Йошкин пырыс еш (скульптур композиций)

	Йошкин пырыс еш. 2024
	Той
	Йошкар-Ола

Йошкин пырыс еш (скульптур композиций) (руш. Йошкина котосемья (семь чудес Йошкар-Олы) — тиде Марий Эл Республикын рӱдолаштыже, Йошкар-Олаште, верланыше шым пырысиге-влакын фигурышт. Йошкин пырысиге-влак марий рӱдолан тӱҥ сылне верлажым ончыктат, тудын шкешотан тӱвыра да историй поянлыкше дене палдарат.

Историй

«Йошкин пырыс еш» — тиде Сберын, Креатив индустрий школын, И. С. Палантай лӱмеш тӱвыра да сымыктыш колледжын да Йошкар-Оласе историй тоштерын Йошкар-Олалан 440 ий теммыже лӱмеш шонен лукмо да илышыш шыҥдарыме тӱшкале турист проектышт. Шым йошкин пырысигын фигурыштым Владимир олаште тойым велыме йӧн дене ыштен лукмо. Кажне фигурын кӱкшытшӧ — 20 сантиметр^[1].

Йошкин пырысиге-влак оласе уремлаште еш идалыкыште (руш.) (мар. — 2024 ий 31 майыште лектыныт. Икымше фигурым Кӱртньыгорнызо-влак скверыште шогалтеныт^[2]. Тудо ийынак октябрьыште фигур-влак воктене QR-код дене «чапам» вераҥденыт. Кото-квестыш ушнаш да чыла пырысигым шке шинча дене ужаш манын, мобил телефон дене QR-кодым сканироватлаш веле кӱлеш, вара тудо 2ГИС приложенийыште олан картышкыже колта. Туштак проект, тудын авторжо да участникше-влак нерген уверым муаш, пырысиге-влакын улмо верыштым да лӱмыштым пален налаш лиеш^[3].

Ӧрышан персонаж-влак

Йошкин пырысиге-влак Марий Элыште илыше-влакын сай илышыштым аралыше семын шотлалтыт. Кажныжын лӱмжӧ, койыш-шоктышыжо да верланыме вержын шкешотан улмыжым ончыктышо концепцийже уло.

Барсик — колызо, Йошкар-Олан эҥерӱмбалныже (руш.) (мар. шинча да шӧртньӧ кол деч шонымашыжым шукташ йодеш. Пиалан илышым арала — перкен ӱжвата. Адрес: Патриарший площадь.
Василий фотоаппарат дене Йошкар-Оласе историй тоштер воктене уна-влакым вашлиеш. Историйым арала да оҥай еҥ-влак дене вашлияш полша. Изи Какшан ӱмбалне верланыше олан тайныжым пален налаш манын, тудын рюкзакшым да фотоаппаратшым тӱкалташ темлалтеш. Адрес: Вознесений урем, 39.
Мурзик гитаре дене — семмастар, уна-влакым шке усталыкше дене куандараш йӧрата. Благовещений башне да Поро Увер собор деч мӱндырнӧ огыл шога. Эрыкым арала, усталык еҥ-влаклан полша. Гитарыжым тӱкымаш усталык кумылым савырыме дене кылдалтеш. Адрес: Чавайн бульвар.
Ириска — илышлан куанен илыше, йӱштышерым йӧратыше, Рӱдӧ паркыште йоча-влаклан чапажым рӱзен шога. Йоча пагытым арала да илышым пиал дене тема — йӱштышерым тӱкалташ веле кӱлеш. Адрес: Тӱвыра да каныме Рӱдӧ паркын тӱҥ аллейже.
Бусинка пуантым чиен шогалын, шке шонымашыжым илышыш шыҥдараш да балетын шӱдыржӧ лияш тырша. Эрик Сапаев лӱмеш Марий кугыжаныш академ опер да балет театр ончылно кушта. Ончыкшонышым арала да шындыме цельыш шуаш полша. Пуантым тӱкымаш шке вийлан ӱшанаш тӱҥалмым ончыкта. Адрес: Комсомол урем, 130.
Карл — ончыкылык банкир, мемнан элнан тӱҥ банкшын пӧртшӧ воктене ила. Оксам да поянлыкым арала. Пиал да окса перке лийже манын, тудын пурла чапажым ниялташ темлалтеш. Адрес: Карл Маркс урем, 109Б.
Дымка Марий Элын рӱдолаштыже илыше да унала толшо-влакым кӱртньыгорно вокзал воктене, Л-1843 паровоз пелен вашлиеш да ужата. Корныш лекше-влакым арала да корнышто пиалым конда. А тидлан тудын чемоданжым гына тӱкалыман. Адрес: Яналов урем^[4]^[5].