Юл кундемысе кугыжаныш технологий университетын ботанический сад-институтшо
| Юл кундемысе кугыжаныш технологий университетын ботанический сад-институтшо | |
|---|---|
 | |
| Тӱҥ информаций | |
| Тӱрлылык | ботанический сад |
| Кумдык | 72,77 га |
| Негызлалтын | 1927 ийыште |
| botsad.volgatech.net | |
| Верланымаш | |
| 56°37′27″ с. ш. 47°57′34″ в. д.GЯO | |
| Эл | |
| РФ субъект | Марий Эл |
| Ола | Йошкар-Ола |
 | |
Юл кундемысе кугыжаныш технологий университетын ботанический сад-институтшо (руш. Ботанический сад-институт Поволжского государственного технологического университета) Марий Эл Республикыште Йошкар-Олаште верланен. Тудын кумдыкшо — 73,5 га.
Историй
Ботанический сад-институтын историйже 1927 ийыште Марий автоном областьыште 3,5 га кумдыкан дендрологий шагем (питомникым) ыштыме гыч тӱҥалеш. Тидын деч вара, 5 ий гыч, олаште Юл кундемысе чодыратехнике институт почылтын да шагем туныктымо тӧнежлан шанче площадке семын пуэныт. 1989 ийыште Дендросадым Марий кугыжаныш технике университетын Ботанический садше манын лӱмденыт, а 2012 ийыште вузын лӱмжым вашталтымек, сад кызытсе лӱмжым налын[1].
Ботанический сад-институт нерген
Ботанический сад туныктымо, шанче, инноваций да производство пашаште кучылташлан кушкыл-влак погым чумыра да арала. Кызыт тудо федерал ыҥан посна аралыме пӱртӱс кумдыклан шотлалтеш. Садын погыштыжо уло планете гыч 6500 утла тӱрлӧ кушкыл уло. Тушто Мландын 5 континентысе кушкыл тӱняшкыже логалаш, тӱрлӧ пушеҥге да шудо дене палыме лияш лиеш[2].
Адрес: 424030, Россий, Марий Эл, Йошкар-Ола, Тыныслык ур., 2 «б».
Лабораторий-влак
- дендрологий — эн тошто лабораторий-влак кокла гыч иктыже. Тушко пурат: дендрарий, фрутицетум, популетум, салицетум, ландшафт тӱшка-влак, интродукций шаге да парник озанлык;
- пеледышым куштымаш — тышке тыгай экспозиций-влак пурат: шуко ияш сылнештарыше (декоративле) кушкыл-влак, ӱмылысӧ сад, альпа изи курык-влак, розарий да ландшафт тӱшка-влак;
- тропик да субтропик кушкыл-влак — тропик, субтропик да суккулент кушкыл-влакым уша;
- кушкылын геныжым, тудын вашталтмыжым эскерыме да нӧшмым налме паша — тушко «Ир саска-влак» да «урлыкым уэмден вияҥдыме кумдык» экспозиций-влак пурат;
- эмлык, шуэн вашлиялтше да йомын кертше кушкыл-влак — Ботанический садыште ик эн самырык лабораторий; Лабораторийыш кум экспозиций пура: «Эмлык кушкыл-влак», «Шуэн вашлиялтше да йомшо кушкыл-влак», «Яҥгаршудо сад»;
- шыҥдарыме — тышке емыж-саска да цитрус кушкыл экспозиций, тыгак 0,84 га кумдыкан ужалыме питомник пурат.
- тунемме-шымлыше лабораторий;
- сылне арверым тодмо цех — вӱдуа воштыр дене пӧртаврверым да сылнылык арверым ыштымаш, тыгодым куэ да тумо укшым пӱчкеден, йол да негыз-влакым ямдылат. Тыште шкешотан савам («шатовская коса») шонен луктыныт, але марте, вӱдуа дене пашам ыштыме шотышто ты арвер нерген нимомат возымо огыл[3].
Палемдымаш
- ↑ Ботанический сад-институт Поволжского государственного технологического университета - Совет ботанических садов России, <https://sovetbotsadov.ru/botsady/botanicheskij-sad-institut-povolzhskogo-gosudarstvennogo-tehnologicheskogo-universiteta/>. Тергыме: 27 сӱрем 2025.
- ↑ Ботанический сад-институт г.Йошкар-Ола - экскурсии, фотосессии, посадочный материал растений, плетеные изделия из ивовой лозы (неопр.). botsadpgtu.orgs.biz. Тергыме кече: 27 сӱрем 2025.
- ↑ Ботанический сад в Йошкар-Оле, <https://www.tourister.ru/world/europe/russia/city/yoshkar-ola/parks/38177#kak-dobratsya>. Тергыме: 27 сӱрем 2025.
Кылвер-влак
- Ботанический сад-институт Поволжского государственного технологического университета (неопр.). Ботанический сад-институт на сайте ПГТУ. Тергыме кече: 27 сӱрем 2025.