Данилов, Сергей Ксенофонтович
| Сергей Ксенофонтович Данилов | |
|---|---|
 | |
| Шочмо кече | 24 шорыкйол 1977 (49 ий) |
| Шочмо вер | |
| Гражданлык | |
| Тунеммаш | |
| Профессий | театр актёр |
| Награде | |
Сергей Ксенофонтович Данилов (шоч. 24 шорыкйол 1977, Кораксола (Морко ола шотан илем), Марий Автоном Совет Социализм Республик) — Российысе актёр, тӱвыра пашаеҥ. Марий Эл Республикын калык артистше (2020)[1], Марий Эл Республикын сулло артистше (2013).
Илыш корно
1977-ше ий 24-ше январьыште Марий АССР-ысе Морко район Кораксолаште шочын. Даниловмыт ешыште вич йоча гыч кугуракше лийын. Ачаже, усталык шӱлышан да музыклан шӱмаҥше айдеме, Тӱвыра пӧртыштӧ пашам ыштен, гармонь да тӱмыр дене шоктен. Изиж годым Сергей кушташ да тӱмырым кыраш йӧратен, ачажын репетицийже годым кулисе шеҥгелне шоген[2].
Шӱргыял кандашияш школышто шинчымашым поген. Тунемме жапыште драмкружокыш коштын, шке гыч гитар дене шокташ тунемын. Ончыч Йошкар-Оласе радиомеханике техникумыш тунемаш пураш шонен, туге гынат школым тунем пытарыме ийын М. С. Щепкин лӱмеш Кӱшыл театр училищыш калыкле курсым погымо нерген увертареныт. Класс вуйлатышын темлымыж почеш Данилов М. Шкетан лӱмеш Марий калыкле драме театрыште колыштмаште шке вийжым терген, прозо гыч ужашым, почеламутым лудын, гитаре почеш мурым мурен да калык куштымашым куштен. Ойырымашым эртымеке, Данилов «Щепкын» студентше лийын[2].
Москошто 1990‑ше ийла кыдалне ялысе рвезылан куштылго лийын огыл. Курсын мастерже Владимир Монахов студентын шӱлыкан улмыжым ужын да ача семын тунеммым кудалташ темлен. Тидыже ий гай йӱштӧ вӱд леҥеж дене чывылтыме гаяк лийын: «Кудалташ? Мыланем ӱшаныше мастер ден ача-авам йӧндымыш лукташ? Уке. Мый чыла кертам. Мый тунемам да сай актёр лиям», — шоналтен тунам Данилов.
1998-ше ийыште М. С. Щепкин лӱмеш Кӱшыл театр училищым (художественный вуйлатышыже — И. В. Лях) тунем пытарен[3]. Тиде ий гычак М. Шкетан лӱмеш марий калыкле драме театрын актёржылан ышта[4].
Усталык
Училищыште палемдыме ойыртемалтше койышан актёрын амплуаже Даниловлан шоҥгыеҥышкат, комедий персонажышкат моштен савырнаш йӧным ыштен. 26 ияшыж годым тудо Метрийым, 40 ияш шуко ужшо, йӱаш йӧратыше ватан марийым, «Кум кечылан у кува» спектакльыште модын[2]. Икымше эн кугу рольлан театрын кумдан палыме «Ачийжат-авийжат…» спектакльыштыже чоҥымо Санун образше шотлалтеш[2].
Микуш («Монча кечын»), Хлестаков («Тергыше»), Гремио («Торешвате»), Демьян Лукич («Самырык эмлызын шарнымашыже-влак») да моло роль-влакымат устан чоҥен[2].
Семӱзгарым ямдылымаш
Сергей Данилов Марий Элыште да Российыште тошто кидпашам умбакыже шуйышо, марий калыкын шӱвыржым ыштыше икте веле улеш[4][5][2].
Икымше шӱвырым 2006-шо ийыште ыштен. Мастар Александр Рыбаков дене палыме лийын да тудын деч ты пашалан тунемын. Ямдылыме шӱвыр дене Словакийыште фестивальыште лийын да семӱзгарым верысе тоштерлан пӧлеклен[2].
