Егошин, Тихон Фёдорович

РУВИКИ-ште тыгай тукымлӱм дене вес еҥ нерген статьям лудаш лиеш: Егошин.

Тихон Фёдорович Егошин
Шочмо кече	28 пеледыш 1907(1907-06-28)
Шочмо вер	Ильдемнур, Вӱрзым уезд[d], Виче губерний[d], Россий империй[d]
Колымо кече	1 сорла 1944(1944-08-01) (37 ий)
Колымо вер	Даугавпилс край, Латвий
Пурымаш	СССР
Войскан родшо	Сухопут войска
Службо жап	1933—1944
Званий
Командоватлен	238-ше стрелок дивизий 270-ше стрелок дивизий 332-шо стрелок дивизий
Кредалмаш/сар	Кугу Ачамланде сар
Награде да премий

Тихон Фёдорович Егошин (1907 ий 28 июнь, Ильдемнур ял, Виче губерний — 1944 ий 1 август, Даугавпилс край) — совет сарзыеҥ, генерал-майор (29.07.1944).

Илыш корныжо

Ильдемнур ялыште шочын (кызыт — Марий Эл У Торъял вел). Руш.

Армийыште служитлыме марте Марий АССР-ысе Элембай да Липовысо 1-ше ступенян школлам вуйлатен. 1930 ий ноябрь гыч 1933 ий март марте Угарманысе радиотехникумышто тунемын да тунамак В. И. Ленин лӱмеш Угарман радиотелефон комбинатыште техник-лаборантлан пашам ыштен.

1933 ий мартыште РККА-ш налыныт да Ярославль олаште МВО-н 18-ше стрелок-влак дивизийын 52-шо стрелок полкын ик ий тунемме командын курсантше лийын, тудым пытарымеке, 54-ше стрелок полкышто стрелок взводын да полкысо школын взвод командирже, рото командирже, Ростов-Ярославский олаште полкысо школ начальникын полышкалышыже да начальникше лийын. Вара дивизий пелен полкым Медвежьегорск олаш ЛВО-ш кусареныт.

1939 ий апрель гыч кугурак лейтенант Егошин М. В. Фрунзе лӱмеш Сар академийыште тунемын, 1-ше курс деч вара, 1940 ий июньышто, Йошкар Армийын Тӱҥ штабысе кӱшыл спецшколын тунемшыже лийын.

1940 ийыште ВКП(б)-ш пурен.

Кугу Ачамланде сар тӱҥалме дене 1941 ий августышто школ гыч лукмо да Алтай кундем Славгород олаште ыштыме СибВО 380-ше стрелок-влак дивизий штабын 1-ше (оператив) пӧлка вуйлатышылан шогалтыме. СибВО-м чумырен шуктымеке, тудын дене пырля Карел фронтысо Вытегра районыш каен. 1942 ий январьыште ВГК Ставкын кӱштымыж почеш дивизийым Нелидово велысе Калинин фронтыш кусареныт, тушто 22-шо армийын кышкарышкыже пурен. 21 февраль гыч дивизийын ужашыже-влак тиде армийын кышкарыште Сычёвск-Вяземысе ончык эртыме операцийыште кредалыныт. 1942 ий мартыште майор Егошиным 380-шо стрелок-влак дивизийын штаб вуйлатышыжлан шогалтеныт.

Август гыч оператив начальникын алмаштышыжын пашажым шуктен, а ноябрь гыч — 22-шо армийын разведке пӧлкажым вуйлатен.

1942 ий 3 декабрьыште 238-ше стрелок-влак дивизийым командоватлаш ӱшаненыт. 5 декабрь гыч дивизийын ужашыже-влак армийын пурла флангым петырен, арален шоген. 1943 ий 23 январь гыч дивизий Калинин фронтын да 22-шо армийын шапашыштыже лийын.

