Воронцов, Павел Степанович

РУВИКИ-ште тыгай тукымлӱм дене вес еҥ нерген статьям лудаш лиеш: Воронцов.

Павел Степанович Воронцов
Марий АССР Кӱшыл Каҥаш Президиум председательын полышкалышыже
1950 — 1952
Шочын	1920 ий 8 теле(1920-12-08) Ошеть, Шернур район, Марий автоном область, РСФСР
Колен	2015 ий 15 пургыж(2015-02-15) (94 ий) Йошкар-Ола, Марий Эл, Россий
Профессий	партий пашаеҥ, депутат
Награде	Советский районын чапланыше гражданинже[d]
Сарзе службо
Службо жап	1940—1946
Званий
Кредалмаш	Кугу Ачамланде сар

Павел Степанович Воронцов (8 теле 1920, Ошет, Марий автоном область, РСФСР — 15 пургыж 2015, Йошкар-Ола, Марий Эл Республик, Россий) — совет партий да администраций пашаеҥ. Марий АССР Кӱшыл Каҥаш Президиум председательын полышкалышыже (1950—1952), Марий АССР Килемар (1952—1957), Ронго (1958—1959), Советский (1962—1965), Оршанке (1965—1966) район исполком-влакын председательже, Советский КПСС райкомын икымше секретарьже (1959—1962). Марий Эл Республикысе Советский районын чапланыше гражданинже (2000). Кугу Ачамланде сарын салтакше. 1943 ий гыч ВКП(б)-н йыжъеҥже.

Илыш корныжо

1920 ий теле тылзын 8-ше кечынже кызытсе Марий Эл Шернур район Ошет ялысе кресаньык ешеш шочын. Ешыште 17-ше йоча лийын. 17 ияш гыч Ӱлыл Тагилыште пашазе лийын.

1940 ий шыжа тылзын Пашазе-кресаньык Йошкар Армийыш налыныт. Рабоче-Крестьянская Красная Армия салтакше: Касвел фронтысо 103-шо гвардий артиллерий полкысо разведке пӧлкан командирже, гвардийын кугурак сержантше; Прибалтике фронтысо 52-шо шапаш артиллерий полкын взвод командирже, лейтенант. Кок гана сусырген. 1943 ийыште ВКП(б)-ш пурен. 1946 ий сорла тылзын капитан лӱмпале дене армий гыч демобилизоватлалтын. I степенян Ачамланде сар орден, маршал Жуковын III степенян орденже да медаль-влак дене, нунын коклаште «Сарзылык суаплан» медаль дене суапландарыме.

1949 ийыште Горький партий школым тунем пытарен. 1949 ий гыч МАССР Марий-Турек райисполком председательын алмаштышыже лийын, 1950—1952 ийлаште — Марий АССР Кӱшыл Каҥаш Президиум председательын полышкалышыже. 1952—1957 ийлаште Килемар, 1958—1959 ийлаште — Ронго, 1962—1965 ийлаште — Советский, 1965—1966 ийлаште — Оршанке райисполком-влакын председательже. 1959—1962 ийлаште Советский КПСС райкомын икымше секретарьже, 1962 ийыште Нартас ялозанлык техникумын 3 курсшым, пашам кодыде, тунем пытарен. Марий АССР Советский районым ыштымашке кугу надырым пыштен: рӱдерым Роҥго села гыч Советский посёлкыш кусараш темлен, озанлык технике погым да вуйлатыше колхоз кадрым пеҥгыдемден. 2000 ийыште тудлан Марий Эл Республикын Советский районысо чапланыше гражданинже чаплӱмым пуымо .

1966—1981 ийлаште Марий шӧр йӧнозанлыкын йӧндартыш ушемжын тӱҥ директоржо лийын.

1963—1967 ийлаште Марий АССР Кӱшыл Каҥашын VI созывысе депутатше лийын.

Тудын шуко ияш администраций да депутат пашаже «Почёт пале» орден дене (кок гана), медаль-влак дене, тыгак РСФСР Кӱшыл Каҥаш Президиумын да Марий АССР Кӱшыл Каҥаш Президиумын чаптаныкше-влак дене, Марий Эл Республикын Чаптаныкше дене палемдалтын.

2015 ий пургыж тылзын 15-ше кечынже Йошкар-Олаште колен.

Чаплӱм да суаптар

• Марий Эл Республикын Советский районысо чапланыше гражданинже (2000)
• «Почёт пале» орден-влак (1966, 1971)
• Ачамланде сар орден (06.04.1985)
• Маршал Жуковын III степенян орденже (2003)
• «Сарзылык суаплан» медаль (06.11.1944)
• «1941—1945 ийласе Кугу Ачамланде сарыште Германийым сеҥымылан» медаль (09.05.1945)
• «Чапле пашалан. Владимир Ильич Ленинын шочмыжлан 100 ий темме лӱмеш» лӱмгече медаль
• РСФСР Кӱшыл Каҥаш Президиумын Чаптаныкше (1965)
• Марий АССР Кӱшыл Каҥаш Президиумынын Чаптаныкше (1970, 1980)
• Марий Эл Республикын Чаптаныкше (2000)

Палемдымаш

Литератур

• Андреев В. П. Страницы истории развития промышленности Марийской АССР (1945―1980 гг.) / В. П. Андреев; Мар. гос. техн. ун-т. ― Йошкар-Ола: Мар. гос. техн. ун-т, 1999. ― 129, [1] с.: ил., карт., портр.; 20 см; ISBN 5-8158-0051-1.
• Воронцов Павел Степанович // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 80. — 2032 экз. — ISBN 5-87898-357-0.
• Краснов П. В., Мочаев В. А. Воронцов Павел Степанович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 90. — 606 с. — 1500 экз. — ISBN 978-5-905314-35-3.