Харитонова, Ольга Федотовна

РУВИКИ — эрыкан энциклопедий гыч материал
Ольга Федотовна Харитонова
Харитонова, Ольга Федотовна.jpg
Шочмо кече 11 пургыж 1947(1947-02-11)
Шочмо вер
Колымо кече 18 кылме 2021(2021-11-18) (74 ий)
Колымо вер
Гражданстве  СССР →  Россий
Профессий
актрисе
Усталык жап 1969—2015
Амплуа трагик, комик
Театр М. Шкетан лӱмеш марий кугыжаныш драме театр
Суаптар Марий Эл Республикын калык артисткыже (2000)
Марий Эл Республикын сулло артисткыже (1995)

О́льга Федóтовна Харитóнова (11 пургыж 1947, Рушплак[d], Марий Автоном Совет Социализм Республик — 18 кылме 2021, Йошкар-Ола) ― совет да российысе театр актрисе. М. Шкетан лӱмеш марий театрын актрисыже (1969—2015). Марий Эл Республикын калык артисткыже (2000), Марий Эл Республикын сулло артисткыже (1995).

Илыш корныжо

1947 ий 11 февральыште Марий Элын кызытсе Кужэҥер кундемысе Рушплак ялеш шочын[1][2][3].

1969 ийыште Йошкар-Олаште И. С. Палантай лӱмеш музык училищын дирижёр-хор пӧлкажым тунем пытарен. 1969 ий шошым, училищым тунем пытарымеке, М. Шкетан лӱмеш марий театрын труппышкыжо налме, тушто 2015 ий марте, сулен налме канышыш лекмешкыже, пашам ыштен[2][3][4][5].

1995 ийыште Марий Эл Республикын сулло артисткыже, а 2000 ийыште — Марий Эл Республикын калык артисткыже лийын[2][3].

2021 ий 18 ноябрьыште Йошкар-Олаште колен[6].

Актёр паша

Лӱмын тунемме театр шинчымаш деч посна театр пашаште шке туныктышыжлан РСФСР-ын сулло артистше-влак Г. М. Пушкиным да М. М. Михайловам шотлен. Актрисын дебютшо А. Волковын «Артистка» комедийыштыже шешкын рольжо лийын[2][3].

Усталык корно тӱҥалтыште актрисе шуко, социалист ялым чолган чоҥышо колхоз ӱдыр-влакын рольыштым модын: Н. Арбанын «Кеҥеж йӱд» (1973) да «У муро» (1979) комедийлаштыже Ольга ден Нина да молат[2][3].

Тудо классике комедий репертуарыште икмыняр рольым модын: Арина Пантелеймоновна (Н. Гоголь «Каче пазар», 1994), Белотелова (А. Островский «Мом кычалат, тудымак муат», 2000), озавате (А. Кицберг «Ургызо Ыкх», 1993) да молат[2][3].

Тудын пашаштыже кызытсе драматург-влакын произведенийлаштышт образ-влак кугу верым налыт: Зоя (Н. Семёнова «Коҥга пайрем», 1987), Света (Б. Аппаев «Еҥгаватылан шыҥалык», 1990), Ага (А. Пудин «Пыжаш», 1990), Начи (Э. Рисклакки «Полдалге», 1998), Мокеевна (В. Гуркин «Кнагари-тывырдык», 1998) да молат[2][3].

Марий драматург-влакын пьесылаштышт тыгай рольжо-влак палыме улыт: Алла (Н. Арбан «Тулар ден тулаче», 1983), Пӧкла (М. Рыбаков «Томаша», 1985), Найош (М. Рыбаков «Тӱрлемӱдыр», 1991), Наставий (Л. Яндаков «Йӧратымаш? Йӧратымаш! Йӧратымаш…», 2000) да молат[2][3].

Классике калыкле репертуарын рольлаштыже актрисе сценысе чолга образ-влакым чоҥен: Сапани ден Нина (М. Шкетан «Мыскара кас», 1978), Тарля (В. Пектеев, Ю. Байгуза «Окса тул», 1994), Эчан вате (С. Николаев «Салика», 1998), Нени кува (М. Шкетан «Ачийжат-авийжат!..», 1998)[2][3].

