Йошкар-Олаште образований

Туныктымо муниципал кышкар 88 туныктышо тӧнеж дене ончыкталтеш (30 тӱшка шинчымашым пуышо школ, школ деч ончыч туныктымо 52 тӧнеж, 6 ешартыш шинчымашым пуышо туныктыш тӧнеж). Олаште 2 кугыжаныш вуз, шкеоза вуз-влак, тыгак посна пашалан кокла шинчымашым пуышо тӧнеж-влак улыт^[1].

Йошкар-Оласе кӱшыл шинчымашым пуышо тӧнеж-влак

Историй

Йошкар-Олаште посна пашалан ямдылыме кӱшыл шинчымашын вияҥмыже 1932 ий гыч тӱҥалеш, тунам СССР Наркомлесын 1932 ий 5 июньысо пунчалже дене Озаҥысе чодыратехнике институтым Йошкар-Олаш кусарыме да Юл кундемысе чодыратехнике институт манын лӱмдымӧ (вараже Марий политехнике институт, тудын деч вара Марий кугыжаныш техник университет лийын, а 2012 ийыште Юл кундемысе кугыжаныш технологий университет манын лӱмденыт)^[2].

1972 ийыште Йошкар-Ола университет олашке савырнен — Марий кугыжаныш университет почылтын^[2].

2003 ийыште Марий Эл Республикыште кумшо вуз почылтын — Кундем-влак кокласе почылтшо илышкыл институт^[3].

Олаште туныктышо пашаеҥ-влакым Н. К. Крупская лӱмеш Марий кугыжаныш педагогике институт ямдылен, тудым 2008 ийыште МарГУ дене ушеныт^[4].

Кугыжаныш кӱшыл тунемме тӧнеж-влак

Юл кундемысе кугыжаныш технологий университет

Кызыт Юл кундемысе кугыжаныш технологий университетыште 7500 студент очно да 5000 студент заочно шинчымашым налеш, 3000 утла тунемше профессийлык кыдалаш шинчымаш программе почеш тунемеш, 150 утла аспирант, 10 докторант уло. Университет кышкарыште 10 факультет, факультет праван 2 туныктыш рӱдер, 49 кафедре уло. Университетын кафедрылаштыже 680 туныктышо пашам ышта, нунын коклаште 72 доктор да 381 шанче кандидат^?!. Университет бакалавриатын 23 тӱрлӧ, магистратурын 8 тӱрлӧ йогынжо, дипломированный пашаеҥ-влакым ямдылыме 54 специальность, тыгак кыдалаш профессонал шинчымашан пашаеҥым ямдылыше 15 специальность дене туныктымо пашам вӱдаш правам пуышо лицензийым куча^[2]. Вузын ректоржо — Петухов Игорь Валерьевич, технике шанче доктор, профессор. РФ-ысе туныктымо да шанче министерствын 2013 ий октябрь-ноябрьыште вуз-влакын паша пайдалыкшым пален налме лектыш почеш, Юл кундемысе кугыжаныш технологий университет пайдалын пашам ыштыше вуз радамыш лектын.

Марий кугыжаныш университет

Марий кугыжаныш университет кызыт 17 факультетыште^[5] 60 специальность дене пашаеҥым ямдыла^[6]. Вузын ректоржо — Швецов Михаил Николаевич, экономике шанче доктор, профессор. РФ-ысе туныктымо да шанче министерствын 2013 ий октябрь-ноябрьыште вуз-влакын паша пайдалыкыштым пален налме лектыш почеш, Марий кугыжаныш университет пайдалын пашам ыштыше вузлан шотлалтын.

Шкеозан кӱшыл шинчымашым пуышо тӧнеж-влак

МОСИ

Регион кокласе почылтшо социал институт 2003 ийыште почылтын да кызытсе жапыште 2 факультетыште 20 тӱрлӧ специальность, бакалавриат, магистратур йогын дене да MBA программе почеш пашаеҥым ямдыла. Тыгак 7 тӱрлӧ шинчымаш йогын дене аспирантур почылтын. Икмыняр бакалавриат да аспирантур йогын дене федерал бюджет вер уло. Кызытсе жапыште МОСИ-ште 4000 наре студент очно, очно-заочно, заочно да мӧҥгӧ гыч (дистанционно) тунемме йӧн дене да ДПО программе-влак почеш шинчымашым налеш.

