Тимофеев, Василий Кириллович

РУВИКИ — эрыкан энциклопедий гыч материал
РУВИКИ-ште тыгай тукымлӱм дене вес еҥ нерген статьям лудаш лиеш: Тимофеев.
Василий Кириллович Тимофеев
Художник Тимофеев Василий Кириллович.jpg
Шочмо кече 1 шорыкйол 1891(1891-01-01)
Шочмо вер
Колымо кече 29 пеледыш 1968(1968-06-29) (77 ий)
Колымо вер
Гражданстве  СССР
Жанр жанровый живопись, портрет, пейзаж
Тунеммаш Озаҥ художественный школ
Стиль реализм
Награде Татар АССР сымыктышын сулло пашаеҥже

Василий Кириллович Тимофеев (1 шорыкйол 1891, Осинки[d], Вязники уезд[d], Владимир губерний[d], Россий империй — 29 пеледыш 1968, Озаҥ, Татар Автоном Совет Социалистик Республик, РСФСР[d], СССР) — руш да совет живописец, график да педагог, Юл кундем калык-влакын профессионал сӱретсымыктышыштым негызлыше-влак кокла гыч иктыже, Татарстанын, Марий Элын да Чувашийын художественный школыштын шочмышкышт кугу надырым пыштыше[1]. Революцийлык Россий сӱретче-влак ассоциацийын (АХРР-ын) Татар пӧлкажын организаторжо да икымше председательже (1923). Татар АССР сымыктышын сулло пашаеҥже (1940). СССР сӱретче-влак ушемын йыжъеҥже (1936).

Илыш корно

1891 ий 1 январьыште Владимир губернийысе Вязники уездын Осинки ялыште шочын[2].

1900—1904 ийлаште черке приход школышто, 1904—1908 ийлаште — Владимир губернийысе Мстёра селаште П. Ф. Бессонов ден М. К. Евлампиевын юмоҥам сӱретлыме мастаргудыштышт тунемын[3].

1915 ийыште Озаҥысе художественный школым  (руш.) (мар. тунем лектын. Тунем пытарыме деч вара да 1961 ий марте, жапын-жапын канышыш лектын, тушто туныктен (варажым — Озаҥысе художественный училище)[1]. Икымше тӱнямбал сарын  (руш.) (мар. участникше лийын[1]. 1919—1925 ийлаште Озаҥыште «Тӱҥ мастаргудо-влакым» вуйлатен.

Тудын тунемшыже-влак коклаште — В. А. Бадюль, Н. А. Бикташев, К. К. Васильев, Р. А. Кильдибеков, С. О. Лывин, Ю. Б. Лысогорский, А. Н. Мазитов, Е. А. Симбирин, Э. Г. Ситдиков да молат. Чыланат республикысе да элысе сӱретсымыктышыште келге кышам коденыт[3].

1923 ийыште Тимофеев Революцийлык Россий сӱретче-влак ассоциацийын (АХРР-ын)  (руш.) (мар. Татар филиалжым почаш тӱҥалтышым пыштен да тудын икымше председательже лийын[4]. Усталык паша дене пырля чолга туныктымо да мер пашам вӱден: Ласточкина лӱмеш соҥгыра да ойлен моштыдымо йоча-влакын школышто туныктен (1915—1919), «Йошкар Татарий», «У ял», «Ильичын корныжо» газет-влакын редакцийлаштышт сӱретче семын пашам ыштен[5]. Москошто Пӱтынь Совет Ушемысе ялозанлык ончерыште Татар АССР-ын павильонжым сӧрастарыше-влак кокла гыч иктыже лийын (1936)[3].

1925 ий гыч виктерын кӱштымыж почеш икмыняр ий жапыште Марий автоном областьыште пашам ыштен, марий калыкын илышыжым да йӱлажым шымлен. 1927 ийыште кундемысе тоштерын директоржо Т. Е. Евсеевын ӱжмыж почеш художественный да этнографий материалым погаш экспедицийым эртарен, тудын лектышыже семын марий ялын илыш-йӱлажым почын пуышо ойыртемалтше сӱрет серий лектын[6].

1934—1937 ийлаште Чуваш АССР-ыште пашам ыштен, туштат индустриализаций жапысе республикын илышыжлан пӧлеклалтше кумда произведений циклым ыштен. Чуваш совет сӱретче-влакын 1-ше погыныштын делегат лийын, Алатырьысе художественный-гравёрный училищыште туныктен (1935—1936)[1]. 1935 ийыште «Татхудожник» кооператив товариществын организаторжо лийын[1].

