Муравьёв, Арнольд Валентинович

РУВИКИ — эрыкан энциклопедий гыч материал
РУВИКИ-ште тыгай тукымлӱм дене вес еҥ нерген статьям лудаш лиеш: Муравьёв.
Арнольд Валентинович Муравьёв
Муравьёв, Арнольд Валентинович.jpg
Шочмо кече 1936 ий 2 шыжа(1936-10-02)
Шочмо вер Кожласола ял, Звенигово район, Марий автоном область, Горький кундем, РСФСР
Колымо кече 2016 ий 24 шыжа(2016-10-24) (80 ий)
Колымо вер Йошкар-Ола, Марий Эл, Россий
Гражданлык  СССР →  Россий
Паша сомыл шанчызе, туныктышо, тоштер пашам виктарыше, историк, краевед
Награде да премий

«Пашан ветеранже» медаль  — 1984 SU Medal For Transforming the Non-Black Earth of the RSFSR ribbon.svg
Марий Эл Республикысе тӱвыран сулло пашаеҥже (2011)
Марий Эл Республикын почётан грамотыжо(2000, 2004)
«Росийысе калык-влакын югыпогышкышт надырым пыштымылан» медаль (2000)

Арнольд Валентинович Муравьёв (1936 ий 2 октябрь, Кожласола ял, Провой вел, Марий автоном область, Горький кундем, РСФСР — 2016 ий 24 октябрь, Йошкар-Ола, Марий Эл, Россий) — совет да россий шанче пашаеҥ, шымлызе-чодыратехник, тоштер пашам виктарыше, туныктышо, историк, краевед. Марий Элын Чыкма оласе Тоштер-заповедникын директоржо (1995—2002), Чыкма олаште Купеч илыш-йӱла тоштерым (1995) да О. Бендер лӱмеш койдарчык да мыскара тоштерым (1996) ыштыше. Россий историк-архивист-влак ушемын Марий кундемысе пӧлкажын икымше председательже (1994—1997), Историй да тӱвыра памятник-влакым аралыме Пӱтынь российысе обществын (ВООПИиК) Марий пӧлкажын председательже (2008—2012), ВООПИиК правленийын йыжъеҥже. Технике шанче кандидат (1968), М. Горький лӱмеш Марий политехник институтын / Марий кугыжаныш технике институтын доцентше (1969—2002). Марий Эл Республикысе тӱвыран сулло пашаеҥже (2011).

Илыш корныжо

Ялысе инженерын ешыштыже шочын. 1937 ийыште ешыж дене пырля Чыкма олаш илаш куснен. 1944 ий гыч 1948 ий марте Чыкма оласе МАО-лан 15 ий лӱмеш школышто тунемын, вара тунеммашым Чыкма оласе 1 №-ан кыдалаш школышто шуен, тудым 1954 ийыште тунем пытарен, Марий чодыра технике училищыш тунемаш пурен. Училищым 1955 ийыште тунем пытарымеке, «Марилес» трестын Визимьярысе чодыра кумдыкын Юлсер чодыра йӧнозанлыкыштыже (леспромхоз) механик-бригадирлан пашам ыштен[1].

1957 ийыште Москосо чодыра-технике институтыш (Мытищи ола) тунемаш пурен. Институтым 1961 ийыште тунем пытарымеке, Карел АССР Петрозаводск оласе Онегысе трактор заводышто инженер-конструкторлан пашам ыштен. 1963 ий гыч 1966 ий марте — Москосо чодыра-технике институтын аспирантше, шанче степеньым налаш «Пушеҥге пакетым транспортлыме йӧн гусеничный машинан савырнашыже кузе йӧным ышта» йодыш дене технике шанче кандидат диссертацийым сайын арален. Технике шанче кандидат (1968)[1].

1966 ий гыч 1969 ий марте Брянск технологий институтын доцентше лийын. 1969 ийыште М. Горький лӱмеш Марий политехник институтыш куснен. 1975 ий гыч 1979 ий марте механике факультетын деканже лийын, а 1980 ий гыч институтын чодыра да ялозанлык машина-влак кафедрын вуйлатышыжын олмыжым налын шоген[1].

2001 ий гыч — Марий Эл Республикын тӱвыра да калык кокласе кыл министерствын памятник-влакым аралыме шымлыше-йӧндарыше рӱдерын кугурак шанче пашаеҥже. Чыкма оласе тӱвыра-историй тоштер комплексын шанче ойпуышыжо[2].

2016 ий 24 октябрьыште Йошкар-Олаште колен, Чыкмаште тойымо[3][4].

