Курымашлык полк (кундем кокласе эртык-патырле мер толкын)

РУВИКИ — эрыкан энциклопедий гыч материал
Тиде терминын вес ыҥжат уло, Курымашлык полк (ыҥ-влак) онч.
«Курымашлык полк» кундем кокласе эртык-патырле мер толкын
Изображение логотипа
Негызлыме кече 2012 ий 4 пургыж
Тӱрлылык общественная организация[d]
Каҥаш председатель Сергей Владимирович Лапенков
Рӱдер  Томск
Сайт moypolk.ru

«Курымашлык полк» кундем кокласе эртык-патырле мер толкыным журналист-влак Сергей Лапенков, Сергей Колотовкин да Игорь Дмитриев 2012 ийыште негызленыт[1]. 2022 ий апрельыште толкынын вуйлатышыже-влак тетла «Курымашлык полк» пӱтынь российысе акций дене нимогай кылыштат уке манын, увертареныт[2].

Эртык

2011 ийыште Томск олаште журналист-влак Сергей Лапенков, Сергей Колотовкин да Игорь Дмитриев олаште илыше калыклан, Кугу Ачамланде сарын ветеранже-влакын портретыштым кучен, таҥтошкалым эртараш темленыт. 2012 ийын 9 майыште тыге Томск уремла дене куд тӱжем наре еҥ ошкыл эртен[1].

Кундемысе толкыным ыштымаш

2014 ий январьыште «Курымашлык полкын» томскысо вуйлатышыже-влак, коммерцийдыме организацийын таныкшым налын, «Курымашлык полк» кундем кокласе эртык-патырле мер толкын регистрацийжым эртеныт[3].

2014 ийыштак, «Курымашлык полк» кундем кокласе эртык-патырле мер толкынын официал тамгаже (логотип) — вич лукан шӱдыр сыныште кавашке чоҥештыше турня — шочын. Логотипын авторжо, сӱретче Алексей Шелепов варажым тыге ойлен:

«Курымашлык полк» тамган график легендыже тыгай. Ме политике да пропаганде пале да сын деч посна, тыгодым эртымгорным ончыктышым ышташ шоненна. Тыгак тудо тӱрлӧ ийготан да тӱрлӧ социал тӱшкаш пурышо айдемылан раш лийже манын, шотыш налаш кӱлын. Коммерций шӱлыш деч посна, но тачысе кечылан келшен толшо. Паша неле, но оҥай лийын. Сюжет шотеш «Турня-влак» муро гыч образым налынам (Расул Гамзатовын почеламутшылан семым композитор Ян Френкель келыштарен, руш йылмыш Наум Гребнев кусарен). Муро сар жапыште колышо салтак-влаклан пӧлеклалтын. Тыге салтак шӱгарысе шӱдыр сыныште чоҥештыше кайык гыч композиций шочын.

«Курымашлык полкын» турням сӱретлыман транспарант фотосӱрет-влак Интернетыш логалыныныт да нуным моло олаштат кучылташ тӱҥалыныт. Варарак, 2014 ий октябрьыште, МИПОД «Курымашлык Полк» координатор-влакын конференцийыштышт тидым толкынын официал тамгажлан шотлаш тӱҥалме шотышто пунчалым луктыныт. 2016 ий декабрьыште тамгам «Йӧнозанлык пого федерал институт» федерал кугыжаныш бюджет тӧнежыште официаллын регистрироватленыт.

Пӱтынь российысе толкын

2015 ийыште калыкын темлымыж почеш «Российын курымашлык полкшо» пӱтынь российысе мер граждан-патырлык толкын негызлалтын, тушко 89 кундемысе пӧлка ден 200 утла тӱнямбал координатор-влак пурены[4].

Кундемысе толкынын акций деч кораҥмаш

2022 ий 26 февральыште «Курымашлык полк» кундем кокласе эртык-патырле мер толкынын сопредседательже-влак Сергей Лапенков, Сергей Колотовкин, Игорь Дмитриев, тыгак «Курымашлык полк каҥаш. Пермь» председатель Анна Отмахова СВО-м эртарымылан тореш лийыныт[5].

2022 ий 22 апрельыште «Курымашлык полк» кундем кокласе эртык-патырле мер толкынын вуйлатышышт Интернетысе шке официал лаштыкыштышт увертареныт: нуно тетла «уремысе таҥтошкал эртымаш дене шкеныштым кылдаш йӧным огыт уж» да ончыкыжым «Курымашлык полк» акций дене нуным кылдаш огыл манын, ойленыт[2].

Палемдымаш

  1. ↑ 1 2 Марина Набатникова. С портретом прадеда. Как встать в ряды «Бессмертного полка»? // Аргументы и факты : газета. — 2014. — 23 вӱдшор (№ 17 (1746)). — С. 58.
  2. ↑ 1 2 Бессмертный полк. Новости. Бессмертный полк: принципов не меняем (руш.). www.moypolk.ru. Тергыме кече: 18 шыжа 2024.
  3. ↑ Свидетельство о государственной регистрации некоммерческой организации МИПОД «Бессмертный полк» Архивысе копий 22 теле 2016 гыч // Официальный сайт движения «Бессмертный полк».
  4. ↑ Бессмертный полк в мире (руш.). polkrf.ru. Тергыме кече: 15 шыжа 2024.
  5. ↑ Юлия Варшавская. «Мы против военных действий»: благотворительные фонды и НКО обратились к Путину (неопр.). Forbes.ru (26 пургыж 2024). Тергыме кече: 18 шыжа 2024.
"https://mhr.ruwiki.ru/w/index.php?title=Курымашлык_полк_(кундем_кокласе_эртык-патырле_мер_толкын)&oldid=1227039" гыч налме