1936 ийыште СССР сӱретче-влак ушемын  (руш.) (мар. йыжъеҥже лийын. 1940 ийыште тудлан «Татар АССР сымыктышын сулло пашаеҥже» чаплӱмым пуымо[6].

1909 ий гыч ончер-влакын участникше. 1968 ий 29 июньышто Озаҥыште колен[1].

Шинчымаш

Василий Тимофеев профессионал художественный шинчымашым Озаҥысе художественный школышто налын, тудым 1915 ийыште тунем пытарен. Туныктышыжо-влак палыме педагог да живопись мастар-влак лийыныт: Г. А. Медведев, П. П. Беньков, Н. И. Фешин да И. А. Денисов[2]. Лач нунын деч тудо реалистический школын йӱлажым налын да варажым шкенжын усталык да туныктымо практикыштыже вияҥден[5].

Усталык

В. К. Тимофеевын усталык поянлыкше кумда да шуко тӱрлӧ жанран[2][3]:

  • 1920 ийла мучаште Озаҥыште заводышто пашам ыштыме нерген теме лектеш: «В. И. Ленин лӱмеш коваште завод», «Спартак» йолчием фабрике", тыгак Озаҥысе коваште фабрикын цехлаштыже возымо этюд цикл (1929—1931);
  • 1930 ийла тӱҥалтыш гыч революционный, историй да сарзе теме-влак почеш радына-влакым возаш тӱҥалеш: «ТАССР колхозышто мландым курымешлан кучылташ пуымо акт лӱмеш митинг» («Митинг в колхозе ТАССР по поводу вручения акта на вечное пользование землёй»), 1937—1938; «В. И. Ленинын ТАССР-ым ыштыме нерген декретеш кидпалым пыштымыже», («Подписание В. И. Лениным Декрета об образовании ТАССР») 1941 (сӱретым мучашлыме огыл); «М. И. Калинин колхозник-влак коклаште» («М. И. Калинин среди колхозников»), 1941; «Совинформбюрон сводкыжым колыштыт» («Слушают сводку Совинформбюро»), 1942; «1920 ийыште ТАССР-ым пайремлын увертарымаш» («Торжественное провозглашение ТАССР в 1920 году»), 1943; «Озаҥыште Сеҥымаш кече» («День Победы в Казани»), 1945; «1887 ийыште Озаҥ университетыште студент-влакын погынымашышт» («Студенческая сходка в Казанском университете в 1887 году»), 1950);
  • йӧнозанлык да колхоз паша теме: «Кӱварым чоҥымаште» («На строительстве моста»), 1934; «Бригаде-влакын социалистик таҥасымашышт» («Социалистическое соревнование бригад»), «Чувашийыште корно-влакым чоҥымаш» («Строительство дорог в Чувашии»), коктыжат — 1935; «М. Вахитов лӱмеш колхозышто» («В колхозе имени М. Вахитова»), 1956 да молат;
  • кугыжаныш да историй пашаеҥ-влакын, тӱвыра аланыште тыршыше-влакын портретышт, тыгак жанр портрет-влак: «Шоҥго суас» («Старик-татарин»), иктаж 1915 ий; «Автопортрет», 1920 ийла; «ТАССР Совнаркомын председательже Мухтаров йолташ» («Предсовнаркома ТАССР товарищ Мухтаров»), 1923; сӱретче-влак М. М. Васильеван, 1925, Е. К. Частихинын, 1926, В. А. Бадюльын, 1945, Н. И. Фешинын, 1960, искусствовед-влак П. М. Дульскийын, П. Е. Корниловын, коктыжат — 1945, композитор Н. Г. Жигановын, 1944 портретышт; 1-ше Татар стрелковый дивизийын командирже ден сарзыеҥ-влакшын портрет циклышт, 1933—1938);
  • пейзаж-влак: «Казанка», 1917; «Алатырь», 1935; «Куженерка ял» («Деревня Куженерка»), 1940; «Юл Васильево воктене» («Волга у Васильево»), 1945; «Кокушкино ялыште В. И. Ленинын пӧрт-тоштерже» («Дом-музей В. И. Ленина в деревне Кокушкино»), 1956; «Подлужный урем. Озаҥ» («Улица Подлужная. Казань»), 1964; Туркестанлан пӧлеклалтше этюд цикл («Самарканд», «Тошто олан лукшо» («Уголок старого города»), «Туркестаныште пазар» («Базар в Туркестане»), 1921 ийыште Кокла Азийыш коштын толмо почеш);
  • графике портрет-влак, тӱҥ шотышто 1930 ийлаште карандаш да сангина дене ыштыме: «Ӱдырамаш портрет» («Женский портрет»), «Хади Такташ», коктыжат — 1930; «Комиссар Маликов йолташ» («Комиссар товарищ Маликов»), 1932; «Парашютисткын портретше» («Портрет парашютистки»), 1937; «Натурщице» («Натурщица»), 1940 да молат.

