Мамаев, Василий Михайлович

РУВИКИ — эрыкан энциклопедий гыч материал
РУВИКИ-ште тыгай тукымлӱм дене вес еҥ нерген статьям лудаш лиеш: Мамаев.
Василий Михайлович Мамаев
Мамаев Василий Михайлович.jpg
Шочмо кече 28 теле 1891(1891-12-28)
Шочмо вер Мустай, Уржум уезд, Виче губерний, Россий империй
Колымо кече 3 теле 1968(1968-12-03) (76 ий)
Колымо вер
Гражданлык  Россий империй →  СССР
Паша сомыл Педагогике, краеведений
Награде да премий

Орден «Знак Почёта»  — 1939 Медаль «За победу над Германией в Великой Отечественной войне 1941—1945 гг.»
Honored School Teacher of the RSFSR.png

Васи́лий Миха́йлович Мама́ев (28 теле 1891, Мустай, Марий Автоном Совет Социализм Республик — 3 теле 1968, Мустай, Марий Автоном Совет Социализм Республик) — марий совет туныктышо, краевед. Марий автоном область / Марий АССР-ысе Мустай школын директоржо, завучшо (1934—1941, 1945—1946). РСФСР школын сулло туныктышыжо (1941). Кум сарын участникше: Икымше тӱнямбал, Граждан да Кугу Ачамланде. 1961 ий гыч КПСС член.

Илыш корно

1891 ий 28 теле тылзын кызытсе Марий Эл Республикын Шернур кундемысе Мустай ялеш Крым сарын участникын, красаньык ешеш шочын. 18 ий марте кӱтӱчылан ыштен, аважлан озанлык пашаште полшен. 1902 ийыште школым моктымо кагаз дене тунем пытарен. 16 ияшыже годым земской школын курсшым уэш эртен да 1911 ийыште педагог-влакым ямдылыше Тошто Торъял кок классан школым тунем пытарен, 1911—1913 ийлаште — Вятский губернийын Уржум уездысе Конганур волостьын Пактек школын туныктышыжо[1][2][3].

1914 ий гыч армий службышто: Икымше тӱнямбал сар жапыште — полк штабын писарьже. Касвел Украиныште да Карпатыште 63-шо Углицкий пехотный полкын составыштыже кредалын. 1916 ий шошым неврастений дене черланен да Йошкар Крестын Александровский общинын 2-шо подвижной лазаретыште эмлалтын. 1918—1919 ийлаште герман пленыште лийын[1][2][3]. «Сар годым сайын да поснак чот тыршен служитлымылан да пашам ыштымылан» (1916), оҥышто нумалаш Станислав лентыште «Тыршымылан» ший медаль дене (1916), Аннинский да Владимирский лентылаште «Тыршымылан» 2 медаль дене (1917) палемдалтын[1][2].

1919 ий гыч — РККА составыште Граждан сарын участникше, Петроград воктене да Касвел фронтышто кредалын. Неле контузий деч вара комиссоватлыме лийын[1][2][3].

Мӧҥгӧ пӧртылмеке — Шернурысо марпотребсоюзын бухгалтерже, кооператив-влакын счетоводшо (1924—1929)[3]. 1929 ийыште — «Мустай» колхозым негызлыше-влак кокла гыч иктыже, тушто счетовод да пасуеҥ лийын, а 1933—1934 ийлаште председательын сомылжым шуктен[1][2][3].

1934 ийыште Йошкар-Олаште ик тылзаш биолог-влакын курсыштым эртен да Н. К. Крупская лӱмеш МГПИ-н естествознаний факультетын заочный отделенийышкыже тунемаш пурен[3]. 1934 ий гыч — директор, 1935—1941 ийлаште — Марий АССР-ысе Мустай школын завучшо. Тыште тудо школ у зданийым нӧлтымашке шуын кертын, примерный школ воктенысе участкын организаторжо лийын[1][2]. 1939 ийыште тудын вуйлатыме почеш юннат кружокшо шуктымо рекордный урожайлан Москош ВДНХ-ш колтымо лийын да II степенян диплом дене палемдалтын[3].