Умбакыже тӱмырым, тӧтрет пучым, шиялтышым да кӱслемат ышташ тунемын[2]. Ямдылыме паша деч посна ятыр марий семӱзгар дене мастарын шокта: шӱвыр, тӱмыр, шиялтыш, гармонь да молат. Концерт программылаште да театр пелен чумыргышо шӱвырзӧ-влакын ансамбльыштышт чолган участвоватла[4][5].
Туныктымо паша
Сергей Данилов П. И. Чайковский лӱмеш йоча сымыктыш школышто туныкта[4].
Роль да спектакль-влак
- М. Шкетан «Ачийжат-авийжат!..» — Сану (1998)
- М. Шкетан «Эреҥер» — Вачай (1998)
- Ж. Б. Мольер «Помыш кишке» — Дамис (1998)
- В. Пектеев, Ю. Байгуза «Окса тул» — Вачий (1999)
- С. Николаев «Салика» — Онтон (1999)
- Л. Принаделло «Айдеме, янлык да чон яндарлык» — Джильо (2001)
- Н. Арбан «Кеҥеж йӱд» — Мичуш (2001)
- В. Абукаев-Эмгак «Ош кече йымалне» — Сармаш (2002).
- М. Бартенев «Окмак Йыван нерген йомак» — Ик шылше (2002)
- Ш. Башбеков «Кум кечылан у кува» — Метрий (2003)
- С. Николаев «Салика» — Онтон (2004)
- З. Долгова «Пысман корем» — Семен Никифорович (2005)
- А. Волков «Каче-влак» — Тимошка (2005)
- В. Шекспир «Кожла кокласе омо» — Милак (2006)
- З. Долгова «Ӱдыр сий» — Опонька Лазыр (2007)
- Ф. Буляков «Эрта ӱмырем, кодеш кумылем» — Григорий (2008)
- М. Шкетан «Ачийжат-авийжат!..» — Йыван (2008)
- Ю. Соловьёв «Йыван Кырла» — Шайдуллин (2009)
- А. Копков «Кок почан янлык» — Метрий (2009)
- Н. Арбан «Кеҥеж йӱд» — Мичуш (2009)
- В. Гуркин «Вучо мане, пӧртылам» — Иван Дементьевич (2009)
- В. Абукаев-Эмгак «Кайыккомбо кашта» — Салтак (2011)
- В. Регеж-Горохов «Кугезе муро» — Чокий (2011)
- И. Зайниев «Поро пошкудо — пел кудо» — Марс (2011)
- Н. Пушкина, С. Яндукова «Юмынӱдыр» — Салий (2012)
- М. Рыбаков «Морко сем» — Миклай (2012)
- А. Волков «Оръеҥ мелна» — Валерий (2013)
- Г. Гордеев «Шкетан» — Эчан (2013)
- Н. Коляда «Шанель Тарля» — Сергей (2013)
- А. Тарасов «Монча кечын» — Микуш (2014)
- Г. Гордеев «Сӧсна поминка» — Патай Сопром (2014)
- Ю. Байгуза «Кресӱдыр» — Ача (2015)
- Ф. Шиллер «Осал чоялык да йӧратымаш» — Гофмаршал фон Кальб (2016)
- Н. Арбан «Тулар ден тулаче» — Малашкин, Матильда (2017)
- М. Шкетан «Эреҥер» — Вачай (2017)
- А. Островский «Чын улат — сай, пиалан гын — сайрак» — Глеб Меркулыч (2018)
- С. Кантерво, В. Овчинников «Вий-ар-ме» — Нужгол (2018)
- Н. Коляда «Морозко» — Иванушка (2018)
- А. Волков «Йорга вате» — Паймаков (2018)
- А. Островский «Кӧ кечым пӧртылта» — Изерге (2018)
- А. Спиридонов, А. Мокеев «Югорно» — Уверче (2018)
- З. Хаким «Ӱжында?» — Федос (2018)
- С. Николаев «Салика» — Чопай (2019)
- Н. Кузьминых «Нӧнчык патыр» — Пайберде (2019)
- Чаба Секей «Илена йӱлена» — Иллеш (2019)
- С. Пектеев «Йыван Кырла. Путевка в жизнь» — (2020)
- Ю. Байгуза, В. Пектеев «Окса тул» — Рвезе, Овда, Киямат суас (2020)
- В. Матвеев «Ава капитал» — Следователь (2020)