Тудын поянлыкыштыже Марий да Чуваш республиклаште ыштыме этнографий цикл-влак тӱҥ верым налын шогат. Тудо материальный культурлан кумылан лийынат, шӱртым шӱдырымӧ, куэмым куымо, тӱрлымӧ пашам, калыкле вургемын ойыртемжым да ял паша сӱрет-влакым радамлын палемден коден[6]. 1929 ийыште Москошто АХРР-ын ончерыштыже тудын «Марий сӱан» сӱретше кумшо верым налын[6].

Чувашийыште пашам ыштымыж годым тудо социалистик чоҥымо пашам ончыктышо радына-влак серийым ыштен: «Козловка комбинатыште бригаде-влакын соцтаҥасымашышт» («Соцсоревнование бригад в Козловском комбинате») (1934-35), «Чувашийыште корным чоҥымаш» («Строительство дорог в Чувашии») (1935), тыгак лирике сынан пейзаж-влакым («Шыже Сура эҥерыште» («Осень на реке Суре»), 1936) да портрет-влакым («Леваш воктене: А. А. Эпштейнын портретше» («У беседки: портрет А. А. Эпштейн»), 1934)[1].

Ойырен налме паша-влак

  • 1918 ий — «М. И. Савинан портретше» («Портрет Савиной М. И.») (холст, ӱян чия; Республикысе сӱретсымыктыш тоштер, Йошкар-Ола)[7];
  • 1923 ий — «Картон мастаргудо» («Картонажная мастерская») (картон, ӱян чия; Республикысе сӱретсымыктыш тоштер, Йошкар-Ола)[8];
  • 1926 ий — «Марий пӧртын кӧргӧ сӱретше» («Внутренний вид марийской избы») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[9];
  • 1926 ий — «Марий ӱдырамаш-влак пайрем вургем дене» («Женщины-марийки в праздничном наряде») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[10];
  • 1926 ий — «Марий ӱдырамаш-влак вынерым ямдылыме годым» («Марийские женщины за изготовлением холста») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[11];
  • 1926 ий — «Калык семмастар» («Народный музыкант») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[12][прим 1];
  • 1927 ий — «Кастене пошкудо вате дене» («Вечером у соседки») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[13];
  • 1927 ий — «Марий чоҥышын сӱретше» («Вид марийской постройки») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[14];
  • 1927 ий — «Шем пӧртын кӧргӧ сӱретше» («Внутренний вид курной избы») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[15];
  • 1927 ий — «Марий пӧртын кӧргӧ сӱретше» («Внутренний вид марийской избы») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[16];
  • 1927 ий — «Терысым шупшыктымаш» («Вывозка навоза») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[17];
  • 1927 ий — «Кишым шолтен лукмаш» («Гонка смолы») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[18];
  • 1927 ий — «Карман курык» («Гора Карман-Курык») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[19];
  • 1927 ий — «Кӱслезе П. Т. Терентьев» («Гусляр П. Т. Терентьев») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[20];
  • 1927 ий — «Ялысе пейзаж» («Деревенский пейзаж») («Тошто марий ял» («Старая марийская деревня») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[21];
  • 1927 ий — «Тӱредме жап» («Жатва») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[22];
  • 1927 ий — «Марий ӱдырамаш-влак йытыным ямдылыме годым» («Женщины-марийки за обработкой льна») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[23];
  • 1927 ий — «Марий ӱдырамаш-влак кидпашам ыштыме годым» («Женщины-марийки за рукоделием») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[24];
  • 1927 ий — «Кудо» (кеҥеж пӧрт) (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[25];
  • 1927 ий — «Марий ӱдырамаш кылта дене» («Марийка со снопом») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[26];
  • 1927 ий — «Марий ӱдырамаш» («Марийская женщина») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[27];
  • 1927 ий — «Шийме жап» («Молотьба») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[28];
  • 1927 ий — «Пошкудо вате деке пурен лектым» («Навестила соседку») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[29];
