Баранов, Андрей Владимирович
| Андрей Баранов | |
|---|---|
 | |
| Тӱҥ увер | |
| Тичмаш лӱм | Андрей Владимирович Баранов |
| Шочмо кече | 17 сорла 1960 |
| Шочмо вер | Волжск, СССР |
| Колымо кече | 2 сорла 2003 (42 ий) |
| Колымо вер | |
| Эл | |
| Профессий | музыкант, композитор |
| Семӱзгар | акустический гитар[d], калыкле кылан семӱзгар[d], клавишан семӱзгар[d], перкалыме семӱзгар[d] да казу[d] |
| Шолыплӱм | Капитан Морган |
| baranov.bard.ru | |
Андрей Владимирович Баранов (17 сорла 1960, Волжск, Марий Автоном Совет Социализм Республик — 2 сорла 2003, Волжск, Марий Эл Республик) — российысе композитор, гитарист да ятыр семӱзгарым шоктызо, нунын коклаште гитар деч посна кӱсле, бузуки, кобза, укулеле, банджо, кашгар рубоб, ямбра да моло калыкын кылан семузгарышт, тыгак клавишан ӱзгар-влак, казу да перкуссий.
Илыш корныжо
1960 ий 17 августышто Марий Эл Республикысе Волжскышто шочын. Москошто илен. Андрей Баранов семым, пашам ышташ тӱҥалмеке веле, йӧратен шынден. Вич ияш улмыж годым кидшым кылмыктен, да парня-влакын тарванылме функцийыштым пӧртылташлан, аккордеон дене шокташ тӱҥалын, а вара гитар деке кумылаҥын. Ача-аваже йотэл командировкышто улмышт годым, 1977 ийыште, Андрейлан луымшо классым Москошто Йотэлласе паша министерстве пелен интернат-школышто тунемаш логалын.
1977 ийыште МИСИ-ш конкурсым эртен кертын огыл да Волжскыш пӧртылын, Марбумкомбинатыш слесарьын тунемшыжлан пашаш пурен. 1978 ий июньышто Моско граждан авиаций институтыш «Авиацийыште радиоэлектрон ӱзгар техникым кучылтмаш» специальность дене тунемаш пурен. Институтым 1985 ий февральыште тунем пытарен, но дипломым налмеке, авиатор огыл, а Владимир Назаровын вуйлатыме фольклор сем ансамбльыште музыкант лийын.
Баранов икымше гана виртуоз семмастар-гитарист да мультиинструменталист, сем-композитор семын чапланен, кунам тудо кумдан палыме «Владимир Назаров вуйлатыме ансамбль» да «Своя игра» (кушко скрипачка Тамара Сидорова да мультиинструменталист-влак Александр Шишов, Василий Порфирьев да Борис Сэхон пуреныт) ансамбльлаште выступатлен. Нунын йоҥгалтарыме «Изи лудо-влакын куштымашышт», «Ах, карнавал!» муро-влак эн кумдан палыме улыт.
1980-ше ийла мучаште музыкант, актёр да клоун-влакым ушышо «Тӱня караван» проект кышкарыште тудо чыла Европым савырнен. 2000-ше ийла тӱҥалтыште Михаил Махович (мандолина) да Анатолий Негашев (контрабас) дене пырля шке коллектившым — «Трио Бараноff» — чумырен, тудын дене эл мучко гастроль дене коштын. Тыгак Андрей сессийысе музыкант семын «Кукуруза» ансамбль, «Любэ» группа, Александр Малинин, Олег Митяев, Андрей Козловский, «ГрАссМейстер» тӱшка да моло российысе эстрадын да автор мурым возышо шӱдыр-влакын альбомым возымаште да гастроль пашаштышт полышкален.
Андрей Баранов 42 элыште гастроль дене лийын да гитарын тӱрлӧ стильже дене 653 утла запиьым ыштен: фолк, этно, кантри, блюграсс, блюз, джаз-мануш, латина, босса-нова, вальс. Акустик гитар деч посна, тудо лу утла моло кыл семӱзгар, клавишан, казу, перкуссий да моло дене шоктен. 1990-ше ийла тӱҥалтыште Баранов чий верасе тӱвырам келгын шымлен: шаманизм, якут камланий, тувасе логар мурымаш. Тудо Европышто икмыняр якут сем фестивальым эртарен, а 1992 ийыште Дюссельдорфышто якут фольклор рӱдерым почаш тӧчен.
Баранов — артист-влакын спектакльыштлан шуко семым возышо автор: Лев Дуровын («С приветом, Дон Кихот!» «Школа современной пьесы» театр), Татьяна Васильеван («Ну всё, всё, всё…» Валерий Гаркалин участвоватлыме дене), «Лицедеи» клоун-мим-театрын.
Барановын семже «Участок» (2003), «Бухта Филиппа» телевидений сериаллаште йоҥга; «Валентин и Валентина» (1985) фильмыште В. Назаров ансамбльын концертше гыч ужаш уло («Ах, карнавал!» муро дене, тушто Баранов гитар дене шокта). Телевиденийыште «МАМАКАБО» клипыште Леонид Лейкин («Лицедеи») да Татьяна Васильева модыныт.
Грушинский фестивальыште, моло автор муро фестивальлаште, Кипрысе Бард-слётышто ик гана веле огыл лийын.
Провиденсия отро гыч Баранов «мамакАбо» мутым конден да илымыж годым лукмо шкенжын ик альбомжым «Капитан Морган. МАМАКАБО» лӱмден[1], тудым «ГрАссМейстер» группын музыкантше-влакын полшымышт дене возымо. Ончыкыжым эше ик альбомым возаш шонен, тидлан сем чыла гаяк ямде лийын, шочмо верыштыже гитар сем фестивальым эртараш шонен.