1941 ий октябрьыште РККА-ш ӱжыныт. Кугу Ачамланде сарын участникше: посна гужтранспортный батальонын интендантше, интендант службын старший лейтенантше. Волховский фронтын составыштыже Ленинградым аралыше да утарыше коклаште лийын. 1944 ий декабрьыште Волхов воктене неле сусыргымо да контузий деч вара комиссоватлыме лийын[3][4].

1945—1946 ийлаште уэш Марий АССР-ысе Мустай школын завучшылан ыштен. 1946 ийыште пенсийыш лекмеке — краевед-шымлызе, погымо поян материалжым, туштак школ ден Мустай ялын историйже нерген, МарНИИЯЛИ-ш пуэн. 1950—1960-шо ийлаште «Мустай» колхозын историйжын авторжо лийын[1][2][3].

1961 ийыште КПСС-ыш пурен[3].

Калык образований аланыште суаплан 1941 ий 20 июньышто тудлан, Марий республикыште иктылан икымше семын, «РСФСР школын сулло туныктышыжо» чап лӱмым пуэныт. 1939 ий 5 апрельыште «Почёт пале» орден дене наградитлалтын[3].

1968 ий 3 теле тылзын шке шочмо верыштыже, Марий АССР-ысе Шернур кундемысе Мустай ялеш, колен, туштак тоеныт[1][2].

Суаптар-влак

Шарнымаш

2025 ий 29 вӱдшор тылзын Марий Эл Республикын Шернур кундемысе Мустай кыдалаш школ оралтыште РСФСР школын сулло туныктышыжын лӱмжым шарнымашеш мемориал оҥам почыныт[5].

Палемдымаш

  1. ↑ 1 2 3 4 5 6 7 8 Мочаев, 2017, с. 269.
  2. ↑ 1 2 3 4 5 6 7 8 Энциклопедия Республики Марий Эл, 2009, с. 498.
  3. ↑ 1 2 3 4 5 6 7 8 9 10 11 Мамаев Василий Михайлович (неопр.). Марийская история в лицах. Тергыме кече: 21 пургыж 2022. Архивлыме 21 пургыж 2022 ий.
  4. ↑ Мамаев Василий Михайлович :: Память народа. pamyat-naroda.ru. Тергыме кече: 21 пургыж 2022. Архивлыме 21 пургыж 2022 ий.
  5. ↑ Три войны Василия Мамаева из Марий Эл и главный труд его жизни, <https://www.marpravda.ru/news/society/tri-voyny-vasiliya-mamaeva-iz-mariy-el-i-glavnyy-trud-ego-zhizni-/>. Тергыме: 1 пеледыш 2025. 

Литератур

  • Черешнев Н. Рощи помнят… // Молодой коммунист. 1963. 30 июля. № 90
  • Айплатов Г. Н., Иванов А. Г. Мамаев Василий Михайлович (1891—1968): К 110-летию со дня рождения // Марийский археографический вестник. — 2001. — № 11. — С. 244—247.
  • Сепеев Г. Мустай ялын эргыже — туныктышо-краевед // Марий Эл. — 2002. — 9 января.
  • Муравьёв А. В. Учителями жива Россия: Учителя Республики Марий Эл — заслуженные учителя Российской Федерации. — Йошкар-Ола, 2004. — С. 59—61.
  • Хазеева Ф. Труды краеведа Мамаева Василия Михайловича по истории деревни Мустаево (Мустай) // Студенческая наука и XXI век. — 2006. — № 3. — С. 43—46.
  • Мамаев Василий Михайлович // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 225. — 2032 экз. — ISBN 5-87898-357-0.
  • Мамаев Василий Михайлович // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 498. — 872 с. — 3505 экз. — ISBN 978-5-94950-049-1.
  • Мочаев В. А. Мамаев Василий Михайлович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 269. — 606 с. — 1500 экз. — ISBN 978-5-905314-35-3.
  • Шахтарин Д. Три войны Василия Мамаева из Марий Эл и главный труд его жизни // Марийская правда. — 2025. — 30 мая.

Кылвер-влак

"https://mhr.ruwiki.ru/w/index.php?title=Мамаев,_Василий_Михайлович&oldid=1209524" гыч налме