  • 1927 ий — «Вынерым ямдылымаш» («Обработка холста») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[30];
  • 1927 ий — «Краж омартан мӱкшотар» («Пасека колодных ульев») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[31];
  • 1927 ий — «Кишым шолтен лукшо завод» («Смолокуренный завод») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[32];
  • 1927 ий — «Шоҥго марий» («Старик-мариец») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[33];
  • 1927 ий — «Пӧртӧнчылан марий пӧртын сӱретше» («Типичный вид марийской избы с крыльцом») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[34];
  • 1928 ий — «Агарме вакшын кӧргӧ сӱретше» («Внутренний вид паровой мельницы») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[35];
  • 1928 ий — «Агарме вакшын кӧргӧ сӱретше. Йошкар-Ола» («Внутренний вид паровой мельницы. г. Йошкар-Ола») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[36];
  • 1928 ий — «Марий комсомол ӱдыр» («Комсомолка-мари») (этюд; холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[37];
  • 1928 ий — «Вӱд дене шала пырням волтымаш» («Сплав моли») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[38];
  • 1929 ий — «Какшан эҥер серыште вӱд станций» («Водная станция на берегу реки Кокшаги») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[39];
  • 1929 ий — «Шӱйшеран ӱдырамашын портретше» («Портрет женщины с бусами») (холст, ӱян чия; Республикысе сӱретсымыктыш тоштер, Йошкар-Ола)[40];
  • 1929 ий — «Колхозникын портретше» («Портрет колхозника») (холст, ӱян чия; Чыкмасе тӱвыра-историй тоштер комплекс)[41];
  • 1929 ий — «Колхозникын портретше» («Портрет колхозника») (холст, ӱян чия; Чыкмасе тӱвыра-историй тоштер комплекс)[42];
  • 1930 ий — «Коваште завод» («Кожевенный завод») (холст, ӱян чия; Чыкмасе тӱвыра-историй тоштер комплекс)[43];
  • 1930 ий — «Корья шелтык» («Разлом корья») (холст, ӱян чия; Чыкмасе тӱвыра-историй тоштер комплекс)[44];
  • 1934 ий — «Лопатино ялыште чодыразавод» («Лесозавод в Лопатино») (холст, ӱян чия; Марий Эл Республикысе Т. Евсеев лӱмеш калыкле тоштер, Йошкар-Ола)[45];
  • 1935 ий — «Сӱретлан этюд. Шыже. Алатырь ола тӱр» («Этюд к картине. Осень. Окраина г. Алатыря») (холст, ӱян чия; Алатырьысе краеведений тоштер)[46];
  • 1937 ий — «Пулемётым тунеммаш» («Изучение пулемета») (холст, ӱян чия; Сарзе вургем формо историй тоштер, Моско)[47];
  • 1939 ий — «Юрино кожкомбинатын отмочный цехше» («Отмочный цех Юринского кожкомбината») (холст, ӱян чия; Чыкмасе тӱвыра-историй тоштер комплекс)[48];
  • 1939—1940 ийла — «Юлышто» («На Волге») (холст, ӱян чия; Республикысе сӱретсымыктыш тоштер, Йошкар-Ола)[49];
  • 1945 ий — «Татарийыште Совет властьым увертарымаш» («Провозглашение Советской власти в Татарии») (холст, ӱян чия; РТ ГМИИ, Озаҥ)[50];
  • 1947 ий — «В. Поссет-Смирнова артисткын портретше» («Портрет артистки В. Поссет-Смирновой») (холст, ӱян чия; РТ ГМИИ, Озаҥ)[51];
  • 1950 ий — «Этюд. Кече дене волгалтше ӱдырамаш» («Этюд. Женщина, освещённая солнцем») (холст, ӱян чия; Чыкмасе тӱвыра-историй тоштер комплекс)[52];
  • 1951—1952 ийла — «Танайка селаште партизан-влакым лӱен пуштмаш» («Расстрел партизан в селе Танайка») (холст, ӱян чия; РТ ГМИИ, Озаҥ)[53];
  • 1956—1966 ийла — «Йошкар кофтан ӱдыр-йочан портретше» («Портрет девочки в красной кофте») (холст, ӱян чия; Республикысе сӱретсымыктыш тоштер, Йошкар-Ола)[54];
  • 1962 ий — «„Озаҥ оласе 62-шо №-ан школын латикымше класс тунемшыже Наталия Маркован портретше“ сӱретлан этюд» («Этюд к картине „Портрет одиннадцатиклассницы Марковой Наталии школа № 62 г. Казань“») (картон, ӱян чия; Алатырьысе краеведений тоштер)[55];
  • 1963—1965 ийла — «Ӱдырамашын портретше» («Портрет женщины») (холст, ӱян чия; Республикысе сӱретсымыктыш тоштер, Йошкар-Ола)[56].

