Кудрявцев, Иван Сергеевич

РУВИКИ-ште тыгай тукымлӱм дене вес еҥ нерген статьям лудаш лиеш: Кудрявцев.

Иван Сергеевич Кудрявцев
Шочмо кече	1923 ий 25 кылме(1923-11-25)
Шочмо вер	Цибикнур, Медведево район, Марий автоном область, РСФСР, СССР
Колымо кече	29 ага 2009(2009-05-29) (85 ий)
Колымо вер	Самара, Россий
Пурымаш	СССР
Войскан родшо	химический войска
Службо жап	1941—1983
Званий
Командоватлен	47-ше стрелок дивизийын 929-ше посна кыл батальонын химический службыжо дене Юл кундемысе сарзе округын химический войскаже дене
Кредалмаш/сар	Кугу Ачамланде сар
Награде да премий

Иван Сергеевич Кудрявцев (25 кылме 1923, Цибикнур, Марий Автоном Совет Социализм Республик — 29 ага 2009, Самара) ― совет сарзе вуйлатыше. Кугу Ачамланде сар жапыште ― Йӱдвел-Касвел фронтышто химий деч аралалтме 4-ше посна батальонын огнемёт взводшын командирже, 1-ше Украин, 1-ше да 2-шо Белорус фронтлаште 47-ше стрелок дивизийысе 929-ше посна кыл батальонышто химий службын вуйлатышыже, старший лейтенант. Юл кундемысе сарзе округын химический войскажын вуйлатышыже (1973―1983), техник войскан генерал-майоржо (1978). 1945 ий гыч ВКП(б)-ын йыжыҥъеҥже.

Илыш корныжо

1923 ий 25 ноябрьыште кызытсе Марий Элын Медведево район Цибикнур ялыште руш кресаньык ешеш шочын.

1941 ий июньышто РККА-ш налыныт. Кугу Ачамланде сарын участникше: 1942 ийыште Калининысе химий деч аралалтме сарзе училищым тунем пытарен, Йӱдвел-Касвел фронтышто химий деч аралалтме шотышто 4-ше посна батальонын огнемёт взводын командирже, лейтенант; 1-ше Украин, 1-ше да 2-шо Белорус фронтлаште 47-ше стрелок дивизийын 929-ше посна кыл батальонысо химический службын вуйлатышыже, старший лейтенант. 1945 ийыште ВКП(б)-ш пурен.

Сар деч вара сарзе службым шуктен, Мурманскыште, Карелийыште, Калининградыште служитлен. 1957 ийыште Химий деч аралалтме шотышто сарзе академийым тунем пытарен. Дивизийын химический службыжым вуйлатыше, 6-шо да 11-ше гвардий армийлаште химический войскан вуйлатышыже лийын. 1973 ийыште Самарыш илаш куснен: 1973―1983 ийлаште ― Юл кундемысе сарзе округын химический войскажын вуйлатышыже. 1983 ийыште техник войскан генерал-майоржо чаплӱм дене отставкыш лектын.

Мер пашаштат тыршен: 1974 ий гыч Самара олан Ленин районысо Каҥашын депутатшылан сайлалтын. 1993―2005 ийлаште Самара оласе Октябрьский районын Ветеран-влак каҥашым алмашталтде вуйлатен.

Кугу Ачамланде сар жапыште да варасе сарзе службыштыжо I степенян Ачамланде сар, Йошкар Шӱдыр (кок гана), III степенян «СССР Сарзе Вийыште Родинылан служитлымылан», «Чап Тамга» орден да медаль-влак дене, тидын шотыштак «Лӱддымылыклан» медаль дене палемдалтын.

2009 ий 29 майыште Самара олаште колен.

Суаптар-влак

• I степенян Ачамланде сар орден (06.04.1985);
• Йошкар Шӱдыр орден (1944, 21.02.1945);
• III степенян «СССР Сарзе Вийыште Шочмо Эллан служымылан» орден (1975);
• «Почёт Пале» орден (1969);
• «Лӱддымылыклан» медаль (09.06.1944);
• «1941—1945 ийласе Кугу Ачамланде сарыште Германийым сеҥымылан» медаль;
• «Сарзе чаплан. Владимир Ильич Ленинын шочмыжлан 100 ий темме лӱмеш» лӱмгече медаль;
• «МНР Сарзе вийлан 60 ий» медаль (29.12.1981).

Палемдымаш

Литератур

• Кудрявцев Иван Сергеевич // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 196. — 2032 экз. — ISBN 5-87898-357-0.
• Кудрявцев Иван Сергеевич // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 463. — 872 с. — 3505 экз. — ISBN 978-5-94950-049-1.
• Мочаев В. А., Колесников А. Ю. Кудрявцев Иван Сергеевич // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 232. — 606 с. — 1500 экз. — ISBN 978-5-905314-35-3.