Губин, Валентин Семёнович

РУВИКИ — эрыкан энциклопедий гыч материал
РУВИКИ-ште тыгай тукымлӱм дене вес еҥ нерген статьям лудаш лиеш: Губин.
Валентин Семёнович Губин
Губин, Валентин Семёнович.jpg
Флаг
КПСС Марий обкомын икымше секретарьжын полышкалышыже
1976 — 1980
Флаг
КПСС Марий обкомысо пашам виктарыше
1988 — 1991
Флаг
КПСС-ын Волжск ола комитетын секретарьже
1973 — 1976
Шочын 1936 ий 5 шорыкйол(1936-01-05)
Губино ял, Шернур район, Марий автоном область, Угарман кундем, РСФСР, СССР
Колен 2018 ий 5 теле(2018-12-05) (82 ий)
Йошкар-Ола, Марий Эл, Россий
Партий КПСС
Шинчымаш Н. К. Крупская лӱмеш Марий кугыжаныш педагогике институт
Награде

Социалист таҥасымашын сеҥышыже — 1974

Валентин Семёнович Губин (1936 ий 5 январь, Губино ял, Шернур район, Марий автоном область, Угарман кундем, РСФСР, СССР — 2018 ий 5 декабрь, Йошкар-Ола, Марий Эл, Россий) — совет да россий партий да мер пашаеҥ. КПСС Марий обкомысо икымше секретарьын полышкалышыже, пашам виктарыше (1976—1980, 1988—1991). Йошкар-Оласе шоҥгыеҥ да эмгак-влаклан «Пӱнчер» / «Сосновая роща» пансионатын икымше директоржо (1992—2004). Марий АССР Кӱшыл Каҥашын 11-ше созывысе депутатше (1985—1990). КПСС-ын XXVI да XXVII погынжо-влакын делегатше.

Илыш корныжо

1936 ий 5 январьыште кызытсе Марий Эл Шернур район Памашсола ялсоветысе Губино ялыште[1], банк пашаеҥын ешыштыже шочын, ачаже 1941 ийыште Кугу Ачамланде сарын Калининысе фронтыштыжо колен[2][3].

1951 ийыште Марисола 7 ияш школым тунем пытарен. 1955 ийыште Васильевысе чодыра озанлык техникумым тунем лектын[2].

1958—1961 ийлаште — Казанский селасе кыдалаш школын физкультурым туныктышыжо, 1961—1964 ийлаште — ВЛКСМ Шернур райкомын кокымшо секретарьже. 1964—1967 ийлаште Шернур район исполкомын тӱвыра пӧлкам вуйлатышын олмыштыжо — республикылан пример лийше икмыняр пашалан тӱҥалтышым пыштыше: «Пагалыме колхозник» чаплӱмым пуымаш, Паша чап Шӱдырым чӱктымаш, Сымыктыш арням, уста пашазе да озанлык вуйлатыше-влаклан «канде тул» вашлиймашым эртарымаш, Кугу Ачамланде сарыште Сеҥымылан 20 ий темме лӱмеш театр пайрем да молат[2][4].

1967 ийыште — тӱвыра пашаеҥ-влакын Пӱтынь российысе погынын делегатше.

1967—1971 ийлаште — КПСС Марий обкомын инструкторжо[2].

1970 ийыште Н. К. Крупская лӱмеш Марий педагогике институтын историй пӧлкажым заочно тунем пытарен[2].

1971—1973 ийлаште — Юлсер вел исполком председательын алмаштышыже, 1973—1976 ийлаште — КПСС Юлсер ола комитетын секретарьже[2].

1976—1980 ийлаште — КПСС Марий обкомын икымше секретарьжын полышкалышыже, 1980 ий гыч — финанс-озанлык пӧлкан вуйлатышыже, 1988—1991 ийлаште — КПСС Марий обкомын пашам виктарышыже[2]. КПСС Марий обкомын икымше кум секретарьже дене пырля пашам ыштен: В. П. Никонов, И. С. Гусев, Г. А. Посибеев дене. 1981 да 1986 ийлаште КПСС-ын XXVI да XXVII погынлашке делегатлан сайлалтын.

