Лаврентьев, Александр Павлович

РУВИКИ-ште тыгай тукымлӱм дене вес еҥ нерген статьям лудаш лиеш: Лаврентьев.

Александр Павлович Лаврентьев
Шочмо кече	2 шорыкйол 1926(1926-01-02)
Шочмо вер	Мокрая Бугурна[d], Симбирск уезд[d], Симбирск губерний[d], РСФСР, СССР
Колымо кече	13 пургыж 2014(2014-02-13) (88 ий)
Колымо вер	Волжск, Марий Эл Республик, Россий
Гражданлык	СССР  Россий
Паша сомыл	Марий кагаз комбинатын кугурак машинистше, мастерже, рационализатор
Награде да премий	МАССР Кӱшыл Каҥаш Президиумын Чапкагазше[d] (1952)

Алексáндр Пáвлович Лаврéнтьев (2 шорыкйол 1926, Мокрая Бугурна^[d], Симбирск уезд^[d], Симбирск губерний^[d], РСФСР, СССР — 13 пургыж 2014, Волжск, Марий Эл Республик, Россий) — совет целлюлоз-кагаз йӧнозанлык пашаеҥ, производствын ончылъеҥже, рационализатор. Марий целлюлоз-кагаз комбинатыште кагазым ыштыше машинан машинистше (1960—1989). Ленин орденын кавалерже (1971). 1950 ий гыч ВКП(б)-ын йыжыҥъеҥже, КПСС-ын XXII погынжын делегатше (1961).

Илыш корныжо

1926 ий 2 январьыште кызытсе Ульяновск область Цильна район Мокрая Бугурна ялысе кресаньык ешеш шочын.

1942 ийыште Марий АССР-ын Волжск оласе 2-шо №-ан кидпаша училищым тунем пытарен.

1942 ий гыч — Марий целлюлоз-кагаз комбинатын коштышыжо (сушильщик), машинистше, мастерже, кугурак машинистше, 1960—1989 ийлаште — кагазым ыштыше машинан машинистше. Кагаз фабрикыште эн сай сеточниклан да рационализаторлан шотлалтын: 1966 ийыште производствыш 8 рационализатор темлымашым ыштен, нуно вич тӱжем теҥге экономический манме лектышым пуэныт.

1966 ийыште, паша деч кӱрылтде, кумияш мастар-влак школым тунем пытарен, чолга мер пашаеҥ лийын, шке моштымашыжым да шинчымашыжым самырык пашазе-влаклан пуэн. Кӱкшӧ профессионал специалист семын кок гана иза-шольо социалист эллаште — Болгарийыште да Китайыште — лийын, тушто кагазым ыштыше машинам пашалан ямдылымаште да пашаш колтымаште технике могыр полышым пуэн.

1950 ийыште ВКП(б)-ш налыныт. 1961 ийыште КПСС-ын XXII погынысо делегатшылан сайлалтын.

Ленин орден, Паша Йошкар Тисте орден, III степенян Паша Чап орден да медаль-влак дене, тыгак Марий АССР Кӱшыл Каҥаш Президиумын Чаптаныкше дене суапландаралтын.

2014 ий 13 февральыште Волжск олаште илыш дене чеверласен.

Паша суаптар-влак

• Ленин орден (1971);
• Паша Йошкар Тисте орден (1951);
• III степенян Паша Чап орден (1976);
• «Чапле пашалан. Владимир Ильич Ленинын шочмыжлан 100 ий темме лӱмеш» лӱмгече медаль (1970);
• Марий АССР Кӱшыл Каҥаш Президиумын Чаптаныкше (1952).

Шарнымаш

А. П. Лаврентьевын пашаште лиймыжым ончыктышо икмыняр фотосӱрет кызыт Волжск оласе краеведений тоштер фондышто аралалтеш.

Палемдымаш

Литератур

• Двадцать лет Марбумкомбината. — Йошкар-Ола, 1958. — С. 76—80.
• Они ковали Победу: труженикам тыла города Волжска и Волжского района посвящается / [отв. (науч.) ред. В. С. Соловьёв]. — Йошкар-Ола: СТРИНГ, 2010. — 303 с., [18] л. фот.: ил.; 28 см; ISBN 978-5-91716-065-8.
• Виногоров Н. И., Мочаев В. А. Лаврентьев Александр Павлович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 246. — 606 с. — 1500 экз. — ISBN 978-5-905314-35-3.

Кылвер-влак

• Марийская история в лицах. Лаврентьев Александр Павлович.