Тимиркаев, Анатолий Тимиршинович

Анатолий Тимиршинович Тимиркаев
Шолыплӱм-влак	А. Миркаев, Т. Анатольев, Тими Тим, Тим Толин
Шочмо кече	2 шорыкйол 1952(1952-01-02) (74 ий)
Шочмо вер	Шоръял, Краснохолм ял шотан илем[d], Калтаса кундем, Башкир Автоном Совет Социалистик Республик, РСФСР, СССР
Гражданстве	СССР →  Россий
Паша сомыл	писатель, поэт, кусарыше
Усталык ий-влак	1965 — к. ж. марте
Жанр	почеламут, поэме, кусарымаш
Произведений йылме	марий
Дебют	«Чодыраште» (1963)
Премий	Марий Эл Республикын кугыжаныш премийже (1999) Олык Ипай лӱмеш Марий комсомол премий (1984)
Награде	Марий Эл Республикын калык поэтше (2012) Марий Эл Республикысе тӱвыран сулло пашаеҥже (1997) Марий Эл Республикын чаптаныкше (1994)

Анатóлий Тимирши́нович Тимиркáев (шоч. 2 шорыкйол 1952, Шоръял, Башкир Автоном Совет Социалистик Республик) — марий совет да россий поэт, кусарыше, журналист, редактор, СССР серызе-влак ушемын да СССР журналист-влак ушемын йыжыҥъеҥже. «Ончыко» журналын тӱҥ редакторжо (1988—2016). Марий Эл Республикысе серызе-влак ушемысе вуйверын йыжыҥъеҥже (1988 ий гыч). Марий Эл Республикын калык поэтше (2012). Марий Эл Республикысе тӱвыран сулло пашаеҥже (1997). Марий Эл Республикысе Олык Ипай лӱмеш Марий комсомол премийын (1984), С. Чавайн лӱмеш кугыжаныш премийын лауреатше (1999).

Илыш корныжо

1952 ий 2 январьыште Пошкырт кундем Калтаса вел Шоръял ялысе кресаньык ешеш шочын.

1969 ийыште, Краснохолм кыдалаш школым тунем пытарымеке, Нефтекамск олан 47 №-ан техник училищышкыже тунемаш пурен, тушто нефть ден газым тулышо оператор пашалан шинчымашым налын.

Но 1970 ийыште Йошкар-Оласе Н. К. Крупская лӱмеш Марий кугыжаныш педагогике институтын историй-филологий факультетышкыже тунемаш пурен. Тыште мер пашаш чолган ушнен: факультетын комсомол бюрожын йыжыҥъеҥжылан сайлалтын, институтысо сылнымут кружокын старостыжо лийын, Юл кундемысе студент сылнымут фестивальлаште чолгалыкым ончыктен. Тиде институтым 1975 ийыште тунем пытарен.

1975 ий сентябрьыште Марий книга савыктышын редакторжо лийын.

1976—1977 ийлаште Совет Армий радамыште служитлен.

1977 ийыште, мӧҥгыжӧ пӧртылмеке, — тунемме-методике, сылнымут да йоча книгам лукшо редактор, Марий книга савыктышын кугурак редакторжо.

1988—2016 ийлаште — «Ончыко» журналын тӱҥ редакторжо.

Кызыт Йошкар-Олаште ила.

Сылнымут пашаже

Киябак 8-ияш школын 8-ше классыштыже тунеммыж годым, 1965 ий августышто, «Заря» район газетыште «Кеҥежым кастене» икымше почеламутшым савыктен. «Ямде лий» йоча газетын конкурслаштыже кок гана лауреат лийын.

Марла 7 книгам да рушла 2 книгам савыктен. «Шошо пӧлек» да «Ӱмыр шырка» икымше книгаже-влаклан М. Казаков, А. Васинкин, А. Хузангай, С. Манаева да молат кӱкшӧ акым пуэныт. 2022 ийыште поэтлан 70 ий темме лӱмеш «О, тый мыйын эрвел марий муро!» сборникше савыкталтын.

Усталык пашажын тӱҥ темыже — шочмо пӱртӱсын сылнылыкше, кызытсе айдемын чоншӱлыш тӱняже.

А. Тимиркаевын почеламутшо-влак рӱдӧ периодике савыктышлаште да тӱшка аршашлаште савыкталтыныт, руш, украин, татар, чуваш, одо да мордва йылмылашке кусаралтыныт. Шочмо йылмыш руш, белорус, украин, татар, чуваш, пошкырт (М. Карим, С. Юлаев), одо, мордва, манси, бурят, чечен прозаик ден поэт-влакын произведенийлаштым кусарен. 1999 ийыште икымше гана А. С. Пушкинын «Евгений Онегин» почеламутан романым кусарен да «Ончыко» журналыште савыктен.

Тудо тыгак курыкмарий серызе Н. Игнатьевын «Туан сӓндӓлӹк» романжым, «Тошты кода» повестьшым, «Улып» чуваш эпос гыч ужашым кусарен.

Урал да Касвел Сибирьысе самырык серызе-влакын кундемысе совещанийыштышт (Пермь, 1976), VIII Пӱтынь ушемысе самырык серызе-влакын совещанийыште (Москва, 1979), икмыняр Калык-влак кокласе финн-угор серызе-влакын конгрессыште, РСФСР-ын серызе-влак ушемын погынышто делегат лийын.

1979 ийыште СССР журналист-влак ушемыш, а 1985 ийыште СССР серызе-влак ушемыш пурен. 1988 ий гыч — Марий Эл Республикысе серызе-влак ушем вуйверын йыжыҥъеҥже.