Ончер-влак

  • 1929 — АХРР-ын ончерже (Моско), «Марий сӱан» паша 3-шо верым налын[6].
  • 1956 — Озаҥыште «Усталык да туныктымо пашалан 40 ий» персонло ончер[57].
  • 2006 — «Татарстанын живописьыштыже реализм шӱлышан йӱла-влак: Тимофеев Василий Кириллович (1891—1968)» шочмыжлан 115 ий темме лӱмеш «Хазинэ» калыкле сымыктыш галерейыште (Озаҥ)[2].
  • 2011 — Шочмыжлан 120 ий темме лӱмеш ончер «Хазинэ» галерейыште[58].
  • 2016—2017 — Шочмыжлан 125 ий темме лӱмеш кугу лӱмгече ончер «Хазинэ» НХГ-ште (Озаҥ). Икымше гана Марий Эл Республикын Калыкле тоштержын погышкыжо пурышо 40 утла произведенийым ончыктымо[4][5].

Пагалымаш да суаптар-влак

  • СССР сӱретче-влак ушемын йыжъеҥже (1936 ий гыч)[6];
  • Татар АССР сымыктышын сулло пашаеҥже (1940)[6];
  • АХРР-ын Татар пӧлкажын организаторжо да икымше председательже (1923)[4];
  • Чуваш совет сӱретче-влакын 1-ше погыныштын делегатше[1].

Тоштер пого-влак

В. К. Тимофеевын произведенийже-влак российысе да йот элласе тоштерлаште аралалтыт:

