Элембаев, Станислав Михайлович

Станислав Михайлович Элембаев
Станислав Михайлович Элембаев
Тӱҥ увер
Тичмаш лӱм
Шочмо кече	27 ага 1952
Шочмо вер	Торавлак, Кужэҥер кундем, Марий Автоном Совет Социализм Республик, РСФСР[d], СССР;
Колымо кече	3 сӱрем 2005 (53 ий)
Колымо вер	Йошкар-Ола, Марий Эл Республик, Россий;
Эл	СССР → Россий
Профессий	композитор, дирижёр, педагог

Станисла́в Миха́йлович Элемба́ев (27 ага 1952, Торавлак, Кужэҥер кундем, Марий Автоном Совет Социализм Республик, РСФСР^[d], СССР — 3 сӱрем 2005, Йошкар-Ола, Марий Эл Республик, Россий) — совет да российысе дирижёр, педагог, композитор. Олык Ипай лӱмеш кугыжаныш самырыктукым премийын лауреатше (1976), Марий АССР сымыктышын сулло пашаеҥже (1989).

Илыш корно

1952 ий 27 майыште Марий АССР Кужэҥер районысо Торавлак ялыште шочын.

У Торъял районысо Кугу Нурмо ялыште тӱҥалтыш школым тунем пытарен. 1963 ийыште 1-ше №-ан музык-художественный школ-интернатыш (кызыт 1-ше №-ан НПШИ) баян классыш тунемаш пурен. Тудым 1968 ийыште тунем пытарен.

1968 ийыште И. С. Палантай лӱмеш музык училищыш туныктышо Е. М. Аничкинын классышкыже тунемаш пурен, тудым 1972 ийыште отличий дене тунем пытарен. Училищыште тунеммыж годым Юл кундемысе самырык баянист-влакын конкурслашкышт ушнен. 1970 да 1972 ийлаште Элембаев конкурс-влакын лауреатше лийын. 1972 ийыште тудо Гнесинмыт лӱмеш Музык-педагогике кугыжаныш институтыш (руш.) (мар. калык инструмент-влак факультетыш А. В. Беляевын классышкыже, тидын годымак — дирижироватлымаш дене А. Б. Поздняков профессорын классышкыже тунемаш пурен. 1977 ийыште тунем пытарен, туныктышо, концерт исполнитель да калык инструмент-влак оркестрын дирижёржо квалификаций-влакым налын.

1977 ийыште Станислав Михайлович И. С. Палантай лӱмеш музык училищыште туныкташ тӱҥалын (баян, дирижироватлымаш дене туныктышо). Тушто 2004 ий марте туныктен.

Элембаевын темлымыж почеш 1984 ийыште «Марий кундем» калык инструмент-влак ансамбльым ыштыме. 1999 ийыште ансамбль Калык семӱзгар-влак оркестрыш савырнен. Станислав Элембаев коллективым 20 ий вуйлатен. Тиде жапыште республик мучко да тудын деч ӧрдыжтӧ — Тула олаште, Угарманыште, Ульяновскышто, Озаҥыште, Чебоксарыште, Кировышто, Киевыште — коллектив тӱжем утла концертым шынден. Коллектив йот эллаштат — Польшышто да Францийыште — гастроль дене коштын. Оркестр 1986, 1990, 1997 ийлаште пӱтынь российысе конкурслан дипломантше лийын.

1996 ийыште «Марий кундем» коллектив Олык Ипай лӱмеш Кугыжаныш премийын лауреатше лӱмым сулен налын^[1]. 2004 ий гыч оркестр Яков Эшпай лӱмеш Марий кугыжаныш филармоний пелен пашам ышта^[1]. Коллектив тудлан негызым пыштыше еҥын лӱмжым нумалеш — Станислав Элембаев лӱмеш «Марий кундем» калык семӱзгар кугыжаныш оркестр^[2].

1985 гыч 2003 ий марте Станислав Элембаев И. С. Палантай лӱмеш музык училищын симфоний оркестржын вуйлатышыже да дирижёржо лийын^[3]. Тыгодымак тудо Эрик Сапаев лӱмеш опер да балет кугыжаныш театрыште дирижёрлан пашам ыштен^[4].