Шанче да историй-краевед пашаже

А. В. Муравьёв «Трелёвочные тракторы» учебникын да 150 утла шанче пашан авторжо. Тудын вуйлатымыж почеш икмыняр кӱлешан шанче паша шукталтын: «Трелёвочный трактор-влакын ӱшанле улмыштым шымлымаш», «Валан-пакетироватлыме машина-влакын эртен кертмыштым шымлымаш» да молат[1].

Марий Элысе Чыкма ола да Юрино посёлко историйым шымлыше семын палыме. Тудо Марий кундемын да Чыкма олан историйже дене кылдалтше книга-влакым возен: «Марий кундемыште икымше типографий», «Чыкма олан вуйлатышыже Бычков П. Ф.» да молат[2]. 1995 ийыште тудын статьяже-влак «Марий калыкын историйже да тӱвыраже» республикысе школ-влакын 5–6 класслан хрестоматийышкышт пуртымо[1].

Марий Эл Чыкма оласе Тоштер-заповедникын директоржо (1995—2002), Чыкма олаште Купеч илыш-йӱла тоштерым (1995) да О. Бендер лӱмеш сатире да мыскара тоштерым (1996) ыштен[4]. Тудын вуйлатымыж почеш Чыкма олаште Пӧрт арвер сымыктыш тоштерым чоҥымо. Тудо 1995 ийыште Чыкма олаште «Бендериада» сатире да мыскара фестивальым ямдылыше-влак кокла гыч иктыже, кызыт ты пайрем республик деч ӧрдыжтат палыме[1].

Россий историк-архивист-влак ушемын Марий кундемысе пӧлкажын икымше председательже (1994—1997), Историй да культура памятник-влакым аралыме пӱтынь российысе обществын (ВООПИиК) Марий пӧлкажын председательже (2008—2012), ВООПИиК-ын правленийжын йыжъеҥже[2].

Марий Элысе «Отчина» историй-краеведений журналын тӱҥ редакторжо (2010—2016)[2].

М. Горький лӱмеш Марий политех институтын шанче паша-влак конкурсын дипломантше (1988) да «Курымеш самырык: Чыкма гимназийын 100 ияш лӱмгечыже» пашажлан «Марий Элын эн сай книгаже» конкурсын «Марий Эл Республик нерген эн сай книга» да «Чыла ешлан книга» номинацийыште дипломантше (2006)[1].

Тӱҥ шанче да историй-краевед пашаже-влак

А. В. Муравьёвын тӱҥ шанче пашаже-влакын радамышт[5][6]:

  • Трелёвочные тракторы / Е. И. Аблонский, А. В. Муравьёв, В. В. Лазарев, О. В. Федосеев. — Москва: Лесная пром-сть, 1972. — 222 с. ил.; 22 см.
  • Двигатели внутреннего сгорания лесотранспортных машин: учебное пособие по курсовому проектированию / В. С. Извеков и др.; МВССО СССР, Моск. лесотехн. ин-т. — Москва: Моск. лесотехн. ин-т, 1975. — Ч. 1: (Курс «Тяговые машины»). — 74 с.: ил., табл. — Библиогр.: с. 72—73 (24 назв.).
  • Тяговые машины. Двигатели внутреннего сгорания: методические указания по проведению лабораторных работ для студентов специальности 0519 / МВССО РСФСР, Мар. политехн. ин-т им. А. М. Горького; [сост.: Муравьёв А. В. и др.]. — Йошкар-Ола: МПИ, 1983. — 75 с.: ил., табл. — Б. ц.
  • Теория лесопромышленных тракторов и автомобилей: методические указания к выполнению заданий по самостоятельной работе студентов очной и заочной форм обучения специальностей 0519 и 0901 / МВ и ССО РСФСР, Мар. политехн. ин-т им. А. М. Горького; [сост.: А. В. Муравьёв, А. С. Лоскутов]. — Йошкар-Ола: МПИ, 1988. — 39 с.: ил. — Библиогр.: с. 37—38. — Б. ц.
  • Лесные машины. Двигатели внутреннего сгорания: методические указания к выполнению лабораторных работ для студентов специальности 17.04 / МВ и ССО РСФСР, Мар. политехн. ин-т им. А. М. Горького; [сост.: Белозёров Е. Я., Муравьёв А. В.]. — Йошкар-Ола: МПИ, 1989. — 38 с.: ил. — Б. ц.
  • Основы теории поворота лесопромышленных тракторов: метод. указания для студентов специальности 17.04 / [сост. А. В. Муравьёв]. — Йошкар-Ола: МарПИ, 1991. — 24 c.: ил.
  • Лесотранспортные машины: метод. указания к выполнению лаб. работ для студентов специальностей 26.01, 17.04 / [сост.: А. А. Братчиков, А. С. Лоскутов, А. В. Муравьёв, В. А. Новиков]. — Йошкар-Ола: МарПИ, 1993. Ч. 1: Двигатели внутреннего сгорания. — 36 c.
  • Козмодемьянск: воспоминания, очерки, рассказы / сост. А. В. Муравьёв; худож. И. А. Муравьёв. — Йошкар-Ола: Марийское книжное издательство, 1983. — 207 с.: ил. (400-летию города посвящается).
  • Муравьёв А. В. Рутка — деревня, которой нет / авт.-сост. А. В. Муравьёв. — Йошкар-Ола: Сельские вести, 2001. — 155 c.: ил.
  • Муравьёв А. В. Козьмодемьянский городской голова П. Ф. Бычков. — Йошкар-Ола, 2002.
  • Муравьёв А. В., Морозюк О. В. Вечно молодая: 100-летний юбилей Козьмодемьянской гимназии. — Йошкар-Ола: Мар. полигр.-изд. комбинат, 2006. — 183 c.: ил.

