Пушкина, Наталья Васильевна
| Наталья Васильевна Пушкина | |
|---|---|
 | |
| Шочмо кече | 1979 ий 18 идым (46 ий) |
| Шочмо вер | РСФСР, Марий АССР, Морко кундем, Марий Кужер ял |
| Гражданлык |
 СССР Россий |
| Паша сомыл | тӱвыра, политик, мер паша |
| Ача | Пушкин Василий Михайлович |
| Ава | Пушкина Нина Николаевна |
| Пелаш | Чемышев Андрей Валерьевич |
| Икшыве-влак | Эрвина (2019) |
| Награде да премий |
|
Наталья Васильевна Пушкина (шоч. 18 идым 1979, Марий Кужер, Марий Автоном Совет Социализм Республик) — журналист, тӱвыра, мер да кугыжаныш пашаеҥ. Марий Эл Республик VII созыв Кугыжаныш Погынын депутатше[1], Россий марий-влакын федерал калыкле-тӱвыра автономийжын исполнительный директоржо[2], «Калык-влак кокласе журналистике гильдий» регион-влак кокласе мер организацийын Марий Элысе пӧлкажым вуйлата[3]. Марий Эл Республикысе Олык Ипай лӱмеш Кугыжаныш самырыктукым премийын лауреатше (2006), Марий Эл Республикысе тӱвыран сулло пашаеҥже (2020).
Илыш корныжо
Наталья Пушкина 1979 ийын идым тылзын 18-ше кечынже Морко кундем Марий Кужер ялеш шочын. Визымше классыште тунеммыж годым ешыж дене пырля пошкудо Ердӱр ялыш илаш куснен, санденак, южгунам Наташа Пушкинан шочмо верже семын Ердӱр ялым возат.
1997—1999 ийла — Йошкар-Оласе 16-шо №-ан Чоҥышо управленийын штукатур-малярже.
2004—2005 ийла — Н. К. Крупская лӱмеш марий кыжаныш педагогике институтын кадр отделын специалистше.
2005—2015 ийла — «Марий Эл Радио»-н тӱҥ редакторжо.
2015—2023 ийла — Республикысе марий тӱвыра рӱдер-ын директоржо[4].
2019 ий гыч — Марий Эл Республикын шымше созыв Кугыжаныш Погынжын депутатше[1].
2023—2024 ийла — Йошкар-Оласе 15-ше номеран школын директоржын алмаштышыже.
2024 ий гыч — Йошкар-Оласе 32-шо номеран школын директоржо[5].
Наталья Пушкина «Саскавий» ӱдырамаш ушемын йыжыҥъеҥже. «У вий» самырык-влакын ушемыштлан негызым пуышо-влак коклаште лийын. Марий КВН-ым лач тудо шке йолташыже-влак дене пырля тӱҥалын. У семын шонымыж дене марий концерт да дискотеке-влаклан у шӱлыш ден у сыным пуэн, у формат-влакым тӱвыра мероприятий-влаклан темлен. Тыгак тудын сценарийже почеш икымше марий мюзиклым шындыме.
Образований
2004 ийыште Н. К. Крупская лӱмеш марий кугыжаныш педагогике институтым «Марий йылмым да литературым, руш йылмым да литературым туныктышо» специальность дене тунем лектын[6].
2015 ийыште — Марий кугыжаныш университетыште «Филологий магистр» специальностьым нальын.
2018 ийыште — Юл кундемысе кугыжаныш технологий университет-ым «Кугыжаныш да муниципал управлений» специальность дене тунем пытарен[7].
Тукымлӱм нерген
Тукымлӱмжым ачаж деч налын, ачаже — коваж деч. Ачаже интернатыште кушкын, тушто тудым кован фамилийже почеш возеныт. Марлан лекмыж деч вара тудо Эстонийыш стажировкыш ик ийлан кайышаш лийын. Чыла кагаз-влакым ӱдыр фамилийжылан возеныт, сандене, ЗАГС-ыште шке фамилийжым вашталтен огыл. Йошкар-Олаш пӧртылмыжо деч вара ты фамилий денак кодын.
