Бычков, Павел Фёдорович

РУВИКИ-ште тыгай тукымлӱм дене вес еҥ нерген статьям лудаш лиеш: Бычков.

Павел Фёдорович Бычков
П. Ф. Бычков, 1900-ше ийла
Шочмо кече	2 (14) сӱрем 1844 ий(1844-07-14)
Шочмо вер	Сӱвыль
Колымо кече	1925 ий 12 шыжа(1925-10-12) (81 ий)
Колымо вер	Чыкма
Гражданстве	Россий империй  СССР
Паша	амалкалче, Кугыжаныш думын IV созывысе депутатше
Верам кучымаш	православий
Партий	октябрист
Суаптар

Павел Фёдорович Бычков (2 [14] сӱрем 1844, Сӱвыль, Озаҥ губерний — 12 шыжа 1925, Чыкма, Марий Автоном Совет Социализм Республик) — амалкалче, Кугыжаныш думын Озаҥ губерний деч IV созывысе депутатше.

Илыш корно

Цивильск олаште 2-шо гильдиян купеч Фёдор Гаврилович Бычковын (1810—1890) да тудын ватыже Анна Степановнан, ӱдыр фамилийже Карпова, (1817—1902) ешыштышт шочын. Цивильск уезд училищым тунем пытарен. 1864 ийыште Цивильск гыч Чыкмаш илаш куснен. 1874 ийыште 2-шо гильдийысе купеч-влак радамыш пурен. 1879 ийыште арака заводым налын, тудым Яков шольыжо вуйлатен. Шурным ужалкален. Полто да сыра завод-влакын озаже лийын. Кермыч заводын озаже. Арда эҥерыште ложашым йоҥыштышо вӱдвакшыже, Когосир ялыште мардеж вакшыже лийын. 1913 ийыште Чебоксарыште сырам тӱшка ак дене ужалыше клатше, Чебоксар, Мариинский Посад олалаште, Икково, Тогаево селалаште, Исмели, Какшамарий яллаште сыра лапкыже-влак лийыныт. Бычковмыт еш тыгак Чыкман Пазар площадьыштыже унагудо ден шӱр кочмо верым кучен.

Мер калык дене паша

• 1872—1912 — Чыкма оласе думын сайлыме йыжъеҥже.
• 1875—1877, 1903—1912 — Чыкма оласе мер банкын директоржо.
• 1877—1895 — Чыкма олан вуйлатышыже.
• 1881—1896 — Чыкман чапланыше мировой судьяже.
• 1883—1887 — Чыкма уездысе да Озаҥ губернийысе земстве погын-влакын сайлыме йыжъеҥже.
• 1884 — тукым гыч тукымыш куснен толшо чапланыше гражданин.
• 1891 — Озаҥ губернийысе шотлышокомитетын йыжъеҥже.

Чыкма оласе кок классан училищылан ешартыш оралтым чоҥаш шке оксажым ойырен. 1905 ийыште шкенжын кок пачашан кӱ пӧртшын ужашыжым ӱдырамаш гимназийлан пуэн. 1882 ийыште икымше мер книгагудым почаш темлен. Озаҥ да Угарман гыч толшо актёр-влаклан кеҥеж театрым чоҥен. Тудо шоҥгыеҥ-влаклан пӧртым чоҥаш шуко оксам пуэн. 1886 ийыште метеостанцийым ышташ темлен.

Думысо пашаже

Кугыжаныш думышко 1-ше да 2-шо созывыш сайлыме годым губернийысе сайлыше лийын.

1912 ий 21 октябрьыште Озаҥ губернийысе сайлыме погынын сайлыше-влакын тӱшка погынымашышт гыч 4-ше Кугыжаныш думын депутатшылан сайлалтын. Октябрист-влакын думысо фракцийышкышт пурен, Ончыл шонымашан (прогрессивный) блокын йыжъеҥже лийын. Думын тыгай комиссийлаштыже лийын: сатулымаш да йӧнозанлык шотышто, оласе паша шотышто, суд реформо шотышто да молат. 1916 ийыште, черланымылан кӧра, депутат пашам коден.

Февраль революций деч вара

1918 ий мартыште П. Ф. Бычковлан 25 тӱжем теҥге контрибуцийым тӱлыктеныт. Тудын кермыч да сыра заводшым калык поянлыкыш савыреныт, Бычковмыт ешын пӧртыштым поген налыныт. П. Ф. Бычковым шкенжымат арестоватленыт.

Еш

• Икымше ватыже (1869 ий гыч) — Вера Васильевна, ӱдыр фамилийже Замятина (1852—1872), азам ыштышыжла колен.
• Кокымшо ватыже (1873 ий гыч) — Софья Федоровна, ӱдыр фамилийже Климина (1857—1935),
  • ӱдыр — Вера (1874—1901),
  • эрге — Михаил (1875—1945),
  • ӱдыр — Анна (1877—1942),
  • ӱдыр — Евгения (1878—1960),
  • ӱдыр — Александра (1878—?),
  • эрге — Павел (1880—1921),
  • эрге — Николай (1882—1971),
  • ӱдыр — Софья (1886—1943),
  • эрге — Геннадий (1892—1957).
• Шольыжо — Яков (1850—1911), ешан лийын, пелашыже Мария Ивановна, ӱдыр фамилийже ? (1860—1932).
• Шольыжо — Пётр (1855—1898).
• Шольыжо — Алексей (?—?).
• Шольыжо — Михаил (?—?).

Суаптар-влак

• 1879 — Йошкар Ырес Тамга.
• 1880 — «Тыршымылан» Станислав тасмасе шӧртньӧ медаль.
• 1884 — «Тыршымылан» Аннин тасмасе шӧртньӧ медаль.
• 1884 — «Тыршымылан» Владимир тасмасе шӧртньӧ медаль.
• 1891 — «Тыршымылан» Александр тасмасе шӧртньӧ медаль.
• 1894 — «Тыршымылан» Андрей тасмасе шӧртньӧ медаль.
• 1900 — 3-шо степенян Шнуй Станиславын орденже.

Палемдымаш

Литератур

• Боиович М. М. Члены Государственной думы (Портреты и биографии. Четвёртый созыв. М., 1913. c. 103.
• Четвертая Государственная дума. Портреты и биографии. — Санкт-Петербург: издание Н. Н. Ольшанскаго, 1913. С. 32.
• 4-й созыв Государственной думы: Художественный фототипический альбом с портретами и биографиями. СПб., 1913. Табл. 13.
• Николаев А. Б. Бычков, Павел Фёдорович // Государственная дума Российской империи: 1906—1917. (ред. Иванов Б. Ю., Комзолова А. А., Ряховская И. С.) Москва. РОССПЭН. 2008. с. 75—76.
• Гусаров Ю. В. Бычков, Павел Фёдорович // Чувашская энциклопедия
• Муравьёв Арн. В. Бычков Павел Фёдорович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 68. — 606 с. — 1500 экз. — ISBN 978-5-905314-35-3.

Архив

• Российский государственный исторический архив. Фонд 1278. Опись 9. Дело 112; Фонд 1349. Опись 1. Дело 542.