Бобков, Геннадий Александрович

РУВИКИ — эрыкан энциклопедий гыч материал
Геннадий Александрович Бобков
Бобков-Геннадий-Александрович-1933-2012.jpg
Шочмо кече 15 вӱдшор 1933(1933-04-15)
Шочмо вер
Колымо кече 23 ӱярня 2012(2012-03-23) (78 ий)
Колымо вер
Эл  СССР,  Россий
Шанче степень педагогике шанче кандидат
Шанче званий доцент
Шанче вуйлатыше Сермеев Борис Васильевич
Награде ден премий-влак Калык просвещенийын отличникше, Россий Федерацийын кап-кыл тӱвыран сулло пашаеҥже, Кап-кыл тӱвыра да спортын отличникше, «Чапле пашалан. В. И. Ленинын шочмыжлан 100 ий темме лӱмеш» медаль , «Паша ветеран» медаль

Геннадий Александрович Бобков (15 вӱдшор 1933, Ульяновск, Юлкыдалсе край[d] — 23 ӱярня 2012, Йошкар-Ола) — совет да россий шанче пашаеҥ, спортсмен, тренер, кӱшыл школ туныктышо. Педагогике шанче кандидат. Н. К. Крупская лӱмеш Марий кугыжаныш педагогике институтын кап-кыл куштымаш факультетын икымше деканже[1]. Россий Федерацийын кап-кыл тӱвыран сулло пашаеҥже (2002)[2].

Илыш корныжо

1933 ий 15 вӱдшорышто Ульяновск олаште шочын. 1955 ийыште П. Ф. Лесгафт лӱмеш Ленинградысе кап-кыл тӱвыра институтым  (руш.) (мар. «кап-кыл тӱвыра» специальность дене тунем пытарен, «кап-кыл куштмаш туныктышо» квалификацийым налын[3].

Бобков шуко ий Марий АССР-ысе куштылго атлетике дене погымо командын йыжъеҥже лийын, кум тӱрлӧ тӧрштылмаште, йыпшым кышкымаште да кужытыш тӧрштылмаште рекордсмен лийын[1]. Кызыт мартеат тудын 50-ше ийлаште гранатым шуымо республикысе рекордшо уэмдалтын огыл[1][4][5]. Бобков Марий Эл Республикыште бадминтонын вияҥмыжлан тӱҥалтышым пыштен. Тудын спортсменже-влак М. М. Полевщиков[6], Е. Дубинкин, В. Соколов, СССР-ын спорт мастерже  (руш.) (мар. О. Мишахина лийыныт[1][7].

Тудын темлымашыже-влак тӱшкаште 1960-шо ийла тӱҥалтыште Ялчык ер серыште спорт-тазалык лагерьым почмаш посна верым налеш[1][8].

1971 ийыште Н. К. Крупская лӱмеш Марий кугыжаныш педагогике институтышто кап-кыл куштымаш факультет почылтын. Студент-влакын тӱҥалтыш чотышт — 50 еҥ — РСФСР-ын Просвещений министерствыж дене пеҥгыдемдалтын. Факультетым почаш темлыше да икымше деканже Г. А. Бобков лийын[9], тудо факультетым 1977 ий марте вуйлатен[10].

1974—1975 ийлаште Угарманысе кугыжаныш педагогике институтын  (руш.) (мар. аспирантурыштыжо тунемын. Шанче вуйлатышыже — биологий шанче доктор, профессор Борис Васильевич Сермеев[11][3]. Н. К. Крупская лӱмеш МГПИ-ште пашам ыштышыла, Бобков кап-кыл тӱвыра да спорт аланыште шанче шымлымаш пашам возен. Педагогике шанче кандидат шанче степеньым да доцент лӱмпалым налын, тудо шуко шанче савыктышын да туныктымо йӧн-влакын авторжо улеш.

Бобков кап-кыл тӱвыра аланыште кӱкшӧ шинчымашан пашаеҥ-влакым сайын ямдылыме, тыгак спортысо тӱрлӧ-тӱрлӧ кӱкшытан таҥасымашлаште сеҥышым куштымо дене кугу пагалымашым сулен. Тӱрлӧ шӧрынан спортсмен да кӱшыл школын уста туныктышыжо семын, шке илышыжын пел курымжым таза илыш-йӱла негыз-влакым чапландарымашлан пуэн.

2012 ий 23 ӱярняште 78 ияш Йошкар-Олаште колен.

