Платунов, Михаил Георгиевич

Михаил Георгиевич Платунов
1957 ийысе фото.
Шочмо кече	10 (22) пургыж 1887 ий(1887-02-22)
Шочмо вер	Марий Турек, Вӱрзым уезд, Виче губерний, Россий империй
Колымо кече	18 пеледыш 1972(1972-06-18) (85 ий)
Колымо вер	Ленинград, РСФСР, СССР
Эл	Россий империй  СССР
Жанр	графике[d]
Тунеммаш	Кӱшыл сылнысӱрет училище[d] (1914)
Стиль	Реализм
Награде	РСФСР сымыктышын сулло пашаеҥже

П. Д. Бучкин. М. Г. Платуновын портретше. 1930-шо ийла

Михаил Георгиевич Платунов (23 пургыж 1887, Марий Турек, Вӱрзым уезд, Виче губерний, Россий империй — 18 пеледыш 1972, Ленинград, РСФСР, СССР) — российысе да совет живописец, график да туныктышо, РСФСР сымыктышын сулло пашаеҥже (1954), Ленинградысе Сӱретче-влак ушемын йыжъеҥже.

Илыш корно

Михаил Георгиевич Платунов 1887 ий 10 (22) февральыште (вес данный почеш, 23 февральыште) Виче губерний Вӱрзым уездысе Черемис Тӱрек (Марий Тӱрек) ялыште юмоҥам сӱретлыше руш еҥын ешешыже шочын. 1906 ийыште Озаҥысе художественный училищым тунем пытарен да Петербургысо Императорлык художество Академий пеленысе Кӱшыл художественный училищыш пурен, тушто П. П. Чистяков ден В. Е. Савинский профессор-влак дене тунемын. 1914 ийыште Кӱшыл художественный училищым тунем пытарен. Икымше тӱнямбал сар годым фронтысо сӱретче лийын.

Революций деч вара Петроградысе школлаште да пашазе клублаште туныктен, революций жапысе Россий сӱретче-влакын Ассоциацийыштын ончерлашкыже ушнен, палыме сымыктыш пашаеҥ-влакын икмыняр портретыштым ыштен. 1925—1931 ийлаште Всесоюзный геологий комитетын экспедицийже пелен Полярный Уралын, Абхазийын, Туркестанын, Печора ден Камчаткын тора да шагал шымлыме кундемлашкышт коштын. Ужмо-колмо, тыгак корнышто ыштыме этюд-влак ончыкылык произведений-влакын негызышт лийыныт. 1937 ийыште «Садко» ледокол дене Арктикыште лийын.

Кугу Ачамланде сар годым йыр авырыме Ленинградыште пашам ыштен, гуашь дене «Блокадысе Ленинград» лӱман сӱрет серийым ыштен. 1942 ийыште Йошкар-Олаш эвакуироватленыт. Тыште 1943 ийыште нине паша-влакым икымше ончышо-влак — земляк-влак — ужыныт. Драме театрын тошто оралтыштыже, тудо жапыште Йошкар-Олаште илыше-влакын тӱвыра илышыштын рӱдӧ верыштыже, ончышо-влак геройло олам да шочмо верыштыже уэш илыш да усталык кумылым налше авторым чаманеныт. Кок ий гыч ончерым Лондонышто илыше-влак ужыныт. Вара Варшавыште. Москошто. Да мучашлан — Ленинградыште. Варажым Платунов пашаже-влакым Марий республиклан пӧлеклен. Кызыт нунын оза Т. Евсеев лӱмеш калыкле тоштер ден Козьмодемьянскысе А. В. Григорьев лӱмеш художественно-исторический тоштер улыт.

Сар деч варасе ийлаште Платунов Ленинградысе И. Е. Репин лӱмеш живопись, скульптур да архитектур институтышто туныктен, сӱрет кафедрын профессоржо лийын. 1954 ийыште РСФСР сымыктышын сулло пашаеҥже чап лӱм дене палемдалтын. Ленинградысе пейзажым, шуэнрак тематикан сӱретым, портретым возен. «Шанче Академий воктене» (1941), «Мӧҥгыштӧ», «Вӱдлан», «Телымсе канаве» (чылажат 1942), «Икымше кечыйол (Г. Я. Седов)», «Школышто тунемше ӱдырын портретше», «Рӱмбыкан кече» (чылажат 1950), «Текстильщицын портретше» (1951), «Ош йӱд», «Шыже кас» (когынек 1957), «Куралмаште», «Кӱтӱ» (когынек 1959), «Тошто Париж» (1961), «Кугу проспект», «Кеҥеж Сад» (когынек 1964) да моло сӱрет-влакын авторжо.

