Кислицкий, Виктор Дмитриевич

РУВИКИ — эрыкан энциклопедий гыч материал
РУВИКИ-ште тыгай тукымлӱм дене вес еҥ нерген статьям лудаш лиеш: Кислицкий.
Виктор Дмитриевич Кислицкий
Кислицкий Виктор Дмитриевич (Йошкар-Ола).jpg
Шочмо кече 1925 ий 23 теле(1925-12-23)
Шочмо вер Емуртла, Упорово район, Тюмень округ, Урал кундем, РСФСР
Колымо кече 2021 ий 7 пеледыш(2021-06-07) (95 ий)
Колымо вер Йошкар-Ола, Марий Эл, Россий
Гражданлык  СССР →  Россий
Паша сомыл инженер-радиотехник, мер пашаеҥ, поэт
Награде да премий

Орден Славы III степени — 1945 Орден Отечественной войны II степени  — 1985 Медаль «За боевые заслуги» — 1954 Медаль «За победу над Германией в Великой Отечественной войне 1941—1945 гг.» «Чапле пашалан (Сарзе патырлыклан) лӱмгече медаль. Владимир Ильич Ленинын шочмыжлан 100 ий лӱмеш палемдалтын» «Пашан ветеранже» медаль

Виктор Дмитриевич Кислицкий (1925 ий 23 декабрь, Емуртла, Упорово район, Тюмень округ, Урал кундем, РСФСР ― 2021 ий 7 июнь, Йошкар-Ола, Марий Эл, Россий) ― совет да россий инженер-радиотехник, мер пашаеҥ, сылнымутчо. Марий Эл Республикын «Патриот» сылнымут клубым ышташ темлыше да сылнымут ойпуышыжо (2000―2021). Кугу Ачамланде сарын салтакше. КПСС йыжъеҥ.

Илыш корныжо

1925 ий 23 декабрьыште кызытсе Тюмень кундем Упорово район Емуртла ялыште шочын.

1943 ий январьыште Ульяновск гыч РККА-шке налме. Кугу Ачамланде сарын участникше: 1-ше Украин фронтысо «СМЕРШ» сарзе контрразведкын 1-ше классан фронтысо радистше, старшина. Украиныште Тернополь гыч Львов марте, Польшо, Кечывалвел Германий гоч Чехословакий марте сар корным эртен. Тӱрлӧ армийысе часть коклаште радиокылым ыштен шоген, тыгак армий разведкын кок тӱшка коклаште кылым кучаш полшен. 1944 ий кеҥежым 60-шо армийын командующийже генерал-полковник П. А. Курочкинын посна РСБ радиостанций экипажыштыже тыршен. Сеҥымашым Прага деч тораште огыл, Нимбуркышто, вашлийын. III степенян Чап орден, II степенян Ачамланде сар орден да медаль-влак дене суапландаралтын, нунын коклаште «1941―1945 ийласе Кугу Ачамланде сарыште Германийым сеҥымылан» медаль дене[1][2][3][4].

Сар деч вара сар службым умбакыже шуэн, Угарманысе сарзе радиоспециалистым ямдылыше школым, КГБ оперативник кышкарым ямдылыме Бакусо школым — визытан дене, вара — кугыжаныш университетын 2 курсшым заочно, а 1958 ийыште Саратовысо юридический институтым тунем лектын[1][2]. 1963 ийыште сар службо гыч шапашын капитанже лӱмпале дене кораҥын. «Сарысе суаплан» медаль дене суапландаралтын[1][2].

1963 ийыште Марий АССР-се Йошкар-Олаш куснен. Марий радиорӱдерын инженерже, Марий радио бюрон операторжо лийын. Тудын пашаже Марий республикыште радиоуверым да радист-влакым ямдылыме пашам саемдымашке виктаралтын. Марий шанче-технике информаций рӱдерын пропаганде секторжым вуйлатен, республикын калык озанлыкыш шанче-технике сеҥымашым пурташ полшен. 1982―1985 ийлаште Марий метрологий да стандартизаций рӱдерын стандартын да метрологийын ончык вияҥме шотышто пӧлка вуйлатыше лийын, ыштыкверын сату сайлыкшым нӧлташ полшен[5][6].

