Журавлёв, Иван Никифорович

РУВИКИ-ште тыгай тукымлӱм дене вес еҥ нерген статьям лудаш лиеш: Журавлёв.

Иван Никифорович Журавлёв
Шочмо кече	28 шыжа 1927(1927-10-28) (98 ий)
Шочмо вер	Константиновка, Кечывалвел Украине ола общине[d], Вознесенск район[d], Николаев вел, Украин ССР[d], СССР
Гражданлык	СССР →  Россий
Паша сомыл	машина чоҥышо, министр, депутат
Награде да премий	Марий АССР-ын сулло машинчоҥышыжо (1987)

Ивáн Ники́форович Журавлёв (шоч. 28 шыжа 1927, Константиновка, Николаев вел) — совет да российысе административ пашаеҥ, йӧнозанлык пашаеҥ. Марий ССР Кӱшыл Каҥаш Председательын полышкалышыже (1992—1994). Марий АССР Йошкар-Оласе «Электроавтоматика» заводын директоржо (1973—1988). Марий АССР-ын сулло машина чоҥышыжо (1987). Ленин орденын кавалерже (1981). 1979 ий гыч КПСС-ын йыжыҥъеҥже.

Илыш корныжо

1927 ий 28 октябрьыште Украинын кызытсе Николаев область Арбузинка районысо Константиновка ялыште бухгалтерын ешыштыже шочын. 14 ияшыж гыч — ачалыме мастаргудышто слесарь-ӱзгарче, котельныйыште кочегар, чӧгыт дене кырыше.

1945 ий гыч — Нальчикысе машина чоҥышо заводышто токарь, мастер, цех вуйлатыше. 1959 ийыште Нальчикысе технологий техникумым, 1970 ийыште Кабардин-Балкар кугыжаныш университетым (заочнын) тунем лектын. 1973 ий марте «Севказэлектроприбор» арверым ыштыше заводышто производство да экономике дене директорын алмаштышыжлан тыршен.

1973 ийыште Марий АССР-ысе Йошкар-Олаш толын, 1988 ий марте — «Электроавтоматика» заводын директоржо. 1987 ийыште «Марий АССР-ын сулло машинчоҥышыжо» чаплӱмым пуымо. Ленин, Октябрь Революций, Пашан Йошкар Тистыже орден-влак, медаль-влак да кок гана Марий АССР Кӱшыл Каҥаш Президиумын Чапкагазше дене палемдалтын. 1977 ийыште Йошкар-Олаште тудын "Внедрение КСУКП (комплексная система управления качеством продукции) на заводе «Электроавтоматика» книгаже савыкталтын.

1979 ийыште КПСС-ыш пурен. 1988—1992 ийлаште Йошкар-Оласе исполкомын пӧлка вуйлатышыжын алмаштышыже лийын. 1992—1994 ийлаште — Марий ССР Кӱшыл Каҥаш председательын полышкалышыже. 1994—1999 ийлаште — министрын алмаштышыже, 1999—2001 ийлаште — Марий Эл Республикысе йӧнозанлык, транспорт да кыл шотышто министр.

1980—1990 ийлаште Марий АССР Кӱшыл Каҥашын X да XI созывласе депутатшылан сайлалтын.

Кызыт Йошкар-Олаште ила.

Чаплӱм ден суаптар-влак

• Марий АССР-ын сулло машина чоҥышыжо (1987);
• Ленин орден (1981);
• Октябрь Революций орден (1986);
• Паша Йошкар Тисте орден (1976);
• «Владимир Ильич Ленинын шочмыжлан 100 ий темме лӱмеш» медаль;
• «Пашан ветеранже» медаль;
• Марий АССР Кӱшыл Каҥаш Президиумын Чапкагазше (1977, 1984).

Палемдымаш

Литератур

• Андреев В. П. Страницы истории развития промышленности Марийской АССР (1945―1980 гг.) / В. П. Андреев; Мар. гос. техн. ун-т. ― Йошкар-Ола: Мар. гос. техн. ун-т, 1999. ― 129, [1] с.: ил., карт., портр.; 20 см; ISBN 5-8158-0051-1.
• Мочаев В. А. Журавлёв Иван Никифорович // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 129. — 2032 экз. — ISBN 5-87898-357-0.
• Журавлёв Иван Никифорович // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 363. — 872 с. — 3505 экз. — ISBN 978-5-94950-049-1.
• Тихонова В. И., Мочаев В. А. Журавлёв Иван Никифорович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 150. — 606 с. — 1500 экз. — ISBN 978-5-905314-35-3.