Мосунов, Анатолий Иванович

РУВИКИ-ште тыгай тукымлӱм дене вес еҥ нерген статьям лудаш лиеш: Мосунов.

Анатолий Иванович Мосунов
Анатолий Мосунов
Шочмо годсо лӱм	Анатолий Иванович Мосунов
Шочмо кече	1925 ий 17 кылме(1925-11-17)
Шочмо вер	РСФСР, Марий автоном область, У Торъял кундем, Антоново ял
Колымо кече	1988 ий 19 теле(1988-12-19) (63 ий)
Колымо вер	Йошкар-Ола
Гражданлык	СССР  Россий
Паша сомыл	серызе, почеламутчо, кусарыше
Награде да премий

Анатолий Иванович Мосунов (17 кылме 1925, У Торъял кундем, Марий автоном область — 19 теле 1988, Йошкар-Ола) — марий совет поэт, кусарыше, журналист, редактор. СССР писатель ушемын йыжъеҥже. Кугу Ачамланде сарын салтакше. Марий Эл Республикысе Чыкма ола гимнын текстшым рушлаш кусарыше автор.

Илыш корныжо

Кресаньык ешеш шочын. Ешыже Какшанмучаш (Пектубаево, У Торъял) селашке илаш куснен, тыште кыдалаш школым тунем пытарен. 1939 ийыште комсомол радамыш ушнен да 14 ияш ялысе клубым вуйлаташ тӱҥалын.

1943 ийыште 18 ияш шке кумылын фронтыш каен. Телавскысе пехото-пулемёт училищын курсантше, гвардий юж-десант бригадын автоматчикше, миномёт ылыжтарыше, гвардий рядовойжо лӱмпале дене Кечывалвел фронтышто газет журналист лийын. Украиным, Венгрийым, Чехословакийым, Румынийым, Польшым да Австрийым утарышаш верч кредалмаште лийын. Венгрийыште, Балатон ер воктене, кид дене кредалмаште нелын сусырген. Кугу Ачамланде сар пытымеке, армийыште кодын да сар газет-влакын сылнымут пашаеҥжылан пашам ыштен.

1949 ийыште шапашыш лектын, «Марийская правда» газетыш сылнымут пашаеҥлан пашаш пура. 1950—1952 ийлаште М. Горький лӱмеш Сылнымут институтышто тунемеш, но тунем ок пытаре.

Вара уэш журналист пашам шуя: «Социалистическая Якутия», «Вперёд» (Оршанке вел) газет-влакын, Саратов кундемысе район газет-влакын пашаеҥже. Тыгак Марий книга издательствыште редакторлан пашам ыштен. 1969 ийыште Марий АССР серызе-влак ушемын сылнымут консультантше лийын, руш поэзий секцийым вуйлатен, сылнымутым чолган чапландарен.

1988 ий 19 декабрьыште Йошкар-Олаште колен.

Сылнымут пашаже

Шке почеламутшым Кугу Ачамланде сар жапыште возаш да савыкташ тӱҥалын. Самырык поэтын икымше возымыжым моско поэт П. Железнов да ленинград поэт С. Макаров сайлан шотленыт. Шке почеламутшым фронтысо газетлаште савыктен. Тыге, 3-шо Украин фронтын «За честь Родины» газет редакцийын сылнымут пашаеҥже лийын, тудо тыште шке сар жапысе почеламутшым савыкта.

«Первые всходы», «Под мирным небом», «Огни Поволжья», «Подлесок» да моло почеламут сборник-влакын авторжо. Йоча-влаклан почеламутым возен («Мохнатый рыболов» сборник). Тыгак шке почеламутшым республикысе периодикыште, «Дружба» альманахыште, «Пионер йÿк» журналыште савыктен.

1969 ий гыч СССР писатель-влак ушемын йыжъеҥже.

Калык шот дене руш лийын, марла сайын кутырен, марий поэт-влак В. Колумб да М. Казаков дене келшен. Марий поэзийын классикше С. Чавайнын, М. Казаковын, М. Майнын, В. Чалайын, В. Колумбын шуко почеламутшым, якут поэт-влак М. Ефимовын, В. Алданскийын, С. Элляйын, С. Васильевын, марий поэт Д. Исламовын «Новоселье» почеламут сборникыштым рушлаш кусарен. М. Шкетанын «Эреҥер» романыштыже да Н. Арбанын «Кеҥеж йÿд» сем комедийыштыже кусарыме муро-влакым кӱкшын акленыт. Чыкма олан гимнжым «Берег горный — край любимый» рушлаш кусарен, тудын мутшым курыкмарий поэт Н. Егоров возен.

