Данилов, Виктор Петрович

В Рувики есть статьи о других людях с такой фамилией, см. Данилов.

Виктор Петрович Данилов
Тӱҥ увер
Тичмаш лӱм
Шочмо кече	25 теле 1932(1932-12-25)
Шочмо вер	У Стройко, Щёкино район, Моско область, РСФСР, СССР
Колымо кече	21 пургыж 2018(2018-02-21) (85 ий)
Колымо вер	Йошкар-Ола, Марий Эл Республик, Россий
Эл	СССР
Профессий	композитор
Награде	Марий АССР-ысе сымыктышын сулло пашаеҥже (1986)

Виктор Петрович Данилов (25 теле 1932, У Стройко^[d], Моско область, РСФСР, СССР — 21 пургыж 2018, Йошкар-Ола, Марий Эл Республик, Россий) — марий композитор, Марий АССР сымыктышын сулло пашаеҥже (1986), Россий композитор-влак ушемын йыжъеҥже (1972), Олык Ипай лӱмеш самырыктукым премийын лауреатше (1980), Марий Эл Республикысе кугыжаныш премийын лауреатше (1982).

Илыш корно

Тӱҥалтыш шинчымашым Йошкар-Оласе И. С. Палантай лӱмеш сем училищыште налын (1950—1954), тушто Н. А. Сидушкинын хорым дирижироватлыме классыштыже тунемын. Училищын кумшо курсыштыжо семым возаш тӱҥалын. Икымше возымыжо муро-влак лийыныт.

Училищым тунем пытарымеке, икмыняр ий тӱрлӧ олалаште шкесемын хор вуйлатышылан, шинчымашым пуышо школышто мурым туныктышылан, йоча музык школышто сольфеджио дене туныктышылан да калык семӱзгар оркестрын артистшылан пашам ыштен (контрабас балалайкым шоктен).

1965—1971 ийлаште Озаҥ консерваторийыште ончыч профессор А. С. Леманын композиций классыштыже, вара А. Б. Луппов дене тунемын. Тиде ийлаште фортепианолан пьесе-влакым, скрипке да оркестрлан концертым, пу шӱлыш семӱзгар-влаклан квартетым возен. Семмастарын усталык ойыртемже — калык сем, тудын савыртышыже да пералтышыже чыла возымаштыжат раш шижалтыт.

1970 ий гыч 1974 ий марте тудо И. С. Палантай лӱмеш сем училищыште туныктышылан тыршен.

Данилов 1974 ийыште Калык усталык пӧрт пелен чумырымо «Марий памаш» шкесемын тыршыше этнографий ансамбльлан негызым пыштыше-влак кокла гыч иктыже. Тудын вуйлатымыж почеш (1974—1988) ансамбль кугу сеҥымашыш шуын, кумдан чапланыше лийын. 1979—1980 ийласе концерт программе-влаклан ансамбльлан Олык Ипай лӱмеш премийым пуымо.

1988 ий гыч 1993 ий марте Данилов Марий Эл Республикысе уста йоча-влаклан 1-ше №-ан Калыкле президент школ-интернатыште пашам ыштен, тушто сем шинчымашым туныктен да калык ойпого кружокым вӱден.

Палемдымаш

Литератур

• Композиторы и музыковеды Республики Марий Эл : Справочник. — Йошкар-Ола, 2006. — ISBN 5-87898-318-4.
• Данилов Виктор Петрович // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 103—104. — 2032 экз. — ISBN 5-87898-357-0.
• Артищева Р. В., Мочаев В. А. Данилов Виктор Петрович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 118. — 606 с. — 1500 экз. — ISBN 978-5-905314-35-3.