2003 ий 2 августышто 42 ияш колен, Йошкар-Ола — Волжск трассын 86-шо километрыштыже Яльчик ер могырыш, Йошкар-Оласе КСП фестивальыш кайышыжла, автокатастрофыш логалын. 2003 ий 8 декабрь, Икымше каналыште «Участок» сериал лекме марте, икмыняр тылзе илен шуктен огыл, тысе саундтрекын шуко ужашыжым шкеак возен да йоҥгалтарен.
Шарнымаш
- Андрей Барановын лӱмжӧ дене Волжскышто урем лӱмдалтын[2].
- Андрейым шарнен, ий еда фестиваль-влак эртаралтыт: Андрей Баранов лӱмеш семмастарын шочмо олаштыже Волжскышто калык-влак кокласе сем фестиваль («Баранка.ру»)[3][4] да Российын тӱрлӧ олаштыже да йот эллаште (Египет, Хорватий) «МАМАКАБО» тӱнямбал сем-арт-фестиваль[5].
- 2006 ийыште Грассмейстер группын «Инструментал альбомжо» лектын, тушто «Посвящение Андрею Баранову» композиций возалтын, тудын авторжо гитарист Тимур Ведерников.
- Виктор Третьяков Андрей Барановлан «Улетаю» (Я однажды забыл, что я — бог…) мурым пӧлеклен.
Дискографий
- 1995 ийыште «Капитан Морган» псевдоним дене Андрей Баранов «ГрАссМейстер» группын семмастарже-влак дене пырля Москошто шке икымше «Капитан Морган. МАМАКАБО» альбомжым возен, тудым Английыште (1998 ий, Milio Records) луктын, а вара Российыште (2000, 2010, «Музпром-МО» МИЦ). Тиде инструментал сем альбомыш блюграсс, блюз, рэгтайм, кантри, босса-нова, джаз-мануш, вальс, реггей да марш стильысе пьесе-влак пуреныт[1].
- 2004 ийыште «Очень хочется летать…» DVD-диск лектын, тушто 12 февраль 2004 ийыште Андрей Барановым шарныме лӱмеш Москосо Крым валысе Рӱдӧ сӱретче пӧртыштӧ эртыше концерт возалтын. Дискыш тыгак Андрейын шкешотан архивысе записьше-влак пуреныт.
- Тиде концерт вашеш кокымшо — концертысе — «Андрей Баранов. Live» альбом лектын.
- Андрей Барановын композицийже-влак «Республика на Волге. Грушинский фестиваль. Рок-сцена» («АвтоЗвук» журнал, № 7-2004), «МАМАКАБО» (2005 ий) тӱшка дискысе сборниклашке пуреныт.
Фестиваль-влак
Андрей Барановын йолташыже-влак тудым шарныме лӱмеш тӱнямбал фестиваль-влакым эртареныт.
- 2003 ий гыч ий еда кеҥежым музыкантын шочмо олаштыже, Волжскышто, Андрей Баранов лӱмеш Тӱнямбал сем фестиваль («Баранка.ру») эрта[6]. Фестивальыште Юрий Матвеев, Сергей Старостин, Сергей Манукян, Ирина Сурина, Тамара Сидорова, Андрей Козловский, Андрей Шепелёв, Вовка Кожекин, «Медвежий угол» тӱшка да молат лийыныт.
- Тимур Ведерниковын тыршымыж дене 2004 ийыште Волжскышто Андрей Барановым шарныме лӱмеш «МАМАКАБО» икымше Тӱнямбал сем фестиваль эртен. Тунамсе жап гыч «МАМАКАБО» тӱрлӧ олаште, ий еда эртаралтше, кызытсе арт-фестивальыш савырнен, тушто тӱрлӧ жапыште палыме музыкант-влак — Иван Смирнов, Дмитрий Четвергов, Дмитрий Малолетов, Ирина Богушевская, Евгений Маргулис, Максим Леонидов, Алексей Иващенко да ятыр моло артист-влак лийыныт.
«На пеньках» клуб
2006 ий 10 февральыште Москошто Андрей Барановын «На пеньках» клубшо почылтын. Тушто автор мурым да семӱзгар семым йоҥгалтарыше кумдан палыме артист-влак чумыргат: Иван Смирнов, Екатерина Болдырева, Павел Фахртдинов, Михаил Кочетков, Алексей Лысиков, Ксения Федулова, Николай Харитонов, Евгений Агапов, Наталья Дудкина, Павел Аксёнов, Сергей Милюков, Вовка Кожекин, Наталья Кучер.
Палемдымаш
- ↑ 1 2 Мамакабо. Тергыме кече: 5 вӱдшор 2006. Архивлыме 3 ӱярня 2014 ий.
- ↑ В Волжске появилась улица Андрея Баранова. Тергыме кече: 25 ӱярня 2013. Архивлыме 22 ӱярня 2013 ий.
- ↑ Баранка.ру — Международный Музыкальный Фестиваль Андрея Баранова (фестиваль на Волге). Тергыме кече: 17 шорыкйол 2015. Архивировано из оригинала 18 шорыкйол 2015 ий.
- ↑ Баранка.ру. Тергыме кече: 17 шорыкйол 2015. Архивлыме 18 шорыкйол 2015 ий.
- ↑ Международный музыкальный фонд «МАМАКАБО». Тергыме кече: 29 ӱярня 2006. Архивлыме 2 вӱдшор 2006 ий.
- ↑ Баранка.ру — Международный музыкальный фестиваль им. Андрея Баранова (фестиваль на Волге). Тергыме кече: 17 шорыкйол 2015. Архивировано из оригинала 18 шорыкйол 2015 ий.
Литератур
- Баранов Андрей Владимирович // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 41. — 2032 экз. — ISBN 5-87898-357-0.