Йошкар-Оласе художественный училище
| Марий Эл Республикын «Йошкар-Оласе художественный училище» кугыжаныш бюджет профессионал туныктыш тӧнежше («Йошкар-Оласе художественный училище» МЭР КПБТТ) | |
|---|---|
 | |
| Негызлыме ий | 1 идым 1970 |
| Директор | Борис Владимирович Маклашин |
| Адрес | 424004, Йошкар-Ола, Водопроводный ур, 41 |
| Сайт | йоху.рф |
 |
|
«Йошкар-Ола́се худо́жественный учи́лище» кугыжаныш бюджет профессионал туныктыш тӧнеж («Йошкар-Оласе художественный училище» МЭР КПБТТ; руш. Йошкар-Олинское художественное училище) — тӱвыра да сымыктыш аланыште «живопись» да «дизайн» специальность дене еҥ-влакым ямдылыше профессионал кыдалаш шинчымашым пуышо тунемме тӧнеж. Художественный училищын учредительже — Марий Эл Республикын тӱвыра, печать да калык-влакын пашашт шотышто министерствыже[1].
Историй
Йошкар-Оласе художественный училищым 1970 ийыште Марий АССР Министр-влак Каҥашын 1970 ий 16 февральысе «Йошкар-Олаште Марий республикысе художественный училищым почмо нерген» 93-шо №-ан пунчалже почеш негызлыме. Училищыште кок пӧлкам ыштыме: художественный-сӧрастарыме да художественный-туныктымо. Марий АССР-ысе тӱвыра министр Анатолий Васильевич Красновын кӱштымыж почеш икымше директорлан Геннадий Иванович Прокушевым шогалтыме[2].
Марий республикысе художественный училищын лӱмжым 1980 ий 23 апрельыште РСФСР тӱвыра министерствын «Марий АССР-ын Йошкар-Оласе художественный училищым пашам ыштыше тунемме тӧнеж-влакын улшо лӱмерышкышт пуртымо нерген» 224 №-ан пунчалже негызеш Йошкар-Оласе художественный училище ман вашталтыме[3].
90-ше ийлаште, училищын туныкташ йӧндымӧ оралтыжлан кӧра, петыраш кӱлмӧ нерген кутыреныт. 2003 ий 3 сентябрьыште у полатым чоҥен шуктымо. Тиде кечым художественный училищын кокымшо шочмо кечылан шотлаш лиеш[4].
Художественный училищын структурыжо
Виктарыше орган-влак:
- Туныктышо-влакын каҥашышт
- Пашаче коллективын тӱшка погынжо
Филиалже уке. Кышкарыштыже «Школа креативных индустрий» посна пӧлка уло, тушто 12-17 ияш школьник-влакым «Креативные технологии» ешартыш тӱшка шинчымашым пуышо да моштымашым вияҥдыше программе почеш туныктат[1].
Туныктымо йогын-влак
Училище кечывалым туныктымо йӧн дене ончыкылык пашаеҥ-влакым тыгай пӧлкалаште ямдыла:
- сӱретсымыктыш-педагогике, «живопись» специализаций;
- сӧрастарымаш, «дизайн» пашалан.
Йошкар-Оласе художественный училище Марий Эл Республикын, сӱрет пашалан туныктышо тӱҥ тунемме тӧнежше улеш, сӱрет да прикладной сымыктыш аланыште кӱкшӧ шинчымашан профессионал-влакым ямдыла. Тунемме тӧнежын тӱҥ пашаже — шке пашам сайын палыше мастар-влакым ямдылаш, нуно туныктымо да йӧнозанлык сӧрастарыме (дизайн) аланыште гына огыл, тыгак кӱкшӧ профессионал сӱретче улмыштым кӧргӧ чон поянлыкышт, кумда тӱняончалтышышт дене ончыктен кертышт.
Туныктымо пашан йӧнжӧ-влак чын илышым ончыктымо тӧртыкын тӱҥ ойыртемже-влак негызеш чоҥалтыт, пашам сайын палыше кӱкшӧ мастарлык да кӧргӧ чон поянлык дене палемдалтыт, тидыже чын усталыкын ойыраш лийдыме ужашыже лийшаш. Шинчымашым пуымо пашаште кугу шинчымашан, моштымашан туныктышо-влак тыршат, нуно кундемысе тӱвыра да сымыктышым вияҥдаш ямде улшо, кӱкшӧ шинчымашан сӱретче-влакым ямдылат.
