Муртазин, Исхак Муртазинович

Исхак Муртазинович Муртазин
Шочмо кече	1895 ий 22 шорыкйол(1895-01-22)
Шочмо вер	Пижмар, Малмыж уезд, Виче губерний, Россий империй
Колымо кече	1979 ий 6 вӱдшор(1979-04-06) (84 ий)
Колымо вер	Пижмарий, Марий Турек район, Марий АССР, РСФСР, СССР
Гражданлык	Россий империй,  СССР
Паша сомыл	колхоз звеньевой
Награде да премий

Исхак Муртазинович Муртазин (1895 ий 22 январь, Пижмар, Малмыж уезд, Виче губерний, Россий империй — 1979 ий 6 апрель, Пижмарий, Марий Турек район, Марий АССР, РСФСР, СССР) — Марий АССР Хлебниково районысо «Кураш» колхозын звеньевойжо. Марий Элыште икымше Социалистический Паша Герой (1948). Российысе Граждан сарыште да Кугу Ачамланде сарыште лийын. 1947 ий гыч ВКП(б) член.

Биографий

1895 ий 22 январьыште Татарстаныште кызыт Балтаса районысо Тошто Пижмарь ялыште шуко йочан кресаньык ешеш шочын. Калыклык шот дене — татар.

Изиж годсек киндым ончен куштышылан пашам ыштен. Йошкар Армийыште служитлен, Граждан сарыште лийын.

1923 ийыште шке ялысе калык дене пырля Марий автоном областьыш илаш куснен, тыште Пижмарий ял шочын, а 1931 ийыште «Кураш» колхоз ышталтын, туштак И. Муртазинат пашам ыштен.

1941 ий августышто угыч РККА-шке налыныт. Кугу Ачамланде сарын участникше: 1943 ий февраль гыч — 2-шо ударле армийын 98-ше корным чоҥышо посна батальонжын йошкарармеецше. 1943 ий кеҥежым чот сусырген, шола йолжым йомдарен, сарын инвалидшылан шотленыт да демобилизоватлалтын. «Сарзе суаплан» медаль дене суапландаралтын.

1943 ийыште Марий АССР Хлебниково районысо (1959 ий гыч — Марий Турек районысо) Пижмарий ялыш пӧртылын, туштыжо «Кураш» колхозын звеньевойжо лийын. Звено пашаште ончылно лийын: южо культурын шурно лектышыже гектар гыч 20 центнерым вончен, а 1947 ийыште тиде звено 8,1 гектар кумдыкышто уржа лектышым гектар гыч 31,21 центнерым налын! 1947 ийыште партийыш пурен. 1948 ийыште тудлан Социалистический Паша Герой кугу лӱмым пуымо, Ленин орден ден «Сорла ден Чӧгыт» шӧртньӧ медальым кучыктымо.

1979 ий 6 апрельыште Марий АССР Марий Турек районысо Пижмарий ялыште илыш гыч каен, тушанак тойымо.

Лӱм да награде-влак

• Социалистический Паша Герой (1948) — 1947 ийыште колхозын мом колтышашыжым шуктымаште кӱкшӧ уржа лектышым налмылан да МТС-ын пашажлан натуртӱлымашым шуктымылан да 1948 ийысе шошо агалан пырчан культур нӧшмым ситарымылан
• Ленин орден (1948)
• «Сарзе суаплан» медаль (17.02.1943)
• «Чапле паша верч. Владимир Ильич Ленинын шочмыжлан 100 ий темме лӱмеш» медаль (1970)
• Марий АССР Кӱшыл Каҥаш Президиумын чап грамотшо (1951)

Шарныш

2015 ийыште Марий Элын вӱдышӧ тоштерыштыже — Т. Евсеев лӱмеш Калыкле тоштерыште Марий Элыште икымше Социалистический Паша Герой И. М. Муртазинлан 120 ий темме вашеш «Тудо икымше лийын» ончер почылтын.

Палемдымаш

Литератур

• Книга Памяти: Вспомним их поимённо: Мари-Турекский р-н, [Рос. Федерация, Респ. Марий Эл] / Гос. Собр. Респ. Марий Эл и др.; [Редкол.: Зенкин А. А. (отв. ред.) и др.]. — Йошкар-Ола: Марийское кн. изд-во, 1994. — 403 с. — ISBN 5-7590-0566-9.
• Сорокина В. А. Муртазин Исхак Муртазинович // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 247. — 2032 экз. — ISBN 5-87898-357-0.
• Муртазин Исхак Муртазинович // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 562. — 872 с. — 3505 экз. — ISBN 978-5-94950-049-1.
• Кошкина О. А. Сельское хозяйство и колхозное крестьянство Марийской АССР в годы Великой Отечественной войны 1941—1945 гг. — Йошкар-Ола, 2010. — 247 с. — ISBN 978-5-94950-053-8.
• Сорокина В. А., Опарина Т. Т. Муртазин Исхак Муртазинович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 296. — 606 с. — 1500 экз. — ISBN 978-5-905314-35-3.

Кылвер-влак

• Герои страны. Муртазин Исхак Муртазинович