Палемдымаш

  1. ↑ 1 2 3 4 5 6 7 8 Головченко Н.П. Тимофеев Василий Кириллович // Чувашская энциклопедия. — Чебоксары: Чувашское книжное издательство, 2011. — Т. 4.
  2. ↑ 1 2 3 4 Творчество художника вновь открывается широкому зрителю. Министерство культуры Республики Татарстан (24 шыжа 2006). Тергыме кече: 6 вӱдшор 2026.
  3. ↑ 1 2 3 4 Тимофеев Василий Кириллович (руш.). tatarica.org. Тергыме кече: 1 вӱдшор 2026.
  4. ↑ 1 2 3 4 5 Выставка В.К. Тимофеева к 125-летию. ГМИИ РТ. Тергыме кече: 6 вӱдшор 2026. Архивлыме 12 ага 2021 ий.
  5. ↑ 1 2 3 Выставка В.К. Тимофеева. Культура.РФ. Тергыме кече: 6 вӱдшор 2026.
  6. ↑ 1 2 3 4 5 6 7 8 9 10 11 12 125 лет художнику В.Т. Тимофееву. Республиканский центр марийской культуры (30 теле 2015). Тергыме кече: 6 вӱдшор 2026. Архивлыме 6 вӱдшор 2026 ий.
  7. ↑ Портрет Савиной М.И. Государственный каталог Музейного фонда Российской Федерации. Тергыме кече: 6 вӱдшор 2026.
  8. ↑ Картонажная мастерская. Государственный каталог Музейного фонда Российской Федерации. Тергыме кече: 6 вӱдшор 2026.
  9. ↑ Внутренний вид марийской избы. Государственный каталог Музейного фонда Российской Федерации. Тергыме кече: 6 вӱдшор 2026.
  10. ↑ Женщины-марийки в праздничном наряде. Государственный каталог Музейного фонда Российской Федерации. Тергыме кече: 6 вӱдшор 2026.
  11. ↑ Марийские женщины за изготовлением холста. Государственный каталог Музейного фонда Российской Федерации. Тергыме кече: 6 вӱдшор 2026.
  12. ↑ Народный музыкант. Государственный каталог Музейного фонда Российской Федерации. Тергыме кече: 6 вӱдшор 2026.
  13. ↑ Вечером у соседки. Государственный каталог Музейного фонда Российской Федерации. Тергыме кече: 6 вӱдшор 2026.
  14. ↑ Вид марийской постройки. Государственный каталог Музейного фонда Российской Федерации. Тергыме кече: 6 вӱдшор 2026.
  15. ↑ Внутренний вид курной избы. Государственный каталог Музейного фонда Российской Федерации. Тергыме кече: 6 вӱдшор 2026.
  16. ↑ Внутренний вид марийской избы. Государственный каталог Музейного фонда Российской Федерации. Тергыме кече: 6 вӱдшор 2026.
  17. ↑ Вывозка навоза. Государственный каталог Музейного фонда Российской Федерации. Тергыме кече: 6 вӱдшор 2026.
  18. ↑ Гонка смолы. Государственный каталог Музейного фонда Российской Федерации. Тергыме кече: 6 вӱдшор 2026.
  19. ↑ Гора Карман-Курык. Государственный каталог Музейного фонда Российской Федерации. Тергыме кече: 6 вӱдшор 2026.
  20. ↑ Гусляр П.Т. Терентьев. Государственный каталог Музейного фонда Российской Федерации. Тергыме кече: 6 вӱдшор 2026.
  21. ↑ Деревенский пейзаж (Старая марийская деревня). Государственный каталог Музейного фонда Российской Федерации. Тергыме кече: 6 вӱдшор 2026.
  22. ↑ Жатва. Государственный каталог Музейного фонда Российской Федерации. Тергыме кече: 6 вӱдшор 2026.
  23. ↑ Женщины-марийки за обработкой льна. Государственный каталог Музейного фонда Российской Федерации. Тергыме кече: 6 вӱдшор 2026.
  24. ↑ Женщины-марийки за рукоделием. Государственный каталог Музейного фонда Российской Федерации. Тергыме кече: 6 вӱдшор 2026.
  25. ↑ Кудо (летняя изба). Государственный каталог Музейного фонда Российской Федерации. Тергыме кече: 6 вӱдшор 2026.
  26. ↑ Марийка со снопом. Государственный каталог Музейного фонда Российской Федерации. Тергыме кече: 6 вӱдшор 2026.
  27. ↑ Марийская женщина. Государственный каталог Музейного фонда Российской Федерации. Тергыме кече: 6 вӱдшор 2026.
  28. ↑ Молотьба. Государственный каталог Музейного фонда Российской Федерации. Тергыме кече: 6 вӱдшор 2026.
  29. ↑ Навестила соседку. Государственный каталог Музейного фонда Российской Федерации. Тергыме кече: 6 вӱдшор 2026.
  30. ↑ Обработка холста. Государственный каталог Музейного фонда Российской Федерации. Тергыме кече: 6 вӱдшор 2026.
  31. ↑ Пасека колодных ульев. Государственный каталог Музейного фонда Российской Федерации. Тергыме кече: 6 вӱдшор 2026.
  32. ↑ Смолокуренный завод. Государственный каталог Музейного фонда Российской Федерации. Тергыме кече: 6 вӱдшор 2026.