Училищым тунем лекше-влак тӱвыра да сымыктыш тӧнежлаште пашам ыштат:
- йоча художественный школлаште, изостудийлаште, тӱшка шинчымашым пуышо школлаште да школ деч ончычсо тӧнежлаште сӱрет сымыктышлан шӱмаҥдат;
- художественный произвоство мастаргудылаште, конструктор, рекламе да проект бюролаште, театр, тоштер, дизайнер студийлаште сӧрастарыше сӱретче-оформительлан тыршат[3].
Директор-влак
- Геннадий Иванович Прокушев (1970—1973)
- Александр Фёдорович Новосёлов (1973—1978)
- Георгий Валерианович Тайгильдин (1978)
- Владимир Андреевич Иванов (1978—1983)
- Юрий Петрович Клюкин (1983—1994)
- Валерий Александрович Чеботкин (1994—1999)
- Александр Антонович Селиванов (1999—2000)
- Борис Владимирович Маклашин (2000 ий гыч)[4]
Кумдан палыме туныктышо-влак
- Надежда Анатольевна Лыкова — тӱвыра да сымыктыш аланыште «Эн сай туныктышо — 2025» XVIII республикысе конкурсын сеҥышыже.
- Иван Иванович Стан — живопись, график да скульптур мастар.
- Анна Андреевна Санникова — «Российысе сӱретче-влак ушем» ВТОО-н Марий кундемысе пӧлкажын председательже.
- Татьяна Вениаминовна Сагельдина — Марий Эл сӱретче-влак ушемын йыжъеҥже.
- Наталия Борисовна Товарова-Кошкина — Российысе сӱретче-влак ушемын йыжыҥъеҥже.
Кумдан палыме выпускник-влак
- Иван Ямбердов — марий сӱретче, Россий Федерацийын сулло сӱретчыже, Марий Эл Республикын калык сӱретчыже, Марий ССР сымыктышын сулло пашаеҥже, Марий Эл Республикысе А. В. Григорьев лӱмеш кугыжаныш премийын лауреатше.
- Евгений Яранов ― совет да российысе сӱретче, мер пашаеҥ, Россий Федерацийын сулло сӱретчыже, Марий Эл Республикысе А. В. Григорьев лӱмеш кугыжаныш премийын да Олык Ипай лӱмеш Марий комсомолын премийын лауреатше.
- Сергей Таныгин — российысе да марий театрысе сӱретче, художник-постановщик, живописец, Марий Эл Республикын сулло сӱретчыже, «Шӧртньӧ маске» российысе калыкле театр премийын, Марий Эл республикысе кугыжаныш премийын да Йыван Кырла лӱмеш калыкле театр премийын лауреатше.
- Валерий Чеботкин — совет да российысе сӱретче, туныктышо, Марий Эл Республикысе А. В. Григорьев лӱмеш кугыжаныш премийын лауреатше, Марий Эл Республикын сулло сӱретчыже[4].
- Валерий Младшев — совет да российысе сӧрастарыше сӱретче, декоративно-прикладной сымыктышын мастарже, Россий Федерацийысе тӱвыран сулло пашаеҥже.
Палемдымаш
- ↑ 1 2 Йошкар-Олинское художественное училище (руш.). Тергыме кече: 27 кылме 2025.
- ↑ Йошкар-Олинское художественное училище. Подробная информация: расписание, фото, адрес и т. д. на официальном сайте Культура.РФ (руш.). Культура.РФ. Тергыме кече: 27 кылме 2025.
- ↑ 1 2 Устав Йошкар-Олинского художественного училища.doc - Яндекс Документы. docs.360.yandex.ru. Тергыме кече: 2 теле 2025.
- ↑ 1 2 3 Школа одарённых: Йошкар-Олинскому художественному училищу – 50 лет | Национальная библиотека имени С.Г. Чавайна Республики Марий Эл (руш.). nbmariel.ru. Тергыме кече: 27 кылме 2025.