1992—1997 ийлаште Марий Эл Республикын Президентше В. М. Зотин пелен чумырымо Мер палатын еҥже да МЭР-ын Президентше пелен кугыжаныш йылме-влак шотышто комиссийын йыжыҥъеҥже лийын.

А. Миркаев, Т. Анатольев, Тими Тим, Тим Толин шоялӱм-влак дене воза.

Чаплӱм ден суаптар-влак

• Марий Эл Республикын калык поэтше (2012);
• Марий Эл Республикысе тӱвыран сулло пашаеҥже (1997);
• «Пашан ветеранже» медаль;
• С. Чавайн лӱмеш Марий Эл Республикын Кугыжаныш премийже (1999) — А. Пушкинын «Евгений Онегин» романжым марлаш кусарымылан;
• Олык Ипай лӱмеш марий комсомол премий (1984) — «Родные звёзды» почеламут сборникшылан;
• Марий Эл Республикын Чаптаныкше (1994);
• Марий Эл Республикысе Кугыжаныш Погынын Чаптаныкше (2006, 2012).

Тӱҥ произведений-влак

А. Тимиркаевын марла да рушла тӱҥ произведенийже-влак:

Марла

• Шошо пӧлек: почеламут-влак [Подарок весны: стихи]. Йошкар-Ола, 1978. 48 с.
• Ӱмыр шырка: почеламут-влак [Цветы жизни: стихи|. Йошкар-Ола, 1981. 72 с.
• Шун шӱшпык: почеламут, баллада, поэма [Глиняный соловей: стихи, баллада, поэмы]. Йошкар-Ола, 1988. 144 с.
• Лумтӱрчача: почеламут, поэма-влак [Подснежники: стихи и поэмы]. Йошкар-Ола, 1995. 144 с.
• Аваэл: почеламут, поэме, кусарыме сылнымут [Родина: стихи, поэма, переводы]. Йошкар-Ола, 2003. 128 с.
• Нӓл подаркам йӹлерӓк: лыдышвлӓ : [0+] / Анатолий Тимиркаев; [алык марла гӹц Виталий Петухов сӓрен]. Йошкар-Ола: Мары книгӓ изд-во, 2016. 20 с.: цв. ил.; 24 см; ISBN 978-5-7590-1143-9

Рушла

• Родные звёзды: стихи / пер. С. Каширина. Йошкар-Ола, 1984. 96 с.
• Стихи / пер. С. Каширина // Середина земли родной. М., 1987. С. 326—332.
• Огниво: стихи, баллады, поэмы / пер. С. Каширина. Йошкар-Ола, 1991. 192 с.
• Что такое? Кто такой?: стихи для детей / Анатолий Тимиркаев; [ред. Н. В. Лихачёва]; [перевод с марийского]. Йошкар-Ола, 2019. 20 с.
• О ты песня моя восточномарийская!: стихи, поэмы, статьи, рецензии, отзывы, письма, библиографический очерк. О тый мыйын эрвелмарий муро!: почеламут, поэме, статья, рецензий, аклыммут, серыш, библиографический очерк. Йошкар-Ола: Издательский дом «Марийское книжное издательство», 2021. 494 с. ISBN 978-5-7590-1319-8

Палемдымаш

Литератур

• Казаков М. Угыч вашлиймешке // Марий коммуна. 1978. 11 август.
• Хузангай А. Сложить честную песню // Молодой коммунист. 1984. 30 июня.
• Хузангай А. Простая песня // Литературная Россия. 1985. 1 марта.
• Хузангай А. Право на наследство // Дружба народов. 1988. № 9. С. 215—230.
• Ятманов Л. Чтобы честную песню сложить // Лауреаты премии Марийского комсомола имени Олыка Ипая. Йошкар-Ола, 1990. С. 64—74.
• Васин К. Поэтын муро саскаже // Кугарня. 1995. 8 декабрь.
• Ижболдин В. Свой язык у леса и ручья // Марийская правда. 1996. 19 ноября.
• Изилянова В. Заговорил Онегин по-марийски // Марийская правда. 1999. 30 ноября.
• Иванов И. Без песни и дня не прожить // Марийская правда. 2002. 11 январь.
• Галютин Ю. Эрвел шӱмбел // Марий Эл. 2003. 25—26 сентябрь.
• Манаева-Чеснокова С. Гражданская поэзия Анатолия Тимиркаева // Художественный мир современной марийской поэзии. Йошкар-Ола, 2004. С. 131—148.
• Беспалова Г. Е., Васин К. К., Зайниев Г. З. А. Тимиркаев // Писатели Марийской АССР: биобиблиографический справочник / Отв. А. В. Селин. — Йошкар-Ола: Марийское книжное издательство, 1988. — С. 271—274. — 376 с. — 5000 экз.
• Мочаев В. А. Тимиркаев Анатолий Тимиршинович // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 358. — 2032 экз. — ISBN 5-87898-357-0.
• Анатолий Тимиркаев // Писатели Марий Эл: биобиблиографический справочник / Сост. А. Васинкин, В. Абукаев и др. — Йошкар-Ола: Марийское книжное издательство, 2008. — С. 611—613. — 752 с. — 3000 экз. — ISBN 978-5-7590-0966-5.
• Мочаев В. А. Тимиркаев Анатолий Тимиршинович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 437. — 606 с. — 1500 экз. — ISBN 978-5-905314-35-3.
• Тимиркаев Анатолий Тимиршинович // Писатели Марий Эл: биобиблиографический справочник / Сост. Г. Сабанцев, Ю. Соловьёв и др. — Йошкар-Ола: Марийское книжное издательство, 2020. — С. 345—348. — 423 с. — 1000 экз. — ISBN 978-5-7590-1285-6.

Кылвер-влак

• Mari-Lab. Анатолий Тимиркаев.
• Тимиркаев Анатолий Тимиршинович.