  33. ↑ Старик-мариец. Государственный каталог Музейного фонда Российской Федерации. Тергыме кече: 6 вӱдшор 2026.
  34. ↑ Типичный вид марийской избы с крыльцом. Государственный каталог Музейного фонда Российской Федерации. Тергыме кече: 6 вӱдшор 2026.
  35. ↑ Внутренний вид паровой мельницы. Государственный каталог Музейного фонда Российской Федерации. Тергыме кече: 6 вӱдшор 2026.
  36. ↑ Внутренний вид паровой мельницы. г. Йошкар-Ола. Государственный каталог Музейного фонда Российской Федерации. Тергыме кече: 6 вӱдшор 2026.
  37. ↑ Комсомолка-мари. Государственный каталог Музейного фонда Российской Федерации. Тергыме кече: 6 вӱдшор 2026.
  38. ↑ Сплав моли. Государственный каталог Музейного фонда Российской Федерации. Тергыме кече: 6 вӱдшор 2026.
  39. ↑ Водная станция на берегу реки Кокшаги. Государственный каталог Музейного фонда Российской Федерации. Тергыме кече: 6 вӱдшор 2026.
  40. ↑ Портрет женщины с бусами. Государственный каталог Музейного фонда Российской Федерации. Тергыме кече: 6 вӱдшор 2026.
  41. ↑ Портрет колхозника. Государственный каталог Музейного фонда Российской Федерации. Тергыме кече: 6 вӱдшор 2026.
  42. ↑ Портрет колхозника. Государственный каталог Музейного фонда Российской Федерации. Тергыме кече: 6 вӱдшор 2026.
  43. ↑ Кожевенный завод. Государственный каталог Музейного фонда Российской Федерации. Тергыме кече: 6 вӱдшор 2026.
  44. ↑ Разлом корья. Государственный каталог Музейного фонда Российской Федерации. Тергыме кече: 6 вӱдшор 2026.
  45. ↑ Лесозавод в Лопатино. Государственный каталог Музейного фонда Российской Федерации. Тергыме кече: 6 вӱдшор 2026.
  46. ↑ Этюд к картине. Осень. Окраина г. Алатыря. Государственный каталог Музейного фонда Российской Федерации. Тергыме кече: 6 вӱдшор 2026.
  47. ↑ Изучение пулемета. Государственный каталог Музейного фонда Российской Федерации. Тергыме кече: 6 вӱдшор 2026.
  48. ↑ Отмочный цех Юринского кожкомбината. Государственный каталог Музейного фонда Российской Федерации. Тергыме кече: 6 вӱдшор 2026.
  49. ↑ На Волге. Государственный каталог Музейного фонда Российской Федерации. Тергыме кече: 6 вӱдшор 2026.
  50. ↑ Провозглашение Советской власти в Татарии. Государственный каталог Музейного фонда Российской Федерации. Тергыме кече: 6 вӱдшор 2026.
  51. ↑ Портрет артистки В. Поссет-Смирновой. Государственный каталог Музейного фонда Российской Федерации. Тергыме кече: 6 вӱдшор 2026.
  52. ↑ Этюд. Женщина, освещенная солнцем. Государственный каталог Музейного фонда Российской Федерации. Тергыме кече: 6 вӱдшор 2026.
  53. ↑ Расстрел партизан в селе Танайка. Государственный каталог Музейного фонда Российской Федерации. Тергыме кече: 6 вӱдшор 2026.
  54. ↑ Портрет девочки в красной кофте. Государственный каталог Музейного фонда Российской Федерации. Тергыме кече: 6 вӱдшор 2026.
  55. ↑ Этюд к картине "Портрет одиннадцатиклассницы Марковой Наталии школа № 62 г. Казань". Государственный каталог Музейного фонда Российской Федерации. Тергыме кече: 6 вӱдшор 2026.
  56. ↑ Портрет женщины. Государственный каталог Музейного фонда Российской Федерации. Тергыме кече: 6 вӱдшор 2026.
  57. ↑ Выставка произведений художника В. К. Тимофеева = Василий Кириллович Тимофеев: 40 лет творческой и педагогической деятельности: каталог. — Казань, 1956.
  58. ↑ Василий Кириллович Тимофеев: выставка к 120-летию со дня рождения. Art16.ru (19 идым 2011). Тергыме кече: 6 вӱдшор 2026.
  1. ↑ Источникыште колымо ийыште опечатке: «1891-1868».

Литератур

  • Выставка произведений художника В. К. Тимофеева = Василий Кириллович Тимофеев: 40 лет творческой и педагогической деятельности: каталог. — Казань, 1956. — 17, [5] с., [12] л. ил. с.
  • Головченко Н.П. Тимофеев Василий Кириллович // Чувашская энциклопедия. — Чебоксары: Чувашское книжное издательство, 2011. — Т. 4 (Си-Я).
  • Василий Кириллович Тимофеев: К 120-летию со дня рождения: буклет. — Казань: ГМИИ РТ, 2011.
  • Хисамова Д. Летописец эпохи и народов Поволжья // Казанские ведомости : газета. — 2016. — 25 ноябрь.

Кылвер-влак

"https://mhr.ruwiki.ru/w/index.php?title=Тимофеев,_Василий_Кириллович&oldid=1225789" гыч налме