Сабанцев, Геннадий Леонидович

РУВИКИ — эрыкан энциклопедий гыч материал
РУВИКИ-ште тыгай тукымлӱм дене вес еҥ нерген статьям лудаш лиеш: Сабанцев.
Геннадий Леонидович Сабанцев
Геннадий Сабанцев-Ояр, Геннадий Ояр, Ояр
Журналист Геннадий Сабанцев
Журналист Геннадий Сабанцев
Шочмо годсо лӱм Геннадий Леонидович Сабанцев
Шочмо кече 1958 ий 8 вӱдшор(1958-04-08) (68 ий)
Шочмо вер РСФСР, Марий АССР, Кужэҥер кундем, Йырмарий ял
Гражданлык  СССР
 Россий
Паша сомыл серызе, почеламутчо, журналист, кусарыше
Награде да премий

Геннадий Леонидович Сабанцев (шоч. 8 вӱдшор 1958, Йырмарий, Марий Автоном Совет Социализм Республик) — марий серызе, поэт, кусарыше, журналист да редактор. 1998 ий гыч Россий серызе-влак ушемын йыжъеҥже. Марий Эл Республикысе С. Чавайн лӱмеш кугыжаныш премийжын лауреатше (2018). Марий Эл Республикын калык поэтше (2015).

Илыш корныжо

1958 ий 8 апрельыште Марий АССР Кужэҥер вел Йырмарий ялысе кресаньык ешеш шочын.

1975 ий гыч 1980 ий марте Марий кугыжаныш университетысе историй-филологий факультетын марий йылме да сылнымут пӧлкаштыже тунемын. 1980 ий гыч 1988 ий марте «Ӱжара» район газетын кусарышыжлан да «Пачемыш» сылнымут-сылнысӱрет журналын пӧлка редакторжылан пашам ыштен. 1987—1988 ийлаште, журналист паша деч посна, Марий АССР Кӱшыл Каҥаш Президиум председательын полышкалышыже лийын. 1988 ий гыч 1991 ий марте — «Ямде лий» газетын тӱҥ редакторжо. 1991 ий гыч 1993 ий марте — «Кугарня» газет редакцийын пашаеҥже. 1993 ий гыч — «Марий Эл» кугыжаныш телерадиокомпанийыште сылнымут программе-влакын редакторжо. 2003 ий гыч — Чукотко автоном округын «Крайний Север» газетышкыже пурышо савыктыш-влакын редакторжо[1][2].

1998 ий гыч Российысе серызе-влак ушемын еҥже. Журналист пашаштыжат, поэзийыштыжат айдемылык (граждан) шӱлышыжӧ виян. 1973 ийыште Сабанцевын «Март» икымше поэтический произведенийже савыкталтын. 1975 ий гыч кумдан палыме поэт С. В. Николаевын вуйлатыме сылнымут ушемын чолга еҥже лийын. 1982 ийыште тудын почеламут аршашыже «Кинде-шинчал» (1982) тӱшка сылнымут сборникыш пурен. 1984 ийыште, Москошто эртыше, самырык серызе-влакын VIII пӱтынь ушемысе семинарыште лийын, тиде семинарыште Сабанцев шке возымыжлан В. Д. Берестов, В. Г. Гордейчев да Н. К. Доризо гай серызе, поэт-влак деч кӱкшӧ акым налын да «Шочмо мландын рӱдыжӧ» да «Тиде ийын кечыже-влак» тӱшка сылнымут сборник-влакын авторжо лийын.

Вара «Ончыко» сылнымут журналыште поэме-влак, а почеламут книгаже-влак Марий книга савыктышыште лектыныт: «Чытамсыр курым» (1987), «Нумалтыш» (1993), «Шӱмсавыш» (2008)[3], «Всполохи сердца» (2014), "Илыш пӧрдем (2018), «Припадаю к истокам» (2023). 2002 ийыште руш поэт А. Твардовскийын «Василий Тёркин» поэмыжым марлаҥден. 2013 ийыште татар поэт Роберт Миннуллинын почеламутшо-влакым марла посна книга дене савыктен.

1999 ийыште Г. Л. Сабанцевлан Марий Эл Республикын сулло журналистше[4], 2015 ийыште — Марий Эл Республикын калык поэтше чаплӱм-влакым пуэныт[5]. 2018 ийыште «Илыш пӧрдем» поэзий книгажлан Марий Эл Республикын С. Г. Чавайн лӱмеш Кугыжаныш премийже дене палемдалтын[6].