2021 ий 7 июньышто Йошкар-Олаште колен, туштак тойымо[5][6].

Сылнымут пашаже

2000 ийыште Марий Эл Республикын «Патриот» сылнымут клубшым негызлен. Илышыжын пытартыш кечыж марте тиде ушемын сылнымут ойпуышыжо лийын, ушемысе йыжъеҥ-влакын серымыштым тӱшка да посна сборник дене лукмаште тыршен, сераш тӱҥалше автор-влаклан полшен. Кызыт тиде ушемыште 40 утла йыжъеҥ уло, нунын сылнымут да мер пашашт граждан-влакым патырлык шӱлышеш куштымашке виктаралтыт[5][6][7].

4 почеламут сборникын да 2 статья сборникын авторжо[6]. «Миг между прошлым и будущим» почеламут сборникше Марий кугыжаныш университетын филологий шанче докторжо, профессор А. Т. Липатовын редакцийже дене лектын.

2003―2004 ийлаште Россий образований, обороно да тӱвыра министерстве-влакын пырля сар-патырлык лирике шотышто эртарыме конкурсын республикысе да российысе лауреатше лийын.

Мер паша

Марий Эл Республикыште мер пашаеҥ семын палыме. Йошкар-Ола КПСС Ленин райком пелен ТЭС Президиумысо секретарьын пашажым шуктен, кыл пашаеҥ-влакын профсоюзысо Марий обкомын технике лӱдыкшыдымылык шотышто штатдыме инспекторжо лийын.

1971 ий гыч 20 ий наре «Знание» обществын марий пӧлкаштыже штатдыме лектор лийын[5][6]. Тӱнямбал кыл да шанче-технике шинчымаш шотышто метод Каҥашын йыжъеҥже, Японий нерген лекцийым лудын.

30 ий наре «Марийская правда» газетын штатдыме корреспондентше да обозревательже лийын[5][6].

1992—1993 ийлаште географийым туныктышо-влаклан «Минеральные ресурсы мира. Запасы. Добыча. Потребление. Торговля», «Промышленность стран мира», «Сельское хозяйство и транспорт мира» полыш книгалам савыктен.

«Соцтаҥасымашын отличникше» оҥысо пале, «9-ше вичияшын ударникше» пале, СССР КГБ-ын Чап грамотыжо, Российысе да Марий Эл Республикысе ветеран Каҥашын, СССР Кыл Министрствын, Марий профсоюз обкомын, «Знание» пӱтыньушемысе обществын, «Марийская правда» газетын Чап кагазышт да медаль-влак дене суапландаралтын, тыгодым «Пашан ветеранже», «Суапле пашалан. В. И. Ленинын шочмыжлан 100 ий теммым палемдыме лӱмеш» медаль дене.

Тӱҥ произведений-влак

Умбакыже В. Д. Кислицкийын тӱҥ произведенийже-влакым радамлыме[8]:

  • Кислицкий В. Д. Во имя справедливости. Стихи. Статьи. ― Йошкар-Ола: «Патриот», 2008. ― 416 с.
  • Кислицкий В. Д., Лазарев С. Н., Лазарев А. О. Время зовёт: литературный сборник: [стихи и рассказы]. Республиканское литературно-художественное объединение «Патриот». ― Йошкар-Ола: «Патриот», 2012. ― 215 с.
  • Кислицкий В. Д., Березан Н. С., Хобер А. Ф. Рифмы и ритмы. Справочное пособие. ― Йошкар-Ола: ООО ИПФ «СТРИНГ», 2017. ― 260 с.
  • Кислицкий В. Д. Япония. Справочное пособие для туристов. Проза и стихи. ― Йошкар-Ола: «Патриот», 2018. ― 98 с.