Вузын кышкарыштыже 10 кафедре, 7 шанче-шымлыше лабораторий, кундемысе тренинг рӱдер, IT рӱдер, TOEFL, Certiport, Prometric, Pearson VUE тестирований рӱдер-влак улыт. МОСИ-н Кугыжаныш аккредитаций нерген танык (танык 2018 ий 28 декабрь марте чын лийын), профессионал кӱшыл шинчымашым пуымо аланыште туныктымо пашам вӱдаш правам пуышо лицензий (мучашдымын чын улеш), «Российысе юрист-влак ассоциаций (руш.) (мар.» ООО мер аккредитаций нерген танык (мучашдымын чын улеш), Россий Федерацийын Торгайыме-йӧнозанлык палатыжын вузлан пуымо туныктыш асулыкшын сайлыкше нерген сертификат, вузын сайлык менеджмент кышкарже кӱшыл профессионал шинчымаш аланыште туныктыш асулыкым ямдылыме да пуымо дене ГОСТ ИСО 9000 (ГОСТ Р ИСО 9001:2008) йодмашыжлан келшен толмым пеҥгыдемдыше сертификатше уло. Вузын ректоржо — Загайнов Игорь Александрович, педагогике шанче кандидат, доцент, МЭР-ысе «РФ-н туныктымаште психолог-влак федерацийын» кундемысе пӧлкажын вуйлатышыже, МЭР-ысе Мер палатын йыжыҥъеҥже. РФ-ысе туныктымо да шанче министерствын 2013 ий октябрь-ноябрьыште вуз-влакын паша пайдалыкшым пален налме лектыш почеш, МОСИ пайдалын пашам ыштыше вузлан шотлалтын.

Кугыжаныш огыл вуз-влакын филиал ден шкегудышт

Галерей

Юл кундемысе кугыжаныш технологий университетын тӱҥ корпусшо
Марий кугыжаныш университетын тӱҥ корпусшо
МарГТУ, 2 корпус

Петырыме да пужен ыштыме тунемме тӧнеж-влак

Марий кугыжаныш педагогике институт

Н. К. Крупская лӱмеш Марий кугыжаныш педагогике институт 2008 ийыште Марий кугыжаныш университет дене ушнен.

Марий Эл Республик Президент пелен Кугыжаныш Службо да Виктарымаш институт

1995 ийыште В. М. Зотинын (Марий Эл Республикын президентше) пунчалже дене Марий Эл Республикын экономике министржын, экономике шанче кандидат Васильев Иван Федоровичын (институтын икымше ректоржо) темлымыж почеш республикын кугыжаныш да муниципал кӱлешлыклан виктарыме персонал-влакым ямдылашлан кадр ВУЗ семын, очно да заочно туныктымо пӧлка-влак дене почылтын. 3 тунемме ий гыч Марий Эл Республикын вес Президентше тудым петырен. Очно тунемше пӧлкан студентше-влак МарГТУ-ш кусаралтыныт, туштак шке тунемм пытареныт. Институт республикын ик эн ончыкылыкан да пайдале кадр кышкар семын шотлалтын, институтын туныктышыжо-влак республикын эн сай пашаеҥже-влак лийыныт (республикысе чыла вуз гыч профессор да академик-влак).

МФ МПСУ

Москосо психолог-илышкыл университетын (МПСУ) Марий филиалже 2015 ийыште тӧнежлыше-влакын пунчалышт дене, РФ-ысе туныктымо да шанче министерствын вуз-влакын пайдалык шотышто мониторингым эртен кертын огылат, петыралтын.

МФ СГА

Тачысе гуманитар академийын Йошкар-Оласе филиалже 2014 ийыште вуз кугыжаныш аккредитаций деч посна кодымо амал дене петыралтын.