Еш

Ватыже — Людмила Владимировна Бобкова, филологий шанче кандидат, доцент, Н. К. Крупская лӱмеш Марий кугыжаныш педагогике институтын англичан йылме кафедрыштыже пашам ыштен[12].

Ойырымо савыктыш-влак

  1. Тӱрлӧ писылыкан куржталмашын физиологий ойыртемже // Циклан тӱрлӧ спортлаште физиологий да биохимий ойыртемышт шотышто 13-шо Пӱтынь ушемысе конференцийын материалже-влак. Таллин, 1974. 39-41 л.;
  2. 10-17 ияш сокыр школъеҥ-влакын тӱшка чоткыдылыкыштым вияҥдымаште у эксперимент программын пайдалыкше // Сокыр йоча-влакым туныктымо да куштымо шотышто метод. ой-влак. Угарман, 1975. 26-27 л;
  3. 10-17 ияш сокыр йоча-влакын чоткыдылыкыштым вияҥдымашке посна палемдыме (дозо) куржталмашын лектышыже // Таза да черан капыште чогашылын пашаже. Проблемный респ. сб. Угарман, 1976. 13-14 л;
  4. Начар ужшо йоча-влаклан лӱмын ыштыме школлаште кап-кыл тӱвыра дене программе. М., 1978. 73 л.;
  5. Курсовой пашам ыштыме шотышто методике ой-влак // Кап-кыл тӱвыра факультетын студентше-влаклан метод. пособий. Йошкар-Ола, 1987. 3-22 л.
  6. Куштылго атлетике да туныктымо йӧн // Кап-кыл тӱвыра факультетын заочник студентше-влаклан метод. ой-влак. Йошкар-Ола: МГПИ, 1988. 3-34 л;
  7. Полиатлонист-влакын таҥасыме пагытыште гранатым шуымаш дене тренировкым эртарыме шотышто методике ой-влак // Калык-влак кокласе полиатлон ассоциацийын шанче-метод. журналже. 1999. 1-2 №. 24-26 л[3].

Югыпого

Ий еда апрельыште Йошкар-Оласе «Марий Эл арене» куштылго атлетике манежыште иза-шольо Г. А. да Ю. А. Бобковмытым шарнымылан пӧлеклалтше куштылго атлетике дене республикысе таҥасымаш-влак эртат. Юрий Бобков (1928—1986) — Геннадийын кугурак изаже, тыгак тӱрлӧ шӧрынан чолга спортсмен, Марий Эл Республикын молотым шуымаште рекордсменже лийын. Юрий «МАССР кап-кыл тӱвыран сулло пашаеҥже» лӱмым нумалын.

Турнирын республикысе статусшым ончыде, таҥасымаш-влак почылтшо сынан улыт, да тыште Россий Федерацийын кундемлаж гыч спортсмен-влаклан вийым тергаш йӧн ышталтеш. Таҥасымашлаште Марий Эл Республикын 300 утла спортсменже, тыгак пошкудо кундем-влак гыч: Татарстан, Чуваший, Киров кундем гыч — толыт[13]. Старт-влакын программышт: куржталмаш 100 м, куржталмаш 600 м, кужытыш тӧрштылмаш, ядром кудалтымаш, 4×100 м эстафете, марий уштыш[14].

2012 ий июньышто — Г. А. Бобковын колымо ийыштыже — Марий Эл Республикын спорт чап тоштерыштыже Геннадий Александровичлан бюстым почыныт. Ты йӱлам шуктымаште тудын кап-кыл тӱвыра дене кӱкшӧ шинчымашан пашаеҥ-влакым да тӱрлӧ спортышто чыла чинан (ранган) чемпионым ямдылыме пашаште суапше палемдалтын[15][16]. Той тӱсан гипс бюстым Россий Федерацийын сулло сӱретчыже А. В. Медведев ыштен[16].

Суаптар ден чаплӱм-влак

  • Калык просвещенийын отличникше (1965);
  • Кап-кыл тӱвыра да спортын отличникше (1982);
  • Марий АССР кап-кыл тӱвыран сулло пашаеҥже (1988);
  • «Чапле пашалан. В. И. Ленинын шочмыжлан 100 ий темме лӱмеш» медаль (1970);
  • «Паша ветеран» медаль (1985);
  • Пӱтынь Российысе куштылго атлетике федерацийын дипломжо (1999)[3];
  • Россий Федерацийысе кап-кыл тӱвыран сулло пашаеҥже (2002)[17][2].

