Аплаев, Пётр Николаевич

Пётр Николаевич Аплаев
Шочмо кече	1912 ий 1 идым(1912-09-01)
Шочмо вер	Юа села, Красноуфимск уезд, Пермь губерний, Россий империй
Колымо кече	1982 ий 6 сорла(1982-08-06) (69 ий)
Колымо вер	Юа села, Красноуфимск район, Свердловск область, РСФСР, СССР
Паша сомыл	политик
Награде да премий

Пётр Николаевич Аплаев (1912 ий 1 сентябрь, Юа, Красноуфим уезд, Пермь губерний, Россий империй — 1982 ий 6 август, туштак) — Свердловск кундем Арти велысе Манчажысе МТС-ысе трактор бригадын бригадирже. Социалист Пашан Талешкыже (1950). РСФСР Кӱшыл Советын 1-ше да 2-шо созывысе депутатше. СССР Кӱшыл Каҥашын 3-шо созыв депутатше.

Илыш корныжо

1912 ий 1 сентябрьыште Юа селасе марий ешыште (таче — Свердловск кундем Красноуфимск вел) шочын. 1932 ийыште Манчаж МТС пелен тракторист-влакым ямдылыме курсым тунем лектын.

ХХ курымын 30-шо ийлаште Свердловск кундемын мер илышыштыже чолган шкенжым ончыктен. 1936 ийыште СССР-ын Конституцийжым пеҥгыдемдыше Советын VIII черетдыме погыныштыжо лийын. Ик гана огыл РСФСР Кӱшыл Советын депутатшылан (1938–1947; 1947–1951) сайлалтын.

1937 ийыште трактор бригадын бригадиржылан шогалтыме. Тиде ийыштак Аплаевын бригадыже курал-ӱдымӧ мландын кӱкшӧ лектышыже шотышто сай сеҥымашке шуын, ик трактор дене 2267 гектар мландым савырен да СССР-ыште кокымшо верым налын. 1939 ийыште Москошто ВДНХ-н икымше Ушемгӧргысӧ ончерыште лийын. Кугу Ачамланде сар жапыште Петр Аплаевын бригадыже танк ден самолётым налаш кок миллион теҥге оксам поген. Пётр Аплаев шкежак 300 пуд пырчым фондыш пуэн, вашеш Иосиф Сталин деч таумутан серышым налын.

1949 ийыште Пётр Аплаевын бригадыже 150 гектар кумдыкан нурышто кокла шот дене кажне гектар гыч 22,33 центнер дене пырчан шурным поген. СССР Кӱшыл Каҥаш Президиумын 1950 ий 30 майысе кӱштыкше дене 1949 ийыште шыдаҥым ончен куштымаште кӱкшӧ лектышым налмылан, МТС-ын ялозанлык сатум, йӧрвар дене тӱлымӧ (натуроплате), колхозын моло тӱрлӧ сӧрымыжым тыршен шуктымылан, 1950 ийысе шошо агалан чыла тӱрлӧ ӱдышаш нӧшмым ситышын ямдылымылан Социалист Пашан Талешкыже чаплӱмым пуымо да Ленин орден ден «Сорла да Чӧгыт» шӧртньӧ медальым кучыктымо.

1951 ийыште СССР Кӱшыл Каҥашын 3-шо созывыш, черетдыме сайлымаште 284-ше №-ан Красноуфимскысе сайлыме округ деч депутатлан сайлтын.

1964 ий гыч 1971 ий марте — Юасе ялсовет вуйлатыше.

1971 ий гыч сулен налме канышыште. Шочмо селаштыже илен, 1982 ий 6 августышто колен. Шочмо селаштыже тойымо.

Тудын нерген серыме

• 1000 гектарлан верч 15-куатан трактор [Текст] /[Свердловск]: «Уральский рабочий», 1946. — 21 лыш.

Суаптар-влак

• Социалист Пашан Талешкыже — СССР Кӱшыл Каҥаш Президиумын 1950 ий 30 майысе кӱштыкше
• Ленин орден — кок гана (08.02.1947; 1950)
• Паша Йошкар Тисте орден — кок гана (30.12.1935; 30.05.1948)

Палемдымаш

Кылвер-влак

• Пётр Николаевич Аплаев  (рус.). Сайт «Герои страны».
• Музалевский М. В. Герои Социалистического Труда. Биобиблиографический словарь. — М.: РИЦ «Кавалер», 2008. — Т. 2. — 200 с.
• Лукошникова Р. А. Социокультурное развитие в 1965—1985 гг. (на материалах Курганской, Свердловской и Челябинской областях). — 198 с.
• Наши Герои Социалистического Труда в годы Великой Отечественной войны
• Мочаев В. А. Аплаев Пётр Николаевич // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 31. — 606 с. — 1500 экз. — ISBN 978-5-905314-35-3.