Пашаеҥ-влаклан кыдалаш шинчымашым пуышо туныктымо тӧнеж-влак

Йошкар-Олаште ятыр колледж ден техникум уло. Нунын коклаште^[7]:

ПГТУ-н «Политехник» кӱшыл колледжше. 2007 ий 25 майыште Марий кугыжаныш технике университетын (кызыт Юл кундемысе кугыжаныш технологий университет) филиалже семын ышталтын. Колледжын студентше-влак ПГТУ-н студентше-влак дене иктӧр университет илыш дене илат, университетын книгагудо поянлыкше дене пайдаланен кертыт, ты шотыштак воткылысе электрон книгагудо да Интернетыш лекташ йӧнышт уло.
Марий радиомеханик техникум. 1944 ийыште негызлыме.
Чоҥымо-йӧнозанлык техникум;
Торгайыме-технологий колледж;
Йошкар-Оласе асулык технологий техникум;
Марий политехник техникум;
Марий чодыра озанлык техникум;
Йошкар-Оласе чоҥымо техникум;
Йошкар-Оласе технологий колледж;
Йошкар-Оласе художественный училище;
И. С. Палантай лӱмеш тӱвыра да сымыктыш колледж;
Йошкар-Оласе медицине колледж (ЙМК). Студент-влакым эмлыме паша, акушер паша, фармаций, шӱжар паша, лабораторий диагностике пашалан туныкта;
Марий кооператив техникум;
Экономик, бизнес да рекламе техникум. Студент-влакым «Налог да налогым тӱлымаш», «Менеджмент», «Рекламе» пашалан туныктат.

Палемдымаш

↑ Центральный Дом Знаний - Образование в Йошкар-Оле (неопр.). cendomzn.ucoz.ru. Тергыме кече: 6 сӱрем 2025.
↑ ¹ ² ³ МарГТУ. Традиции, качество, перспектива (неопр.). Марийский государственный технический университет. Тергыме кече: 6 сӱрем 2025. Архивлыме 13 сорла 2011 ий.
↑ Межрегиональный открытый социальный институт Архивысе копий 8 теле 2021 гыч.
↑ Два марийских вуза под одну крышу (неопр.). МК в Марий Эл № 31 (6 сорла 2008). Тергыме кече: 6 сӱрем 2025. Архивировано из оригинала 16 вӱдшор 2013 ий.
↑ МарГУ: администрация, подразделения, факультеты, кафедры, специальности, музеи (неопр.). Марийский государственный университет. Тергыме кече: 6 сӱрем 2025. Архивировано из оригинала 11 сорла 2011 ий.
↑ Перечень специальностей МарГУ (неопр.). Марийский государственный университет. Тергыме кече: 6 сӱрем 2025. Архивировано из оригинала 11 сорла 2011 ий.
↑ Список профессиональных образовательных организаций Республики Марий Эл (неопр.) (19 шыжа 2015). Тергыме кече: 8 сӱрем 2025. Архивировано из оригинала 16 вӱдшор 2016 ий.

[1] Центральный Дом Знаний - Образование в Йошкар-Оле (неопр.). cendomzn.ucoz.ru. Тергыме кече: 6 сӱрем 2025.

[marstu-2] ¹ ² ³ МарГТУ. Традиции, качество, перспектива (неопр.). Марийский государственный технический университет. Тергыме кече: 6 сӱрем 2025. Архивлыме 13 сорла 2011 ий.

[3] Межрегиональный открытый социальный институт Архивысе копий 8 теле 2021 гыч.

[4] Два марийских вуза под одну крышу (неопр.). МК в Марий Эл № 31 (6 сорла 2008). Тергыме кече: 6 сӱрем 2025. Архивировано из оригинала 16 вӱдшор 2013 ий.

[5] МарГУ: администрация, подразделения, факультеты, кафедры, специальности, музеи (неопр.). Марийский государственный университет. Тергыме кече: 6 сӱрем 2025. Архивировано из оригинала 11 сорла 2011 ий.

[6] Перечень специальностей МарГУ (неопр.). Марийский государственный университет. Тергыме кече: 6 сӱрем 2025. Архивировано из оригинала 11 сорла 2011 ий.

[7] Список профессиональных образовательных организаций Республики Марий Эл (неопр.) (19 шыжа 2015). Тергыме кече: 8 сӱрем 2025. Архивировано из оригинала 16 вӱдшор 2016 ий.

[1]

[2]

[3]

[4]

[5]

[6]

[7]