Муро-влак
Наташа Пушкина мурызо семын шуаралтын. Чыныжым, тиддеч ончычат ятыр муро-проектлаште йӱкшым колышташ йӧн лийын, но 2010 ий гыч сольный проектшым тӱҥалеш. 2012 ий гыч эше «Волгыдо» эстраде муро ансамбльым чумыра, тудын дене пырля гастрольлашке коштеш. Дмитрий Чайников, Володя Матвеев дене пырля мурым возеныт.
Дискографий
- «Йоча муро» — кок дискан йоча-влаклан пӧлеклалтше муро-караоке проект.
Еш
- Ачаже — Пушкин Василий Михайлович, агроном, ферме вуйлатыше.
- Аваже — Пушкина Нина Николаевна, бригадир, клуб вуйлатыше.
- Пелашыже — Чемышев Андрей Валерьевич — шанчызе, компьютерный лингвист, ЙСИШМИ-н шанче пашаеҥже.
- Ӱдыржӧ — Эрвина (2019).
Суаптар да чаплӱм
Марий Эл Республикысе Олык Ипай лӱмеш Кугыжаныш самырыктукым премий, «Марий Эл Радио»-н коллективше: Карпов Сергей Владимирович, Кожевников Александр Геннадьевич, Чемышева Марина Витальевна, Якаева Ирина Геннадьевна дене пырля «Марий йӱла» («Марийские обычаи»), «Марий географий» («Марийская география»), «Семсалма» («Музыкальный диск»), «Мыскара йӧрвар» («Юмористическая заварушка»), «Тукым вож» («Корни») цикл передаче-влаклан"[8] (2006);
Марий Эл Республик Виктерын Чапкагазше;
Марий Эл Республикысе тӱвыран сулло пашаеҥже — Марий тӱвырам вияҥдымашке надырлан да шуко ий пашам тыршен ыштымылан[9] (2020).
Палемдымаш
- ↑ 1 2 Пушкина Наталья Васильевна (руш.). Государственное Собрание Республики Марий Эл. Государственное Собрание Республики Марий Эл.
- ↑ Структура (руш.). Общественная организация «Федеральная национально-культурная автономия марийцев России». Общественная организация «Федеральная национально-культурная автономия марийцев России».
- ↑ Национальный акцент (руш.). nazaccent.ru. Тергыме кече: 4 сӱрем 2024.
- ↑ Наталья Пушкина покинула пост директора Республиканского центра марийской культуры, 12.09.2023, <https://kidsher.ru/ru/news/44796/>.
- ↑ Директором новой школы в Йошкар-Оле стала Наталья Пушкина (руш.). Новости Марий Эл - Новости Йошкар-Олы - ГТРК «Марий Эл». Тергыме кече: 4 сӱрем 2024.
- ↑ Депутаты Государственного Собрания Республики Марий Эл 7 созыва. gsmari.ru. Тергыме кече: 26 теле 2024.
- ↑ О директоре, <https://mari-itschool.ru/o-direktore/>. Тергыме: 26 теле 2024.
- ↑ Лауреаты премии имени Олыка Ипая. Библиографический указатель. Национальная библиотека им. С. Г. Чавайна. Йошкар-Ола. 2012. C. 88-89.
- ↑ Указ Главы Республики Марий Эл от 25 марта 2020 г. № 55 «О присвоении почетного звания „Заслуженный работник культуры Республики Марий Эл“ Николаевой Р. П. и Пушкиной Н. В.».
Кылвер-влак
- Депутаты Государственного Собрания Республики Марий Эл 7 созыва. gsmari.ru. Тергыме кече: 6 шыжа 2025.
 |
|---|