- З. Долгова, С. Яндукова «Ший Пампалче» — Паймет (2020)
- З. Долгова «Маринавт-влак але Теве кушто илышет» — Лож-Вож (2021)
- С. Пектеев «Фолкс» — Кугезе (2021)
- В. Шекспир «Торешвате…» — Гремио (2022)
- В. Пектеев «Кум ака-шӱжар» — Пий (2021)
- Н. Гоголь «Тергыше» — Хлестаков (2022)
- В. Шекспир, Ф. Гладков «Гамлет. Машина. Цемент» — Артист, Громада (2022)
- А. Богачева «Китай кува» — Игорь Андреевич (2022)
- В. Пектеев «Йӧратымашын акше» — Иван Янгелдович (2022)
- С. Чавайн «Мӱкш отар» — Ондри (2023)[6]
- А. Яковлев, С. Тимошенко «Кавасе алаша» — Саша чӱчӱ (2025)[7]
- Санян Вачи «Колумб» — Капитонов (2025)[8]
- М. Булгаков «Самырык эмлызын шарнымашыже-влак» — Демьян Лукич (2025)[9]
- З. Долгова «Кубик Метри» — Метри (2026)
Еш
Ватыже — Марина Почтенева, Марий Эл Республикын сулло артисткыже. Кок эргышт уло. Спорт мероприятийлаште таҥаса, профсоюз рескомын чапкагазше дене палемдалтын[4].
Чаплӱм-влак
- Марий Эл Республикын Тӱвыра, печать да калык-влакын пашашт шотышто министерствыжын Чапкагазше (2004)[4];
- Марий Эл Республикын Кугыжаныш Погынжын Чапкагазше (2008)[4];
- Марий Эл Республик Виктерын Чапкагазше (2009);
- Марий Эл Республикын сулло артистше (2013);
- Марий Эл Республикын калык артистше (2020)[1].
Палемдымаш
- ↑ 1 2 Артисту марийского национального театра Марий Эл присвоено звание народного, <https://www.marpravda.ru/news/religiya/artistu-mariyskogo-natsionalnogo-teatra-mariy-el-prisvoeno-zvanie-narodnogo/>. Тергыме: 18 пеледыш 2026.
- ↑ 1 2 3 4 5 6 7 8 Слуга двух муз / Народный артист Марий Эл Сергей Данилов: «Вдохновение посылается свыше», 2026-03-12, <https://www.marpravda.ru/news/religiya/narodnyy-artist-mariy-el-sergey-danilov-vdokhnovenie-posylaetsya-svyshe/>. Тергыме: 18 пеледыш 2026.
- ↑ ВТУ им. Щепкина: Сергей Данилов. shepkin.theatre.ru. Тергыме кече: 18 пеледыш 2026.
- ↑ 1 2 3 4 5 6 7 Данилов Сергей Ксенофонтович, <https://marihistory.ru/2011-01-01-19-53-52/32958-danilov-sergej-ksenofontovich.html>. Тергыме: 18 пеледыш 2026.
- ↑ 1 2 Марийские национальные инструменты — Республиканский центр марийской культуры, <https://mari-centr.ru/node/3994>. Тергыме: 18 пеледыш 2026.
- ↑ Данилов Сергей Ксенофонтович – М.Шкетан лӱмеш Марий кугыжаныш драме театр, <https://shketan.ru/workers/danilov-sergej-ksenofontovich/>. Тергыме: 18 пеледыш 2026.
- ↑ Кавасе алаша / Небесный тихоход – мурсем комедий. 12+, <https://shketan.ru/piece/kavase-alasha-nebesnyj-tihohod/>. Тергыме: 18 пеледыш 2026.
- ↑ Колумб – М.Шкетан лӱмеш Марий кугыжаныш драме театр, <https://shketan.ru/piece/kolumb/>. Тергыме: 18 пеледыш 2026.
- ↑ Записки юного врача – театр им. М.Шкетана. г. Йошкар-Ола., <https://shketan.ru/piece/zapiski-yunogo-vracha/>. Тергыме: 18 пеледыш 2026.
