Горянский, Юрий Леонидович

Юрий Леонидович Горянский
Шочмо кече	1 вӱдшор 1929(1929-04-01)
Шочмо вер	Донецк, Донецк область, Украин ССР[d], СССР
Колымо кече	5 вӱдшор 2005(2005-04-05) (76 ий)
Колымо вер	Йошкар-Ола, Марий Эл Республик, Россий
Гражданлык	СССР →  Россий
Паша сомыл	агроном, депутат
Награде да премий

Ю́рий Леони́дович Горя́нский (1 вӱдшор 1929, Донецк, Донецк область, Украин ССР^[d], СССР — 5 вӱдшор 2005, Йошкар-Ола, Марий Эл Республик, Россий) — совет да российысе ялозанлык пашаеҥ. Марий АССР ялозанлык министр (1975—1978), Марий АССР-ын / Марий Эл Республикын Медведево районысо «Семёновский» племзаводын директоржо (1982—2000). Марий Эл Республикын Рӱдӧ сайлыше комитетын председательже (1999—2000). РСФСР-ын сулло агрономжо (1987), Марий Эл Республикын сулло агрономжо (1999). КПСС йыжыҥъеҥ.

Илыш корныжо

1929 ий 1 апрельыште Украин ССР Донецк областьысе Сталино олаште (кызыт — Донецк) 25-тӱжемыште шотлалтше пашаеҥын ешыштыже шочын.

1953 ийыште Белоцерков ялозанлык институтым тунем пытарен. Марий АССР-ыш колтеныт: район озанлыклаште агроном, 1961 ий гыч — Шернур районысо «Казанский» совхозын директоржо, 1964 ий гыч — Марий Турек районысо ялозанлык виктемын начальникше, 1966—1968 ийлаште — «Скотопром» трестын директоржо.

Марий АССР-ысе ялозанлык министрын алмаштышыже, 1975—1978 ийлаште — министрже лийын.

1978—1982 ийлаште Марий АССР-ын Медведево районысо Руэм посёлкын ялозанлык опыт станцийын директоржо. Тудын годым вӱдым шавыше (мелиоратив) отряд ышталтын, тудо вӱдан олыкым коштыктен, станцийын административ оралтыжым чоҥен, самырык специалист-влакым ямдылаш кугу тӱткышым ойырен.

1982 ийыште Марий АССР-ысе КПСС Советский райкомын икымше секретарьже лийын, тыгодымак Марий республикын Медведево районысо «Семёновский» племзаводым вуйлатен, тушто 2000 ий марте пашам ыштен. 2000 ийыште сулен налме канышыш каен.

1975—1978 да 1990—1993 ийлаште Марий Республикысе Кӱшыл Каҥашын депутатшылан сайлалтын. 1999—2000 ийлаште Марий Эл Республикын Рӱдӧ сайлыше комитетын председательже лийын.

Ялозанлыкым вияҥдымашке надыржылан 1987 ийыште «РСФСР-ын сулло агрономжо» чаплӱмым пуымо. 1999 ийыште Марий Эл Республикын сулло агрономжо лийын. Октябрь Революций орден, Паша Йошкар Тисте орден, «Чап тамга» орден (кок гана) да медаль-влак дене, нунын коклаштак ВДНХ-н той медальже дене, тыгак Марий АССР Кӱшыл Каҥаш Президиумын 2 чаптаныкше дене суапландаралтын.

2005 ий 5 апрельыште Йошкар-Олаште колен.

Чаплӱм ден суаптар-влак

• РСФСР-ын сулло агрономжо (1987);
• Марий Эл Республикын сулло агрономжо (1999);
• Октябрь Революций орден (1984);
• Паша Йошкар Тисте орден (1975);
• «Чап Тамга» орден (1965, 1971);
• ВДНХ-н той медальже (1970);
• «Чапле пашалан. Владимир Ильич Ленинын шочмыжлан 100 ий темме лӱмеш» лӱмгече медаль;
• Марий АССР Кӱшыл Каҥаш Президиумын Чаптаныкше (1979, 1989).

Палемдымаш

Литератур

• Горянский Юрий Леонидович // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 95. — 2032 экз. — ISBN 5-87898-357-0.
• Горянский Юрий Леонидович // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 312. — 872 с. — 3505 экз. — ISBN 978-5-94950-049-1.
• Мочаев В. А., Кутюков В. Г. Горянский Юрий Леонидович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 109. — 606 с. — 1500 экз. — ISBN 978-5-905314-35-3.