Шанчызе да краевед нерген савыктыш-влак

Умбакыже А. В. Муравьёвлан пӧлеклалтше савыктыш-влакын радамышт ончыкталтеш[5]:

  • Муравьёв Арнольд Валентинович: биобиблиогр. указ.: материалы к биобиблиогр. / [сост. Е. В. Усачёва; науч. ред. и отв. за вып. В. В. Изыкин]; МарГУ, Науч. б-ка. — Йошкар-Ола: МарГУ, 2007. — 35 c.: ил. — (Подвижники культуры Республики Марий Эл; вып. 3).

Шарнымаш

  • А. В. Муравьёвын лӱмжӧ дене Марий Элысе Чыкма олаште изурем лӱмдалтын[7].
  • Марий Элыште А. В. Муравьёвын лӱмжым тудынак ыштыме Купеч илыш-йӱла тоштер нумалеш[8].

Чаплӱм да суаптар-влак

  • Марий Эл Республик тӱвыран сулло пашаеҥже (2011)[4]
  • Марий кугыжаныш технике университетын сулло ветеранже (2001)[1]
  • Историй да тӱвыра памятник-влакым аралыше Пӱтынь российысе обществын Марий пӧлкажын пагалыме чолгаеҥже (2003)[1]
  • «Пашан ветеранже» медаль (1984)[1]
  • «РСФСР шемрокдымо мландым вашталтымылан» медаль (1987)[1]
  • «Россий калык-влакын наследийышкыже надырым пыштымылан» медаль (2000)[1]
  • СССР-ын чодыра да пум обрабатыватлыме йӧнозанлык министерствын Чапкагазше (1982)[1]
  • Марий Эл Республикын Чапкагазше (2000, 2004)[4]
  • Марий Эл Республикын архив паша шотышто Комитетын Чапкагазше (2004)[1]

Палемдымаш

  1. ↑ 1 2 3 4 5 6 7 8 9 10 11 12 13 14 Фонд № Р-1210 — Архивный путеводитель. alertino.com. Тергыме кече: 13 пургыж 2021.
  2. ↑ 1 2 3 4 МУРАВЬЁВ Арнольд Валентинович (неопр.). Марийская история в лицах. Тергыме кече: 13 пургыж 2021.
  3. ↑ Арнольд Валентинович МУРАВЬЕВ (руш.). www.marpravda.ru. Тергыме кече: 13 пургыж 2021.
  4. ↑ 1 2 3 4 Мочаев, 2017, с. 294—295.
  5. ↑ 1 2 Информационно-библиотечный центр Поволжского государственного технологического университета. ecatalog.volgatech.net. Тергыме кече: 13 пургыж 2021.
  6. ↑ Информационно-библиотечный центр Поволжского государственного технологического университета. ecatalog.volgatech.net. Тергыме кече: 13 пургыж 2021.
  7. ↑ Переулок Арнольда Муравьева на карте Козьмодемьянска с номерами домов (неопр.). mapdata.ru. Тергыме кече: 13 пургыж 2021.
  8. ↑ Музей купеческого быта. www.kmkmuzey.ru. Тергыме кече: 13 пургыж 2021.

Литератур

  • Муравьёв Арнольд Валентинович // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 246. — 2032 экз. — ISBN 5-87898-357-0.
  • Соловьёва И. Ю., Мочаев В. А., Яналова Н. А. Муравьёв Арнольд Валентинович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 294-295. — 606 с. — 1500 экз. — ISBN 978-5-905314-35-3.

Кылвер-влак

"https://mhr.ruwiki.ru/w/index.php?title=Муравьёв,_Арнольд_Валентинович&oldid=1195654" гыч налме