Некрасова, Галина Фёдоровна

Галина Фёдоровна Некрасова
Шочмо кече	16 ӱярня 1920(1920-03-16)
Шочмо вер	Базарный Урень[d], Симбирск уезд[d], Симбирск губерний[d], РСФСР
Колымо кече	11 ӱярня 1995(1995-03-11) (74 ий)
Колымо вер	Йошкар-Ола, Марий Эл Республик, Россий
Гражданлык	Россий империй →  СССР →  Россий
Паша сомыл	комсомол пашаеҥ, депутат, педагог
Награде да премий	Марий АССР Кӱшыл Каҥаш Президиумын Чаптаныкше (1946)

Гали́на Фёдоровна Некрáсова (16 ӱярня 1920, Базарный Урень^[d], Симбирск уезд^[d], Симбирск губерний^[d], РСФСР — 11 ӱярня 1995, Йошкар-Ола, Марий Эл Республик, Россий) — совет комсомол да мер-политике пашаеҥ, туныктышо. Марий АССР Кӱшыл Каҥашын IV созывысе Председательжын алмаштышыже (1955—1959), ВЛКСМ Марий обкомын икымше секретарьже (1949—1955). ВЛКСМ ЦК-н йыжыҥъеҥже, ВЛКСМ-ын XII погынжын делегатше. 1942 ий гыч ВКП(б)-ын йыжыҥъеҥже.

Илыш корныжо

1920 ий 16 мартыште кызытсе Ульяновск областьысе Карсун район Базарный Урень ялысе чодыразын ешыштыже шочын.

1932 ийыште ешыж дене пырля Йошкар-Олаш илаш куснен, тушто 6 №-ан кыдалаш школым тунем пытарен. 1935 ийыште комсомол ушемыш пурен. 1941 ийыште Марий педагогике институтын руш йылме да сылнымут факультетшым тунем пытарен, тушто комсомол организатор семын шкенжым ончыктен. 1941 ий декабрь тылзе гыч ВЛКСМ Марий обкомышто: пропаганде да агитаций пӧлкан инструкторжо, кугурак класслаште тунемше да пионер-влак кокласе паша шотышто секретарь, пропаганде да агитаций шотышто секретарь, 1949—1955 ийлаште — икымше секретарь. ВЛКСМ ЦК-ш сайлалтын, ВЛКСМ-ын XII погынжын делегатше лийын, XVII Марий кундемысе партий конференцийыш сайлалтын.

1942 ийыште ВКП(б)-ш пурен. 1951—1959 ийлаште Марий АССР Кӱшыл Каҥашын III да IV созывласе депутатше, 1955—1959 ийлаште — МАССР Кӱшыл Каҥашын IV созывысе председательжын алмаштышыже лийын.

1956 ийыште туныктымо пашаш куснен: Н. К. Крупская лӱмеш марий кугыжаныш педагогике институтысо педагогике кафедрын туныктышыжо, ассистентше. 1966—1971 ийлаште — Йошкар-Оласе 23 №-ан кыдалаш школын завучшо, руш йылме да сылнымут туныктышо. Тушто тудо пионер да школышто тунемше-влак кокласе педагогике пашам вӱден. Тудын шанче пашажын темыже «Кушкын толшо тукымым ончымаште ешын, пионер да комсомол ушем-влакын иктеш ыштыме пашашт» лийын. Тудо пӱтынь ушемысе, пӱтынь российысе, республикысе совещанийлашке да семинарлашке доклад дене ушнен, чӱчкыдын районысо да ялысе школлаште уна лийын. 1971 ийыште сулен налме канышыш лектын.

Комсомол да мер-политике пашаште суапшылан Паша Йошкар Тисте орден, «Почёт Пале» орден, медаль-влак дене, нунын коклаште «Пашаште чолгалыклан» медаль дене, тыгак ВЛКСМ ЦК-н да Марий АССР Кӱшыл Каҥаш Президиумын чаптаныкышт дене суапландаралтын.

1995 ий 11 мартыште Йошкар-Олаште колен. Йошкар-Оласе Марково шӱгарлаште тойымо.

Суаптар-влак

• Паша Йошкар Тисте орден (1951);
• «Почёт Пале» орден (1946);
• «Пашаште чолгалыклан» медаль (1946);
• «Чапле пашалан. Владимир Ильич Ленинын шочмыжлан 100 ий темме лӱмеш» лӱмгече медаль;
• ВЛКСМ ЦК-н Чаптаныкше;
• Марий АССР Кӱшыл Каҥаш Президиумын Чаптаныкше (1946).

Палемдымаш

Литератур

• Некрасова Галина Фёдоровна // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 252. — 2032 экз. — ISBN 5-87898-357-0.
• Некрасова Галина Фёдоровна // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 574. — 872 с. — 3505 экз. — ISBN 978-5-94950-049-1.
• Полубарьева В. Ю., Мочаев В. А. Некрасова Галина Фёдоровна // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 302. — 606 с. — 1500 экз. — ISBN 978-5-905314-35-3.
• Мальцев В. Э. Красной нитью прошитое время. Марийский комсомол: летопись славных дел. ― Йошкар-Ола: Издательский дом «Марийское книжное издательство», 2021. ― 400 с.: ил.

Кылвер-влак

• Листая страницы истории. К 100-летию Республики Марий Эл.