1943 ий 15 февральыште 22-, 39- да 43-шо армийыш пурышо 114-ше посна стрелок-влак бригадын командир олмыш кусареныт. Сентябрь-октябрьыште 43-шо армийын кышкарыште бригада Духовщинск-Демидовысо ончык эртыме вашпижмаште ойыртемалтын. ВГК-н 1943 ий 22 сентябрьысе кӱштыкшӧ дене Демидов олам утарымылан бригадылан «Демидовский» лӱмым пуымо.

1943 ий 28 октябрьыште полковник Егошиным 270-ше стрелок-влак дивизийым жаплан вуйлаташ кӱштеныт, госпиталь гыч ончычсо командир полковник И. П. Беляевын пӧртылмекыже, 28 ноябрьгыч уэш 114-ше посна стрелок-влакын Демидовский бригадышкыже куснен.

1943 ий 7 декабрь гыч М. В. Фрунзе лӱмеш 332-шо Ивановысо стрелок-влак дивизийын командиржылан тыршен. Декабрьын кокымшо пелыштыже тудо 4-ше ударныйын, варажым тиде фронтынак 43-шо армийын кышкарыштыже Витебск могырышко ончык эртыме кредалмашым вӱден. 1944 ий январь гыч дивизий 43-шо армийын шапашыштыже, вара 1-ше Прибалтике фронтын кӱштымаштыже лийын. Март тӱҥалтыште тудын ужашыже-влак Дретунь станций могырышто тушманым поктеныт. 15 уштыш ончыко эртымеке, нуно пеҥгыдын ямдылалт шуктышо тушман дене вашлийыныт, аралалташ шогалыныт. 29 июнь гыч дивизий 1-ше, а 4 июль гыч — 2-шо Прибалтикысе фронтлаште 4-ше ударный армий кышкарыште Белоруссийысе, Полоцк верч ончык эртыме операцийлаште кредалын. ВГК-н 1944 ий 23 июльысо кӱштымыж дене Полоцк олам утарымаште ойыртемалтмылан бригадылан «Полоцкий» лӱмым пуымо. Ончык эртышыла, девизийын ужашыже-влак Шяуляйысе ончык эртыме операцийыште кредалыныт.

1944 ий 31 июльышто, Дубна эҥер воктенысе плацдарме НП деке кайышыла, тушманын артиллерий гыч лӱйкалымышт годым генерал-майор Егошин нелын сусырген да вес кечынже, 1 августышто сусырлан верч колен. Даугавпилс олаште, Ригас урем, Дубровин паркыште тойымо.

Суаптарже-влак

• кок Йошкар Тисте орден (20.06.1943, 10.07.1944)
• I степенян Ачамланде сар орден (14.09.1943)

Кӱшыл Тӱҥ командующийын Таумут кӱштыкшӧ-влак, куштыжо Егошин Т. Ф. палемдалтын

• Немыч-влакын Демидов олам аралымаште ик эн пеҥгыде верыштым кӱрыштын штурм дене налмылан. 1943 ий 22 сентябрь 21-ше №
• Полоцк олам да пеш кӱлешан кӱртньыгорнывожым штурм дене сеҥен налмылан — Двинск могырышто немыч-влакын аралалтме куатле вийжым пытарымылан. 1944 ий 4 июль 129-ше №

Палемдымаш

Литератур

• Великая Отечественная. Комдивы : военный биографический словарь / [Д. А. Цапаев и др. ; под общ. ред. В. П. Горемыкина] ; М-во обороны Российской Федерации, Гл. упр. кадров, Гл. упр. по работе с личным составом, Ин-т военной истории Военной акад. Генерального штаба, Центральный архив. — М. : Кучково поле, 2014. — Т. III. Командиры стрелковых, горнострелковых дивизий, крымских, полярных, петрозаводских дивизий, дивизий ребольского направления, истребительных дивизий (Абакумов — Зюванов). — С. 914—915. — 1102 с. — 1000 экз. — ISBN 978-5-9950-0382-3.

Кылвер-влак

• Общедоступный электронный банк документов «Подвиг Народа в Великой Отечественной войне 1941—1945 гг.»