Тыгак тудо икмыняр келге драме образым чоҥен: Анна (М. Горький «Васса Железнова», 1976), Гонерилья (В. Шекспир «Лир», 1984), Варвара (В. Распутин «Пытартыш кече», 1987), Йоукахайненын аваже («Калевала», 1997) да молат. Тыгай шотан рольжо-влак кокла гыч поснак И. Друцэн «Илыш сескем» (1982) драмыштыже молдаван кресаньык Мариян рольжым палемдаш кӱлеш[2][3].

Мурымо усталыкшылан да ончышын кумылым савырен моштымыжлан кӧра, семан спектакльлаште, тыгак театрын концертлаштыже чолган тыршен[2][3].

Тӱҥ роль-влак

О. Ф. Харитонован модмо тӱҥ роль-влак списке[2][3]:

  • Шешке («Артистка», А. Волков)
  • Ольга, Нина («Кеҥеж йÿд», «У муро», Н. Арбан)
  • Арина Пантелеймоновна («Каче пазар», Н. Гоголь, 1994)
  • Белотелова («Мом кычалат, тудымак муат», А. Островский  (руш.) (мар., 2000)
  • Анна («Васса Железнова», М. Горький)
  • Алла (Н. Арбан «Тулар ден тулаче», Н. Арбан, 1983)
  • Пекла («Томаша», М. Рыбаков, 1985)
  • Найош («Тӱрлемӱдыр», М. Рыбаков, 1991)
  • Наставий («Йöратымаш? Йöратымаш! Йöратымаш…», Л. Яндаков)
  • Генерилья («Король Лир», У. Шекспир)
  • Варвара («Пытартыш кече», В. Распутин, 1987)
  • Сапани да Нина («Мыскара кас», М. Шкетан, 1978)
  • Нени кува («Ачийжат-авийжат!..», М. Шкетан, 1998)
  • Тарля («Окса тул», В. Пектеев, Ю. Байгуза, 1994)
  • Эчан вате («Салика», С. Николаев)
  • Йоукахайненын аваже («Калевала»)
  • Мария («Илыш сескем», И. Друцэ, 1982)
  • Озавате («Ургызо Ыкх», А. Кицберг, 1993)
  • Зоя («Коҥга пайрем», Н. Семёнова, 1987)
  • Света («Еҥгаватылан шыналык», Б. Аппаев, 1990)
  • Ага («Пыжаш», А. Пудин, 1990)
  • Начи («Полдалге», Э. Рислакки, 1998)
  • Мокеевна («Кнагари-тывырдык», В. Гуркин, 1998)

Пагалымаш

Палемдымаш

  1. ↑ Одна судьба на родной земле (руш.). xn--80aiclbbsnghpgw1b5g.xn--p1ai. Тергыме кече: 27 теле 2025.
  2. ↑ 1 2 3 4 5 6 7 8 9 10 11 12 13 14 Мочаев, 2017, с. 470.
  3. ↑ 1 2 3 4 5 6 7 8 9 10 11 12 13 14 Энциклопедия Республики Марий Эл, 2009, с. 791.
  4. ↑ Актеры уроженцы Куженерского района Республики Марий Эл - online presentation. en.ppt-online.org. Тергыме кече: 27 теле 2025.
  5. ↑ Выдающиеся личности, 2017-11-25, <https://rodygina94mail.wordpress.com/%D0%B2%D1%8B%D0%B4%D0%B0%D1%8E%D1%89%D0%B8%D0%B5%D1%81%D1%8F-%D0%BB%D0%B8%D1%87%D0%BD%D0%BE%D1%81%D1%82%D0%B8/>. Тергыме: 27 теле 2025. 
  6. ↑ Уста артист дене чеверласена (руш.). Новости Марий Эл - Новости Йошкар-Олы - ГТРК «Марий Эл». Тергыме кече: 27 теле 2025.

Литератур

  • Харитонова Ольга Фёдоровна // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 382. — 2032 экз. — ISBN 5-87898-357-0.
  • Харитонова Ольга Федотовна // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 791. — 872 с. — 3505 экз. — ISBN 978-5-94950-049-1.
  • Кульбаева Н. И., Мочаев В. А. Харитонова (Чемекова) Ольга Фёдоровна // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 470. — 606 с. — 1500 экз. — ISBN 978-5-905314-35-3.
  • Энциклопедия театров Марий Эл: иллюстрированное научно-популярное издание. ― Йошкар-Ола, 2019.
"https://mhr.ruwiki.ru/w/index.php?title=Харитонова,_Ольга_Федотовна&oldid=1231531" гыч налме