1972 ийыште Ленинградыште колен. Йӱдвел шӱгарлаште тоеныт.

М. Г. Платуновын произведенийже-влак Кугыжаныш Руш тоштерыште, Третьяков галерейыште, российысе ден йот элласе тоштерлаште да посна погымаште улыт. Михаил Платуновын живопись, графике да скульптур портретше-влак, кудыштым тӱрлӧ ийлаште Ленинградысе сӱретче-влак, нунын коклаште Борис Горлач (1957), Александр Поляков (1958), В. И. Селезнёв (1972), Е. М. Костенко (1972), ыштеныт, кумдан палыме улыт.

М. Г. Платуновлан марий калык поэт М. Казаков «Сӱретчылан» шке возымо почеламутшым (1963, А. Казаковын кусарымыже) пӧлеклен.

Тунемше-влак

• Вайшля Леонид Игнатьевич (шоч. 1922)
• Весёлкин Игорь Петрович (1915—1997)
• Козловская Марина Андреевна (шоч. 1925)
• Костенко Елена Михайловна (шоч. 1926)
• Котик Борис Васильевич (1921—1984)
• Ласточкин Сергей Павлович (1927—1992)
• Ломакин Олег Леонидович (1924—2010)
• Назаров Пётр Фёдорович (1921—1988)
• Раздрогин Игорь Александрович (шоч. 1923)
• Саксон, Владимир Станиславович (1927—1988)
• Селезнёв Владимир Иванович (1928—1991)
• Чекалов Владимир Фёдорович (1922—1992)

Ончер-влак

Михаил Георгиевич Платунов дене пырля ончер-влак

• 1951 ий (Ленинград): Ленинградысе сӱретче-влакын произведений ончерышт.
• 1951 ий (Ленинград): «Ленинградысе сӱретче-влакын 1951 ийысе произведений ончерышт» Руш Кугыжаныш тоштерыште.
• 1957 ий (Ленинград): 1917—1957. Ленинградысе сӱретче-влакын произведений ончерышт.
• 1960 ий (Ленинград): Ленинградысе сӱретче-влакын произведений ончерышт.
• 1962 ий (Ленинград): "Ленинградысе сӱретче-влакын шыже ончерышт".
• 1964 ий (Ленинград): Ленинград. Зональный ончер.
• 1976 ий (Моско): Ленинградын сӱретсымыктышыже.

Палемдымаш

Литератур

• Выставка произведений ленинградских художников 1951 года. Каталог. — Л: Лениздат, 1951. — с.17.
• Выставка произведений ленинградских художников 1951 года. Каталог. — М-Л., Искусство. 1951. С. 20.
• 1917 — 1957. Выставка произведений ленинградских художников. Каталог. — Л: Ленинградский художник, 1958. — с.11.
• Выставка произведений ленинградских художников 1960 года. Каталог. — Л: Художник РСФСР, 1961. — с.32.
• Осенняя выставка произведений ленинградских художников 1962 года. Каталог. — Л: Художник РСФСР, 1962. — с.21.
• Ленинград. Зональная выставка. — Л: Художник РСФСР, 1965. — с.42.
• Справочник членов Ленинградской организации Союза художников РСФСР. — Л: Художник РСФСР, 1972. — с.43.
• Изобразительное искусство Ленинграда. Каталог выставки. — Л: Художник РСФСР, 1976. — с.27.
• Кудрявцев В. Г. М. Г. Платунов — художник и педагог. Монография. — Йошкар-Ола, 1986. — 144 с.
• Matthew Cullerne Bown. A Dictionary of Twentieth Century Russian And Soviet Painters. 1900 — 1980s. — London: Izomar Limited, 1998.
• Иванов С. В. Неизвестный соцреализм. Ленинградская школа. — СПб.: НП-Принт, 2007. — С. 15, 19, 358, 362, 364, 365, 369, 372, 378—387, 391, 396, 441. ISBN 5-901724-21-6, ISBN 978-5-901724-21-7.
• Платунов Михаил Георгиевич // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 284. — 2032 экз. — ISBN 5-87898-357-0.
• Платунов Михаил Георгиевич // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 626. — 872 с. — 3505 экз. — ISBN 978-5-94950-049-1.