. — 3505 экз. — ISBN 978-5-94950-049-1.
• Филиппов С. Территориальные руководители ВКП(б) в 1934—1939 гг. Справочник. — Москва, РОССПЭН, 2016.
• Востриков В. Г., Колесников А. Ю., Краснов П. В., Мочаев В. А., Опарина Т. Т. Кушнарёв Вениамин Михайлович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 245. — 606 с. — 1500 экз. — ISBN 978-5-905314-35-3.

Кылвер=влак

• Кушнарёв Вениамин Михайлович // Справочник по истории Коммунистической партии и Советского Союза (1898—1991).