Тудын почеламутлажым марий поэт-влак тыгак марлаш кусареныт. Нине кусарыме-влак «Пиалан илыш» альманахыште да моло изданийлаште савыкталтыныт.

Шарнымаш

2015 ийыште поэт А. Мосуновын шочмыжлан 90 ий темме лӱмеш «Паруса воспоминаний» книга лектын.

Суаптар

• II степенян Ачамланде сар орден (1985);
• «Лӱддымылыклан» медаль (26.05.1945);
• «Веным налмылан» медаль;
• «1941—1945 ийласе Кугу Ачамланде сарыште Германийым сеҥымылан» медаль.

Тӱҥ произведений-влак

Умбакыже А. Мосуновын тӱҥ произведенийже-влак лӱмер рушла ончыкталтын:

• Первые всходы: стихи. — Йошкар-Ола, 1951. — 64 с.
• Под мирным небом: стихи. — Йошкар-Ола, 1957. — 72 с.
• Огни Поволжья: стихи. — Йошкар-Ола, 1966. — 64 с.
• Служил мальчишка в эскадроне: поэма. — Йошкар-Ола, 1968. — 24 с.
• Подлесок: стихи и поэма. — Йошкар-Ола, 1970. — 64 с.
• Мохнатый рыболов: стихи. — Йошкар-Ола, 1979. — 16 с.
• Горсть земли: поэма // Дружба. — Йошкар-Ола, 1981. — С. 102—108.
• Стучит акация в окошко: стихи. — Йошкар-Ола, 1988. — 128 с.

Палемдымаш

Литератур

• Беспалова Г. Е., Васин К. К., Зайниев Г. З. А. Мосунов // Писатели Марийской АССР: биобиблиографический справочник / Отв. А. В. Селин. — Йошкар-Ола: Марийское книжное издательство, 1988. — С. 188—190. — 376 с. — 5000 экз.
• Анатолий Мосунов // Писатели Марий Эл: биобиблиографический справочник / Сост. А. Васинкин, В. Абукаев и др. — Йошкар-Ола: Марийское книжное издательство, 2008. — С. 421—423. — 752 с. — 3000 экз. — ISBN 978-5-7590-0966-5.
• Мосунов Анатолий Иванович // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 244. — 2032 экз. — ISBN 5-87898-357-0.
• Зайниев Г. З., Мочаев В. А. Мосунов Анатолий Иванович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 291. — 606 с. — 1500 экз. — ISBN 978-5-905314-35-3.
• Мосунов Анатолий Иванович // Писатели Марий Эл: биобиблиографический справочник / Сост. Г. Сабанцев, Ю. Соловьёв и др. — Йошкар-Ола: Марийское книжное издательство, 2020. — С. 235—236. — 423 с. — 1000 экз. — ISBN 978-5-7590-1285-6.

Кылвер-влак

• Ветеран войны из Марий Эл, журналист «Марийской правды» Анатолий Мосунов «открыл» для русских марийскую поэзию, <https://www.marpravda.ru/news/vsja-respyblika/veteran-voyny-zhurnalist-mariyskoy-pravdy-anatoliy/>. Тергыме: 13 шыжа 2025. 
• «Я книгу дней своих листаю…» — «Йошкар-Ола» | городская газета (неопр.). www.gg12.ru. Тергыме кече: 13 шыжа 2025.
• Бессмертный полк. Йошкар-Ола. Мосунов Анатолий Иванович (руш.). www.moypolk.ru. Тергыме кече: 13 шыжа 2025.
• Сосунов Анатолий Иванович, 1925. Документы участника войны. (неопр.). Память народа. Тергыме кече: 13 шыжа 2025.
• Антоново (Большая Толмань Мосуновы) | Родная Вятка (руш.). rodnaya-vyatka.ru. Тергыме кече: 13 шыжа 2025.