Лебедев, Михаил Васильевич

Лебедев Михаил Васильевич
Лебедев Михаил Васильевич
Шочмо кече	1921 ий 10 шыжа
Шочмо вер	Немда-Обалыш ял, Марий автоном область, РСФСР
Колымо кече	1945 ий 2 шорыкйол (23 ий)
Колымо вер	Польшо
Пурымаш	СССР
Званий
Кредалмаш/сар	Кугу Ачамланде сар

Михаил Васильевич Лебедев (10 октябрь, 1921 — 2 январь, 1945) — Кугу Ачамланде сарын салтакше, Совет Ушемын Талешкыже.

Илыш корныжо

РСФСР-ын Марий автоном областьыште, Шернур кантонысо Немда-Обалыш ялыште 1921 ий 7 октябрьыште шочын.

У Торъял педагогике училищым 1939 ийыште тунем лектын. РОНО инспекторлан пашам ыштен, 1940 ийыште комсомол путёвко дене Забайкальеш каен (5-ше стройпоезд, Монголийын мландыште пашам ыштен).

1941 ий апрельыште Чита областьысе Борзян ГВК РККА-шке налын. Кугу Ачамланде сарым Шяуляеште (Литва) вашлийын. Южо увер почеш Тӱҥ командованийын 1-ше гвардий истребитель-танк ваштареш артиллерий шапаш полкыштыжо (Касвел да Йӱдвел-Касвел фронт-влак) лийын. 1942 ий мучаште Днепропетровскысо артиллерий училищым (Томскышто верланыше) тунем лектын.

78-ше гвардий стрелок дивизийын 158-ше гвардий артиллерий полкын 8 батарейысе управленийын взвод командирже, гвардий лейтенант Михаил Лебедев 1943 ий сентябрьыште Днепр верч кредалмаште ойыртемалтын. 26 сентябрьыште тудо шке штурмоватлыше тӱшкаж дене Днепрым Домоткань села кумдыкышто (Кӱшыл Днепропетровский область, Верхнеднепровск район) форсироватлен. Плацдарм верч кредалмаште пехото-влак радамыште лийын, тушманын лӱйылтме вержым рашемден, шке батарейжын тулжым моштен виктарен, тидын дене плацдармым арален да полкысо подразделений-влаклан эҥер гоч вончаш йӧным ыштен. Икмыняр гана сусырген, но кредалме пасум коден огыл.

Тудо Бессарабий, Румыний, Польшо мланде дене кредалын эртен. Михаил Васильевич Лебедев Сандомиров плацдармыште нелын сусыргымыж деч вара, 1945 ий 2 январьыште, госпитальыште колен. Польшышто, Мелец олан рӱдӧ кумдыкыштыжо тойымо.

Суаптарже

СССР Кӱшыл Советын Президиумын 1943 ий 26 октябрьысе кӱштыкшӧ почеш патырлыкым, чолгалыкым да талылыкым ончыктымыжлан М. В. Лебедевлан Совет Союзын Талешкыже лӱмым пуымо.
Ленин орден, 1-ше степенян Ачамланде сар орден, медаль-влак.

Шарныктыш

Талешкылан мемориал оҥам Йошкар-Олаште, Немда-Обалыш ялысе школын, У Торъял ола сынан посёлкысо ондаксе педагогике училищын пырдыжлаштыже вераҥдыме.
Лебедевын лӱмжӧ дене Йошкар-Оласе да У Торъялысе урем-влак лӱмдалтыныт.
Шочмо Немда школ 1976 ийыште тыгак Талешкын лӱмжым нумалеш^[1], школышто М. В. Лебедевын музейжым почмо.
М. В. Лебедевын илышыже да сарысе талылыкше нерген марий писатель-фронтовик, Марий АССР тӱвыран сулло пашаеҥже Б. Г. Данилов «Миша-артиллерист» документ повестьым серен (1968).

Палемдымаш

↑ Постановление Совмина РСФСР от 24.05.1965 № 662 «О присвоении имён Героев Советского Союза учреждениям народного образования» (руш.). Правовая Россия (24 ага 1967). Тергыме кече: 18 вӱдшор 2019. Архивировано из оригинала 17 вӱдшор 2019 ий.

Литератур

Лебедев Михаил Васильевич // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 210. — 2032 экз. — ISBN 5-87898-357-0.
Лебедев Михаил Васильевич // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 478. — 872 с. — 3505 экз. — ISBN 978-5-94950-049-1.
Лебедев Михаил Васильевич // История Марийского края в лицах. 1941—1945 гг. Великая Отечественная война. — Йошкар-Ола: МарНИИЯЛИ, 2015. — С. 131—133. — 374 с. — 500 экз. — ISBN 978-5-94950-070-5.

Кылвер-влак

Игорь Сердюков. Лебедев Михаил Васильевич (руш.). Сайт «Герои страны». Тергыме кече: 18 ӱярня 2015.
Герои Советского Союза — Михаил Васильевич Лебедев.

[1] Постановление Совмина РСФСР от 24.05.1965 № 662 «О присвоении имён Героев Советского Союза учреждениям народного образования» (руш.). Правовая Россия (24 ага 1967). Тергыме кече: 18 вӱдшор 2019. Архивировано из оригинала 17 вӱдшор 2019 ий.

[1]