Суаптар да лӱмпале-влак

  • III степенян Чап орден (28.05.1945)[1][2]
  • II степенян Ачамланде сар орден (06.04.1985)[1][2]
  • «Сарысе суаплан» медаль (25.06.1954)[1][2]
  • «1941—1945 ийласе Кугу Ачамланде сарыште Германийым сеҥымылан» медаль (09.05.1945)[1][2]
  • «Суап пашалан. Владимир Ильич Ленинын шочмыжлан 100 ий теммым палемдыме лӱмеш» медаль
  • «Пашан ветеранже» медаль
  • «Соцтаҥасымашын отличникше» оҥ пале

Шарнымаш

Йошкар-Олаште Кугу Ачамланде сарын салтакше, Марий Эл Республикын мер пашаеҥже Кислицкий Виктор Дмитриевичым шарныме лӱмеш мемориал оҥа

2022 ий 18 июльышто Йошкар-Оласе Совет уремын 147 №-ан пӧртыштӧ, Марий Эл Республикын поэтше, мер пашаеҥже В. Д. Кислицкийлан мемориал оҥам почмо. Оҥаште возымо: «Тиде пӧртыштӧ 1973 гыч 2021 ий марте Кислицкий Виктор Дмитриевич илен, Кугу Ачамланде сарын участникше, Марий Эл Республикын мер пашаеҥже»[9][10][11].

Литератур

  • Кныш-Ковешникова Г. Листает время дни // Марийская правда. 17 мая 2007 г.
  • Попов В. Об авторе / Во имя справедливости. Стихи. Статьи. ― Йошкар-Ола, 2008. ― С. 3―8.
  • По-прежнему на передовой // Марийская правда. 21 ноября 2008 г.

Палемдымаш

  1. ↑ 1 2 3 4 5 6 7 Кислицкий Виктор Дмитриевич :: Память народа. pamyat-naroda.ru. Тергыме кече: 19 сорла 2022. Архивлыме 19 сорла 2022 ий.
  2. ↑ 1 2 3 4 5 6 7 #дорогапамяти Участник ВОВ ✩ Кислицкий Виктор Дмитриевич (руш.). Музейный комплекс "Дорога Памяти". Тергыме кече: 19 сорла 2022. Архивлыме 19 сорла 2022 ий.
  3. ↑ «Всегда в строю», Новости музея. i-ola-museum.ru. Тергыме кече: 19 сорла 2022. Архивлыме 19 ага 2018 ий.
  4. ↑ Встреча с ветеранами Великой Отечественной войны, Новости музея. i-ola-museum.ru. Тергыме кече: 19 сорла 2022. Архивлыме 19 сорла 2022 ий.
  5. ↑ 1 2 3 4 5 _. Виктор Дмитриевич КИСЛИЦКИЙ (неопр.) (9 пеледыш 2021). Тергыме кече: 19 сорла 2022. Архивлыме 7 теле 2021 ий.
  6. ↑ 1 2 3 4 5 6 Виктор Дмитриевич КИСЛИЦКИЙ (руш.). www.marpravda.ru. Тергыме кече: 19 сорла 2022.
  7. ↑ Листает вермя дни. www.marpravda.ru. Тергыме кече: 19 сорла 2022.
  8. ↑ Информационно-библиотечный центр Поволжского государственного технологического университета. ecatalog.volgatech.net. Тергыме кече: 19 сорла 2022. Архивлыме 19 сорла 2022 ий.
  9. ↑ Об установке мемориальной доски Кислицкому Виктору Дмитриевичу, ветерану Великой Отечественной войны 1941-1945 г.г., общественному деятелю Республики Марий Эл (руш.). gor-sobry-ola.ru. Тергыме кече: 19 сорла 2022.
  10. ↑ Открытие мемориальной доски участнику и ветерану Великой Отечественной войны 1941-1945 г.г., бывшему работнику Центра -Виктору Дмитриевичу Кислицкому. www.maricsm.ru. Тергыме кече: 19 сорла 2022. Архивлыме 19 сорла 2022 ий.
  11. ↑ В Йошкар-Оле появилась памятная доска ветерану и поэту Виктору Кислицкому. www.marpravda.ru. Тергыме кече: 19 сорла 2022.

Кылвер-влак

"https://mhr.ruwiki.ru/w/index.php?title=Кислицкий,_Виктор_Дмитриевич&oldid=1194964" гыч налме