Библиографий

Тӱҥ произведенийже-влак
  • Почеламут-влак // Ончыко. 1980. № 3. С. 80-82.
  • Адак мый мӧҥгӧ толынам…; У пӧрт: почеламут-вл. // Кинде-шинчал. Йошкар-Ола, 1982. С. 33-58.
  • Чытамсыр курым: почеламут-вл. [Беспокойный век: стихи]. Йошкар-Ола, 1987. 96 с.
  • Почеламут-влак // Саман. 1990. № 2. С. 77-78.
  • Нумалтыш: почеламут-вл., поэма [Нота: стихи, поэма]. Йошкар-Ола, 1993. 160 с.
  • Корно; Шӱмбел йылмем; Пеледыш: почеламут-вл. // Мурйогын. Йошкар-Ола, 2003. С. 52-54.
  • Почеламут-влак // Ончыко. 2004. № 8. С. 60-70.
  • Почеламут-влак // Ончыко. 2005. № 7. С. 59-64.
  • Шӱмсавыш: почеламут-вл., статья, кусарыме почеламут ден поэме [Отзвуки сердца: стихи, переводы, статьи]. Йошкар-Ола, 2008. 336 с.
  • Йӧратымаш идалык: почеламут аршаш // Ончыко. 2008. № 3. С. 22-33.
  • Всполохи сердца: стихи. — Йошкар-Ола: ГУКП РМЭ «Марий журнал», 2014. — 200 с.
Руш йылмыш кусарыме произведенийже-влак
  • Стихи / пер. Л. Яковлева // Дни этого года. М., 1985.
  • Стихи / пер. Л. Олзоевой // Середина земли родной. М., 1987. С. 343—350.
  • Светом единым: стихи / пер. Г. Смирнова. Йошкар-Ола, 2003. 88 с.
Илышыже да творчествыже нерген литератур
  • Учаев 3. Поэзий — илыш муро // Марий коммуна. 1979. 8 февр.
  • Николаев С. А вет сай — пырля нумалтыш // Мутын нелыже да ямдыже. Йошкар-Ола, 1993. С. 204—220.
  • Егоров В. Нумалтышым нелытше // Кугарня. 1993. 21 май.
  • Сабанцев Г. «Чонна гыч айста почкена ме удам…» // Кугарня. 1997. 21 март.
  • Писатели Республики Марий Эл: автобиобиблиогр. сборник. Йошкар-Ола, 2004. С. 59-60.
  • Манаева-Чеснокова С. Ноша поэта Геннадия Ояра. // Художественный мир современной марийской поэзии: монография. Йошкар-Ола, 2004. С. 162—169.
  • Сабанцев-Ояр Г. Айдеме чылажымат чыта, а пушеҥге огеш // Ончыко. 2004. № 9. С. 116—118.
  • МБЭ. Йошкар-Ола, 2007. С. 312.
  • Кечыйол тошкалтыш дене сур турий семын нӧлталт сылнымут кавашке : поэт Геннадий Сабанцев-Оярлан — 50 ий // Ончыко. 2008. № 3. С. 20-21.
  • Иванов И. С. У сылнылыкым кычалме корнышто — Геннадий Оярын поэзийже // Ончыко. 2015. № 11. С. 58-63.
  • Михайлов В. «Уке шол, поэзий — пайрем оҥгыр огыл…» — Марий Элын Калык поэтше Г. Сабанцев-Оярлан 60 ий // Ончыко. 2018. № 4. С. 70-80.

Суаптар да премий-влак

  • Чукотск АО губернаторын Чаптаныкше (2008);
  • Марий Эл Республикын калык поэтше (2015)[5];
  • Марий Эл Республикын сулло журналистше (1999)[4];
  • Марий Эл Республикын С. Г. Чавайн лӱмеш сылнымут премийжын лауреатше (2018)[6].

Палемдымаш

  1. ↑ Кто есть кто в Марий Эл, 2002, с. 453.
  2. ↑ Писатели МЭ, 2008, с. 356.
  3. ↑ Писатели МЭ, 2008, с. 539—540.
  4. ↑ 1 2 Писатели МЭ, 2008, с. 540.
  5. ↑ 1 2 Хроника событий литературной и культурной жизни Республики Марий Эл (руш.). Союз писателей России. Тергыме кече: 30 шорыкйол 2021. Архивлыме 14 вӱдшор 2021 ий.
  6. ↑ 1 2 О присуждении государственных премий Республики Марий Эл (руш.). Глава Республики Марий Эл. Тергыме кече: 30 шорыкйол 2021. Архивлыме 21 идым 2020 ий.

Литератур

  • Сабанцев Геннадий Леонидович (Геннадий Ояр) // Кто есть кто в Марий Эл / Авт.-сост. В. А. Мочаев. — Йошкар-Ола: Марийский биографический центр, 2002. — С. 453. — 2000 экз. — ISBN 5-87898-197-1.
  • Зайниев Г. З. Сабанцев Геннадий Леонидович (Геннадий Ояр) // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 312. — 2032 экз. — ISBN 5-87898-357-0.
  • Геннадий Сабанцев // Писатели Марий Эл: биобиблиографический справочник / Сост. А. Васинкин, В. Абукаев и др. — Йошкар-Ола: Марийское книжное издательство, 2008. — С. 539—551. — 752 с. — 3000 экз. — ISBN 978-5-7590-0966-5.
  • Зайниев Г. З., Мочаев В. А. Сабанцев Геннадий Леонидович (Геннадий Ояр) // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 376. — 606 с. — 1500 экз. — ISBN 978-5-905314-35-3.
  • Геннадий Ояр (Сабанцев Геннадий Леонидович) // Писатели Марий Эл: биобиблиографический справочник / Сост. Г. Сабанцев, Ю. Соловьёв и др. — Йошкар-Ола: Марийское книжное издательство, 2020. — С. 309—311. — 423 с. — 1000 экз. — ISBN 978-5-7590-1285-6.

Кылвер-влак

  • Поэзия. web.archive.org. Тергыме кече: 7 шыжа 2025.
"https://mhr.ruwiki.ru/w/index.php?title=Сабанцев,_Геннадий_Леонидович&oldid=1232104" гыч налме