Крол, Семён Маркович

Семён Маркович Крол
Шочмо кече	13 пеледыш 1928(1928-06-13)
Шочмо вер	Задрутская Слобода[d], Белыничи район[d], Могилёв вел, Белорус ССР[d], СССР
Колымо кече	20 кылме 2013(2013-11-20) (85 ий)
Колымо вер	Йошкар-Ола, Марий Эл Республик, Россий
Гражданлык	СССР →  Россий
Паша сомыл	механизатор, ялозанлык инженер, депутат
Награде да премий	Марий АССР-ын сулло механизаторжо[d] (1973) МАССР Кӱшыл Каҥаш Президиумын Чапкагазше[d] (1978, 1988) РСФСР ялозанлыкын сулло инженерже[d] (1984)

Семён Мáркович Крол (13 пеледыш 1928, Задрутская Слобода^[d], Белыничи район^[d], Могилёв вел, Белорус ССР^[d], СССР — 20 кылме 2013, Йошкар-Ола, Марий Эл Республик, Россий) — совет ялозанлык пашаеҥ. Марий АССР ялозанлыкыште ыштенлукшо-техникым ситарыме шотышто Кугыжаныш комитет председатель (1978—1985). РСФСР ялозанлыкын сулло инженерже (1984). КПСС йыжыҥъеҥ.

Илыш корныжо

1928 ий 13 июньышто кызытсе Белоруссийын Могилёв областьысе Задрутская Слобода ялысе служышо-влакын ешыштышт шочын.

1952 ийыште Ленинградысе ялозанлык механизаций институтым тунем пытарен.

1957 ий марте Марий АССР-ысе У Торъял да Морко посёлкышто механике училищын туныктышыжлан пашам ыштен, 1957—1960 ийлаште — Морко механизаций училищын директоржо. Тыште 150 верлан тӱшкагудым, мастаргудым чоҥен. 1960—1963 ийлаште — Морко район «Сельхозтехника» ушемын вуйлатышыже. Тудын вуйлатымыж почеш тыште 4 тылзыште мастаргудым да олтымгудым чоҥымо.

1963 ий гыч — Йошкар-Оласе «Волговятсельэлектрострой» трестын 49 №-ан механизироватлыме колоннын вуйлатышыже. Тудын годым, 1964 ийыште, Марий АССР «Сельэлектрострое» Юл-Виче регионышто икымше верым налын.

1969 ий гыч — Республикысе «Сельхозтехника» ушем председательын алмаштышыже, 1975—1978 ийлаште — председательже. Тудын годым республикын кажне районыштыжо ялозанлык техникым тӧрлышӧ мастаргудо-влак почылтыныт, у техникым налыныт. Тиде жапыште ялозанлык техникым тӧрлымӧ шотышто Марий республик РСФСР-ыште икымше верыш лектын. Лач тудын годым Марий АССР-ыште кайыкым ончен куштымо паша илышйӧнлан негыз семын нӧлталт вияҥын.

1978—1985 ийлаште — Марий АССР ялозанлыкыште ыштенлукшо-техникым ситарыме шотышто кугыжаныш комитетын председательже. 1985—1991 ийлаште — МАССР Агройӧнозанлык комбинатысе генеральный директорын алмаштышыже.

1975—1990 ийлаште Марий АССР Кӱшыл Каҥашын IX—XI созывысе депутатше лийын.

Ялозанлык аланыште сеҥымашлан 1984 ийыште «РСФСР ялозанлыкын сулло инженерже» чаплӱмым пуымо. Паша Йошкар Тисте орден, «Почёт пале» орден, медаль-влак дене, нунын коклаште «Пашаште чолгалыклан» медаль дене, тыгак РСФСР Кӱшыл Каҥаш Президиумын да Марий АССР Кӱшыл Каҥаш Президиумын чапкагазышт дене (кок гана) палемдалтын.

2013 ий 20 ноябрьыште Йошкар-Олаште колен.

Паша чаплӱм ден суаптар-влак

• РСФСР ялозанлыкын сулло инженерже (1984);
• Марий АССР-ын сулло механизаторжо (1973);
• «СССР энергетике да электрификацийын отличникше» оҥпале;
• Паша Йошкар Тисте орден (1976);
• «Почёт пале» орден (1969);
• «Пашаште чолгалыклан» медаль (1966);
• «Чапле пашалан. Владимир Ильич Ленинын шочмыжлан 100 ий темме лӱмеш» лӱмгече медаль;
• «РСФСР Шемрокдымо мландым савырымылан» медаль;
• РСФСР Кӱшыл Каҥаш Президиумын чаптаныкше (1965);
• Марий АССР Кӱшыл Каҥаш Президиумын чаптаныкше (1978, 1988).

Палемдымаш

Литератур

• Сухин В. И. Развитие сельского хозяйства Марийской АССР в 1965—1975 гг.: автореферат диссертации кандидата исторических наук: 07.00.02 / АН СССР. Институт истории СССР. — Москва, 1987. — 15 с.
• Опарина Т. Т. Крол Семён Маркович // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 192. — 2032 экз. — ISBN 5-87898-357-0.
• Крол Семён Маркович // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 459. — 872 с. — 3505 экз. — ISBN 978-5-94950-049-1.
• Опарина Т. Т. Крол Семён Маркович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 227. — 606 с. — 1500 экз. — ISBN 978-5-905314-35-3.