1992—2004 ийлаште — Йошкар-Оласе шоҥгыеҥ да эмгак-влаклан «Сосновая роща» пансионатын икымше директоржо. Тыште пансионатын оралтыжым чоҥен шуктен, кумдыкшым сылнештарен, илыше-влаклан шотан илыш да пукшымо йӧным ыштен. 2003 ийыште Россий Федерацийын паша да илышйӧн вияҥмаш министр А. Починок ты верым Российыште ик эн сай тӧнежлан шотлен[2].

1985—1990 ийлаште — Марий АССР Кӱшыл Каҥашын 11-ше созывысе депутатше[2][5].

Историй шанче доктор, профессор К. Сануковын аклымыж почеш, виян, шкан акым палыше, шонен моштышо, уста пашаеҥ, шотан айдеме[2].

1968 ийыште Марий книга савыктышыште тудын «Юбилейные искры — в пламя (Об опыте массово-политической работы в период подготовки и проведения 50-летия Великой Октябрьской социалистической революции)» книгаже лектын[6]. 1986—2016 ийлаште тудын шарнымашыже-влак посна серий дене ик экземпляр тираж дене савыкталтыныт, тиде мер калыкын тӱткышыжым авалтен[2].

«Чап Тамга» орден, медаль-влак дене да кок гана — Марий АССР Кӱшыл Каҥаш Президиумын Чапкагазше дене суапландаралтын[2].

2018 ий 5 декабрьыште Йошкар-Олаште колен, туштак тойымо.

Чаплӱм да суаптар-влак

  • «Социалист таҥасымашын сеҥышыже» тамга (1974)
  • «Чап Тамга» орден (1975)[2]
  • «Чапле пашалан. Владимир Ильич Ленинын шочмыжлан 100 ий темме лӱмеш» медаль (1970)
  • «РСФСР-ысе Шемрокдымо мландым вашталтымылан» медаль (1985)
  • Марий АССР Кӱшыл Каҥаш Президиумын Чапкагазше (1965, 1986)[2]

Шарнымаш

Мер пашаеҥ В. С. Губинлан мемориал оҥа (Йошкар-Ола, Ленинский пр, 27А)

2020 ийыште мер пашаеҥ В. С. Губиным шарныме лӱмеш Йошкар-Оласе пӧртыштӧ (Ленинский пр-кт, 27А), тыште тудо 1990—2018 ийлаште илен, мемориал оҥам почыныт[7][8].

Палемдымаш

  1. ↑ Информационный ресурс Республики Марий Эл "12rus.ru" :: Сернурский район. www.12rus.ru. Тергыме кече: 31 шорыкйол 2025.
  2. ↑ 1 2 3 4 5 6 7 8 9 10 11 12 13 14 Мочаев, 2017, с. 115.
  3. ↑ губино (руш.). calameo.com. Тергыме кече: 31 шорыкйол 2025.
  4. ↑ сведения о марийском празднике | Методическая разработка по краеведению (7 класс): | Образовательная социальная сеть. nsportal.ru. Тергыме кече: 31 шорыкйол 2025.
  5. ↑ Официальный сайт Госсобрания Республики Марий Эл. old.gsmari.ru. Тергыме кече: 31 шорыкйол 2025.
  6. ↑ Юбилейные искры - в пламя (Об опыте массово-полит. работы в период подготовки и проведения 50-летия Великой Октябрьской соц. революции) - Губин Валентин Семенович. — 1968.
  7. ↑ Об установке мемориальной доски Губину Валентину Семеновичу, общественному деятелю Республики Марий Эл (руш.). gor-sobry-ola.ru. Тергыме кече: 31 шорыкйол 2025.
  8. ↑ Памятная доска В.С. Губину, Йошкар-Ола — 2ГИС (руш.). 2gis.ru. Тергыме кече: 31 шорыкйол 2025.

Литератур

  • Мочаев В. А. Губин Валентин Семёнович // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 100. — 2032 экз. — ISBN 5-87898-357-0.
  • Губина Л. Ф. Губино. Документальные очерки. — Йошкар-Ола: ООО «СТРИНГ», 2008. — 192 с.
  • Мочаев В. А. Губин Валентин Семёнович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 115. — 606 с. — 1500 экз. — ISBN 978-5-905314-35-3.
"https://mhr.ruwiki.ru/w/index.php?title=Губин,_Валентин_Семёнович&oldid=1195699" гыч налме