Окунева-Ластовка, Галина Трофимовна
| Галина Трофимовна Окунева-Ластовка | |
|---|---|
 | |
| Шочмо кече | 1 шорыкйол 1947 (79 ий) |
| Шочмо вер | |
| Гражданлык |
 СССР →  Россий |
| Паша сомыл | опер мурызо, туныктышо |
| Награде да премий |
|
Гали́на Трофи́мовна О́кунева-Ла́стовка (шоч. 1 шорыкйол 1947, Семонсола (Шернур кундем), Марий Автоном Совет Социализм Республик) — совет да российысе опер мурызо (меццо-сопрано), туныктышо. Г. Тукай лӱмеш Татар кугыжаныш филармонийын солист-вокалисткыже (1973—1980), М. Джалиль лӱмеш Татар опер да балет театрын вӱдышӧ солисткыже (1980—2008). Озаҥысе кугыжаныш консерваторийын профессоржо (2003). Россий Федерацийын сулло артисткыже (1998). Татар АССР-ын калык артисткыже (1987), Марий Эл Республикын калык артисткыже (1994). Мурызо-влакын Кӱшыл тӱнямбал лигыштын йыжыҥъеҥже (Нью-Йорк).
Илыш корныжо
1947 ий 1 январьыште кызытсе Марий Эл Республикын Шернур кундем Семонсола ялеш шуко шочшан кресаньык-фронтовикын ешыштыже шочын, ачаже контузий деч вара шуко илен огыл[1]. 1968 ийыште Йошкар-Оласе музык училищын дирижёр-хор да вокал пӧлкажым, 1973 ийыште — Озаҥысе кугыжаныш консерваторийым тунем лектын[2]. Консерваторийым Г. Ластовка С. Н. Жиганован классыштыже тунем пытарен. 1976 ийыште Озаҥысе кугыжаныш консерваторий пелен аспирантурым тунем лектын.
Г. Тукай лӱмеш Татар кугыжаныш филармонийын музык-сылнымут лекторийжын солист-вокалистше (1973—1980), М. Джалиль лӱмеш Татар опер да балет театрын вӱдышӧ солисткыже (1980—2008)[2].
Г. Ластовка — Озаҥысе кугыжаныш консерваторийын шкет мурымаш кафедрын туныктышыжо (1995—2001), доцент (2001—2003), профессор (2003)[2]. Тудын тунемшыже-влак кокла гыч иктыже — опер сценын тӱнямбал шӱдыржӧ М. Казаков[3].
Усталык пашаже
Опер сценын икымше мурызыжо (прима) семын кумдан палыме[3]. 30 утла партийым мурен, нунын коклаште Любаша («Царская невеста», Н. Римский-Корсаков), Кармен («Кармен», Ж. Бизе), Марина Мнишек («Борис Годунов», М. Мусоргский), Кончаковна («Князь Игорь», А. Бородин), Амнерис («Аида», Д. Верди), Графиня («Пиковая дама», П. Чайковский) да молат, тыгак композитор-классик-влакын возымыштым, руш, марий, татар калык мурылам устан йоҥгалтарен[4]. Мурызын репертуарышкыже тӱнямбал камерный семын эн сай образецше-влак — Бахын, Гендельын, Рахманиновын, Даргомыжскийын, Чайковскийын, Шапоринын, Свиридовын технике дене эн неле сочиненийышт гыч тӱҥалын калык муро-влак марте — пурат. Г. Ластовкалан Карменын, Графинян («Пиковая дама»), Тугзак (Н. Жигановын «Алтынчеч») партий-влак кугу чапым конденыт, пытартышыжым тудо пеш моторын татарла йоҥгалтарен.
Концерт программе дене Российын тӱрлӧ кундем ден олаштыже лийын, кызытат чӱчкыдын шочмо Марий Эл Республикыштыже концерт дене выступатла[2]. «Молодые таланты Марий Эл» фестивальын жюри йыжыҥъеҥже[3]. Тӱрлӧ ийлаште Америкыште, Германийыште, Голландийыште, Австрийыште, Турцийыште, Францийыште, Бельгийыште, Грецийыште, Австралийыште да моло эллаштат гастроль дене коштеден. Мурызо-влакын Кӱшыл тӱнямбал лигыштын йыжыҥъеҥже улеш (Нью-Йорк)[3][4].
Шке жапыштыже кугу сценыште И. Архипова, З. Соткилава, Л. Казарновская, В. Пьявко, М. Биешу, Ю. Марусин, Н. Терентьева, Э. Пелагейченко, Л. Сметанников, А. Ведерников да моло мурызо-влак дене пырля мурен.
Чаплӱм да суаптар-влак
- Россий Федерацийын сулло артисткыже (1998);
- Татар АССР-ын калык артисткыже (1987);
- Марий Эл Республикын калык артисткыже (1994);
- Профессор (2003);
- Татарстан Республикысе Президентын Таумутшо.
Палемдымаш
- ↑ Деревня Семенсола (Семен-Сола, Семенковщина) // Сернурский район. — Йошкар-Ола, 2006. — С. 93. — 320 с. — (История сёл и деревень Республики Марий Эл). — 1500 экз. — ISBN 5-87898-273-0.
- ↑ 1 2 3 4 Ластовка Галина Трофимовна (руш.). tatfil.ru. Тергыме кече: 18 сорла 2025. Архивировано из оригинала 10 ага 2021 ий.
- ↑ 1 2 3 4 Мочаев, 2017, с. 248.
- ↑ 1 2 Энциклопедия Республики Марий Эл, 2009, с. 477.
Литератур
- Артищева Р. В. Ластовка (Окунева) Галина Трофимовна // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 208. — 2032 экз. — ISBN 5-87898-357-0.
- Ластовка-Окунева Галина Трофимовна // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 477. — 872 с. — 3505 экз. — ISBN 978-5-94950-049-1.
- Артищева Р. В. Ластовка (Окунева) Галина Трофимовна // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 248. — 606 с. — 1500 экз. — ISBN 978-5-905314-35-3.
Кылвер-влак
- Ассамблея народов Татарстана. Народная артистка из народа Архивысе копий 14 шорыкйол 2022 гыч
- В гостях – оперная певица Галина Окунева-Ластовка. web.archive.org. Тергыме кече: 15 идым 2025.
- ГТРК «Марий Эл». О Галине Трофимовне Ластовке-Окуневой Архивысе копий 14 шорыкйол 2022 гыч
- «Дивный дар» заслуженной артистки России Галины Ластовки (Окуневой) представлен на выставке (руш.). web.archive.org. Тергыме кече: 15 идым 2025.