Автомобиль транспорт пашаеҥын кечыже
| Автомобиль транспорт пашаеҥын кечыже | |
|---|---|
| Тӱрлылык | профессионал пайрем |
| Ышталтын | Россий Федераций Президентын Указше |
| Палемдат |
 Россий |
| 2024 | 27 шыжа |
| 2025 | 26 шыжа |
| 2026 | 25 шыжа |
| Пайремлымаш | ий еда, октябрьысе пытартыш рушарня |
| Йӱла | водитель-влакым элысе кучем да вуйлатыше-влак деч саламлымаш да кумылаҥдымаш |
«Автомобиль транспорт пашаеҥын кечыже» — автомобиль транспорт пашаеҥ-влакын профессионал пайремышт. Тудо Россий Федерацийыште ий еда октябрьысе пытартыш рушарнян палемдалтеш.
Тиде профессионал пайремын историйже СССР Кӱшыл Совет Президиумын 1976 ий 15 январьысе 2847-IX №-ан «Автомобиль транспорт пашаеҥын кечыжым ий еда пайремлыме нерген» кӱштыкшӧ гыч тӱҥалын да 1980 ий 1 октябрьыште СССР Кӱшыл Совет Президиумын 3018-Х №-ан «Пайрем да шарныктыш кече нерген» кӱштыкшӧ дене пеҥгыдемдалтын. Тиде кагаз СССР-ыште октябрьын пытартыш рушарняжым Автомобиль транспорт пашаеҥ-влакын кечышт семын пайремлаш кӱштен. 1988 ий 1 ноябрьыште СССР ВС 9724-XI №-ан «Пайрем да шарныктыш кече-влак нерген СССР тӧртыкшотыш вашталтышым пуртымо нерген» эше ик кӱштыкым луктын, но пуртымо вашталтыш-влак тиде пайремым нигузеат логалын огытыл[1].
Тунам СССР-ын административ единицыже семын, чыла Совет Социалист Республик-влак «Автомобиль транспорт пашаеҥын кечыжым» иктеш палемденыт, но Совет Ушемым пужен ыштыме да шаланымыж деч вара ты сӱрет вашталтын. Эрыкан лиймекышт, южо республик ты пайремым вес кечыш кусарен, южышт тудын лӱмжым вашталтыт, а южышт пайремлымым йӧршеш чарненыт. Туге гынат тугай эл-влакат улыт, кушто пайрем ожнысылак уло. Тыге Автомобиль транспорт пашаеҥын кечыжым октябрьысе пытартыш рушарняне, Россий Федераций дене пырля Казахстан, Белоруссий да Украина палемдат. Ик ойыртем гына уло: нине совет республикылаште, Автомобиль транспорт пашаеҥын кечыже Корныеҥын кече дене ик жапыштак палемдалтеш, а Российыште кокымшо президент Владимир Владимирович Путинын 2000 ий 23 мартысе 556-шо №-ан «Корнысо озанлык пашаеҥ-влакын кечышт нерген» кӱштыкше дене келшышын ты кече октябрьын кумшо рушарняшкыже кусаралтын[2]. Ондак, 1996 ий гыч, «Автомобиль транспорт да корно озанлык пашаеҥ-влакын кече» РФ Президентын 1996 ий 14 октябрьысе 1435-ше №-ан «Автомобиль транспорт да корно озанлык пашаеҥ-влакын кечышт нерген» 27 октябрь) кӱштыкше негызеш палемдалтын[3]. Россий Федераций президентын 2012 ий 25 июньысо 897-ше №-ан «Автомобиль да оласе пассажир транспорт пашаеҥын кечыж нерген» кӱштыкше дене 2000 ий 23 мартысе 1435-ше №-ан «Автомобиль транспорт да корно озанлык пашаеҥ-влакын кечышт нерген» кӱштык да 2000 ий 23 мартысе 556-ше №-ан «Корно озанлык пашаеҥын кечыже нерген» кӱштыкын 2 пунктшо шке вийжым йомдареныт.
Российыште ты кечылан келшен толшо эше ик пайрем кече уло Сарзе автомобилистын кечыже, тудо 29 майыште палемдалтеш.
Тыгак ончо
Палемдымаш
- ↑ Праздник 5 сентября. День работников нефтяной, газовой и топливной промышленности
- ↑ О Дне работников дорожного хозяйства. Указ. Президент РФ. 23.03.00 556 :: Инновации и предпринимательство: гранты, технологии, патенты
- ↑ Об установлении дня работников автомобильного транспорта и дорожного хозяйства. Указ. Президент РФ. 14.10.96 1435 :: Инновации и предпринимательство: гранты, технологии, патенты