Туныктымо да дирижёр пашам шуктышыжла, Станислав Элембаев тыгак калык сем-влакым шонен да келыштарен (обработкым ыштен). Автор сборник-влак савыкталтыныт: баянлан «Концерт пьесе да марий теме-влаклан келыштарымаш-влак» («Концертные пьесы и обработки на марийские темы») (1981), «Марий кундем» ансамбль шокта" ("Играет ансамбль «Марий кундем») (партитур, 2002). Калык семӱзгар-влак оркестрлан марий композитор-шамычын произведенийыштын сборникшым чумырен (1988—1989). Радиошто да телевиденийыште Станислав Элембаевын ятыр йӱквозышыжым (записьшым) ыштыме.

2005 ий 3 майыште илыш дене чеверласен.

Суаптар-влак

Юл кундемысе самырык баянист-влакын конкурсыштын лауреатше (1970, 1972);
Марий АССР сымыктышын сулло пашаеҥже (1989);
Олык Ипай лӱмеш кугыжаныш самырыктукым премий (1996)^[3].

Шарнымаш

2022 ий 27 майыште Яков Эшпай лӱмеш Марий кугыжаныш филармонийыште Станислав Элембаевын шочмыжлан 70 ий темме лӱмеш концерт эртен. Программыште тудын автор произведенийже-влак да калык сем-влакым келыштарымыже-влак йоҥгалтыныт^[5]^[6].

Палемдымаш

↑ ¹ ² Юбилей оркестра "Марий кундем" (неопр.). Государственное Собрание Республики Марий Эл (1 вӱдшор 2014). Тергыме кече: 7 вӱдшор 2026.
↑ Государственный оркестр народных инструментов «Марий кундем» им. С. Элембаева (неопр.). Марийская филармония. Тергыме кече: 7 вӱдшор 2026.
↑ ¹ ² Марийская биографическая энциклопедия-2, 2017, с. 509.
↑ Марийский государственный академический театр оперы и балета имени Эрика Сапаева (неопр.). Кидшер (23 кылме 2023). Тергыме кече: 7 вӱдшор 2026.
↑ Вести. Марий Эл. Памятный концерт в честь 70-летия музыканта Станислава Элембаева состоялся в Йошкар-Оле (неопр.). smotrim.ru (27 ага 2022). Тергыме кече: 7 вӱдшор 2026.
↑ Концерт оркестра «Марий кундем» (неопр.). Культура.РФ. Тергыме кече: 7 вӱдшор 2026.

Литератур

Элембаев Станислав Михайлович // Кто есть кто в Марий Эл / Авт.-сост. В. А. Мочаев. — Йошкар-Ола: Марийский биографический центр, 2002. — С. 607. — 2000 экз. — ISBN 5-87898-197-1.
В. Г. Кузнецова, Л. И. Кульшетова, В. И. Чеснокова. Композиторы и музыковеды Республики Марий Эл. — Йошкар-Ола: Типография Правительства Республики Марий Эл, 2006. — С. 248—250. — 266 с. — 1000 экз. — ISBN 5-87898-318-4.
Элембаев Станислав Михайлович // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 411. — 2032 экз. — ISBN 5-87898-357-0.

[gsmari-1] ¹ ² Юбилей оркестра "Марий кундем" (неопр.). Государственное Собрание Республики Марий Эл (1 вӱдшор 2014). Тергыме кече: 7 вӱдшор 2026.

[2] Государственный оркестр народных инструментов «Марий кундем» им. С. Элембаева (неопр.). Марийская филармония. Тергыме кече: 7 вӱдшор 2026.

[_524a3eecd4589716-3] ¹ ² Марийская биографическая энциклопедия-2, 2017, с. 509.

[4] Марийский государственный академический театр оперы и балета имени Эрика Сапаева (неопр.). Кидшер (23 кылме 2023). Тергыме кече: 7 вӱдшор 2026.

[5] Вести. Марий Эл. Памятный концерт в честь 70-летия музыканта Станислава Элембаева состоялся в Йошкар-Оле (неопр.). smotrim.ru (27 ага 2022). Тергыме кече: 7 вӱдшор 2026.

[6] Концерт оркестра «Марий кундем» (неопр.). Культура.РФ. Тергыме кече: 7 вӱдшор 2026.

[1]

[2]

[3]

[4]

[5]

[6]