Текстиль да куштылго йӧнозанлык пашаеҥ-влакын кечышт
| Текстиль да куштылго йӧнозанлык пашаеҥ-влакын кечышт | |
|---|---|
 | |
| Тӱрлылык | Профессионал |
| Ышталтын | 1980 |
| Палемдат | ий еда |
| Кече | пеледыш тылзын 2-шо рушарняже |
| Кылдалтын | текстиль йӧнозанлык, куштылго йӧнозанлык дене |
Текстиль да куштылго йӧнозанлык пашаеҥ-влакын кечышт — Российыште ий еда июньын кокымшо рушарняжын палемдыме пайрем.
Тудын цельже — куштылго йӧнозанлыкысе пашаеҥ ден ветеран-влакым саламлаш, нунын пашаштлан, ты аланысе паша радымым вияҥдымыштлан таушташ.
Пайрем нерген
Историй
Икымше гана тиде кечым официал пайрем семын умылымаш совет кучем годымак историйыш пурен. 1980 ий 1 октябрьыште Л. И. Брежнев «Шарныктыш да пайрем кече-влак нерген» кӱштыкеш кидпалым пыштен[1]. Но СССР шаланымек, элын промышленностьшо начарештын, пайремжат жаплан мондалтын.
Пайремым угыч 2000 ийыште палемдаш тӱҥалыныт, РФ президентше Владимир Путинын 17 июньысо кӱштыкшӧ деч вара. Официал документ почеш, Текстиль да куштылго йӧнозанлык пашаеҥ-влакын кечышт июньын кокымшо рушарняже палемдалтеш[2].
Илыш йӱла
Тӱнямбал классификаций шот дене, куштылго йӧнозанлык 25 аланым уша: текстиль промышленность, йолчием, ургымо, коваште гыч ыштен лукмаш, трикотаж, порсын, химий да молат. Тиде пайремым отрасльын ветеранже, кызыт пашам ыштыше-влакшат палемдат. Поснак Моско, Новогород, Владимир да Иваново кундемлаште пайремлын эрта, нуно Российын текстиль да куштылго промышленностьын рӱдержылан шотлалтыт.
Куштылго йӧнозанлык пашаеҥ-влак пайрем вашлиймашлашке чолган ушнат, ола воктек лектыт, пайрем ӱстелым погат, да уна-влакым мураш-кушташ ӱжыт. Ола покшелне ярмиҥга, ончер да модым ончыктымаш-влак эртат[3].
Пайрем кеҥежым толмыжлан кӧра, кампаний вуйлатыше-влак чӱчкыдынак шке пашаеҥыштлан пайрем кочкыш-йӱышым погат, эн сай пашаеҥ-влакым суапландарат. Российыште тӱшкауверым шарыше-влак пашам ыштыше уста еҥ-влакын пашаштым да озанлыкын вияҥмыштым чолган волгалтарат.
Историй факт
- Айдемын шонен лукмо икымше вургем — эрдыш пижыктыме пидыш лийын, кокымшо чием — юбко.
- Акрет еҥ-влак янлык коваштым тыглай веле огыл чиеныт, нуно ту жапыште шке семын вияҥше модо почеш келыштареныт. Мутлан, археолог-влак кӱнчымӧ годым мамонт лу дене сӧрастарыме меж комбинезоным муыныт.
- Кокла курымлаште айдемын могай тӱшкаште улмыжо вургемын тӱсшӧ дене палемдалтын: поян-влак йошкар тӱсаным ойыреныт, нужна — сур да кӱрен тӱсым, а банкир ден купеч-влак — ужаргым.
- 1996 ий гыч 2011 ий марте куштылго промышленность шке куатшым йомдарен, тидлан кӧра кум миллион наре еҥ паша верым йомдарен.
Тыгак ончо
Палемдымаш
- ↑ 11 июня — День работников легкой промышленности: история и традиции. МИЦ «Известия» (10 пеледыш 2023). Тергыме кече: 23 ага 2024.
- ↑ Указ Президента Российской Федерации от 17.06.2000 г. № 1111. Администрация Президента России (17 пеледыш 2000). Тергыме кече: 23 ага 2024.
- ↑ Ольга Бондаренко. День работников легкой промышленности в 2024 году: история и традиции праздника. Комсомольская правда. Тергыме кече: 23 ага 2024.