Орехов, Василий Дмитриевич

Василий Дмитриевич Орехов
Шочмо кече	1907 ий 21 шорыкйол(1907-01-21)
Шочмо вер	Ӱлыл Чирки, Ернур волость, Яраҥ уезд, Виче губерний, Россий империй
Колымо кече	1973 ий 17 сорла(1973-08-17) (66 ий)
Колымо вер	Ӱлыл Чирки, Оршанке район, Марий АССР, РСФСР, СССР
Гражданлык	Россий империй →  СССР
Паша сомыл	колхоз председатель, район исполкомын председательже

Васи́лий Дми́триевич Оре́хов (21 шорыкйол 1907 — 17 сорла 1973) — совет кугыжаныш да озанлык пашаеҥ. СССР Кӱшыл Каҥашын 1-ше созывшын депутатше (1937—1946). 1937 ий гыч ВКП(б)-ын йыжыҥъеҥже.

Илыш корныжо

1907 ий 21 январьыште Оршанке кундемын тунамсе Ӱлыл Чирки ялыштыже йорло кресаньык ешеш шочын.

1929—1931 ийлаште — Чирки ялсоветын председательже, 1931 ий гыч — «Марий ушем» колхозым чумырышо да председательже, 1934 ийыште тудым кугемденыт, шочмо районысо Э. К. Прамнэк лӱмеш колхозыш савыреныт. Тиде озанлык Марий автоном область ден Горький кундемыште ик эн ончыл радамыште лийын. 1935 ийыште чыла ялозанлык пашам сайын шуктымылан колхозым Горький кундемысе Чап оҥаш пуртымо. Сеҥыше-влак радамыште шийше машинист П. А. Кузнецов, вольык ончышо-влак К. П. Кузнецова, А. С. Кузнецова, М. И. Стрелкова, пасу пашаеҥ-влак Д. И. Стрелкова, А. И. Державина, Я. В. Москвин лийыныт. Йытыным куштышо, пасу паша бригадын бригадирже Д. А. Кузнецов Ленин орден дене палемдалтын.

1938 да 1941—1942 ийлаште — Марий АССР-ысе У Торъял районышто Пектубай районысо исполкомын председательже.

1941 ийыште К. Тимирязев лӱмеш Пӱтынь ушемысе ялозанлык академийын 2 курсшым тунем лектын.

1942—1951 ийлаште — МАССР-ын Оршанке велысе «Чирки» колхозын председательже.

1937—1946 ийлаште СССР Кӱшыл Каҥашын 1-ше созывысе депутатшылан сайлалтын.

Медаль-влак да кок гана Марий АССР Кӱшыл Каҥаш Президиумын Чапкагазше дене палемдалтын.

1973 ий 17 августышто шочмо кундемыштыже колен, туштак тоеныт.

Суаптар-влак

• «Владимир Ильич Ленинын шочмыжлан 100 ий темме лӱмеш. Чапле пашалан» медаль (1970);
• Марий АССР Кӱшыл Каҥаш Президиумын Чаптаныкше (1942, 1944).

Палемдымаш

Литератур

• Мочаев В. А., Опарина Т. Т. Орехов Василий Дмитриевич // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 265. — 2032 экз. — ISBN 5-87898-357-0.
• Муниципальное образование «Оршанский муниципальный район»: поимённые списки тружеников тыла Великой Отечественной войны. —Йошкар-Ола: Типография ООО «Диалог», 2010. — 208 с.
• Опарина Т. Т., Мочаев В. А. Орехов Василий Дмитриевич // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 319. — 606 с. — 1500 экз. — ISBN 978-5-905314-35-3.