Палемдымаш

  1. ↑ 1 2 3 4 5 С Юбилеем! (руш.). newspaper.marsu.ru. Газета "Марийский университет" № 8 (770) (7 ага 2008). Тергыме кече: 5 кылме 2025.
  2. ↑ 1 2 Бобков Геннадий Александрович, <http://marihistory.ru/2011-01-01-20-13-51/27640-bobkov-gennadij-aleksandrovich.html>. Тергыме: 5 кылме 2025. 
  3. ↑ 1 2 3 4 Ученые Марийского государственного университета / Под общ. ред. А. Г. Иванова. Сост.: Г. Н. Айплатов, А. А. Иванов. — Йошкар-Ола: Мар. гос. ун-т, 2002. — С. 265. — 292 с. — ISBN 5-94808-043-9.
  4. ↑ VII Республиканские соревнования по легкой атлетике памяти братьев Бобковых. Министерство спорта Республики Марий Эл (17 вӱдшор 2019). Тергыме кече: 5 кылме 2025.
  5. ↑ Память легенд марийского спорта Геннадия и Юрия Бобковых почтили на турнире. Телеканал МЭТР (18 вӱдшор 2025). Тергыме кече: 5 кылме 2025.
  6. ↑ Полевщиков Михаил Михайлович (руш.). famous-scientists.ru. Тергыме кече: 5 кылме 2025.
  7. ↑ Степанова О. Э. Бадминтон в Марийском государственном университете // Студенческая наука и XXI век. — 2019. — Т. 16. — Ч. 2., № 1(18). — С. 145–146.. — ISSN 2308-9601.
  8. ↑ В Йошкар-Оле состоялись республиканские соревнования по легкой атлетике памяти братьев Бобковых, 2021-04-14, <https://vk.com/video-34641728_456252460>. 
  9. ↑ Антонов Андрей (11.06.2021), Спортивному факультету МарГУ – 50 лет!, <https://www.marpravda.ru/news/sport/sportivnomu-fakultetu-margu-50-let/>. Тергыме: 5 кылме 2025. 
  10. ↑ Подготовка учительских кадров в МГПИ им. Н.К.Крупской (1972–2007гг.) (руш.). museum.marsu.ru. Тергыме кече: 5 кылме 2025.
  11. ↑ Гордимся земляками. Сермеев Борис Васильевич, доктор педагогических наук, доктор биологических наук. Портал органов власти Чувашской Республики. Тергыме кече: 5 кылме 2025.
  12. ↑ В память о Людмиле Владимировне Бобковой, <https://yoshkarola.bezformata.com/listnews/pamyat-o-lyudmile-vladimirovne-bobkovoj/31827441/>. Тергыме: 5 кылме 2025. 
  13. ↑ Легкоатлеты ПФО разыграли призы соревнований памяти братьев Бобковых в Йошкар-Оле, <https://www.marpravda.ru/news/sport/legkoatlety-pfo-razygrali-prizy-sorevnovaniy-pamyati-bratev-bobkovykh-v-yoshkar-ole/>. Тергыме: 5 кылме 2025. 
  14. ↑ Положение о проведении республиканских соревнований по легкой атлетике памяти братьев Г.А. и Ю.А. Бобковых.
  15. ↑ Музей спортивной славы пополнился еще одним экспонатом (руш.). МариМедиа. Тергыме кече: 5 кылме 2025.
  16. ↑ 1 2 Ф.В.Гинзбург, Виртуальный музей образования, <https://ok.ru/group/50503034077384/topic/157397887759816>. Тергыме: 5 кылме 2025. 
  17. ↑ Бобков Геннадий Александрович – Награды России, 16 октября 2002 (руш.). ru.nagrady.by. Тергыме кече: 5 кылме 2025.

Литератур

  • Бобков, Геннадий Александрович. Особенности возрастных изменений выносливости и методика ее развития у слепых школьников : Автореф. дис. на соиск. учен. степени канд. пед. наук : (13.00.04). — Москва : [б. и.] : Гос. Центр. ин-т физ. культуры, 1978. — 18 с.
  • Бобков Геннадий Александрович // Учёные Марийского государственного университета. — Йошкар-Ола: МарГУ, 2002. — С. 265—266. — 292 с. — 1000 экз. — ISBN 5-94808-043-9.
"https://mhr.ruwiki.ru/w/index.php?title=Бобков,_Геннадий_Александрович&oldid=1232701" гыч налме