Исанбаева, Раисия Ивановна

Раисия Ивановна Исанбаева
Раисия Ивановна Исанбаева
Шочмо кече	1964 ий 11 идым (61 ий)
Шочмо вер	Тошто Оръямучаш, Тӧлдӧ сельсовет[d], Калтаса кундем, Башкир Автоном Совет Социалистик Республик, РСФСР[d], СССР;
Гражданлык	СССР ; Россий
Паша сомыл	мурызо
Награде да премий

Исанбаева (Исенбаева) Раисия Ивановна (шоч. 11 идым 1964, Тошто Оръямучаш, Башкир Автоном Совет Социалистик Республик) — Нефтекамск кугыжаныш филармонийын мурышо артисткыже (солистка) тӱвыра пашаеҥ, Пошкырт Республикын сулло артисткыже (2023 ий)^[1].

Илыш корныжо

Раиса Ивановна Исабаева Тошто Орьебаш ял Калтаса район Башкир АССР-ыште (1993 ий гыч Башкоростан Республик) 1964 ий 11 сентябрьыште шочын.

Марий сценын шкешотан шочшыжо. Нефтекамск кугыжаныш филармонийыште 2001 ий гыч артист-вокалистлан (солист) пашам ышта. 2005 ий гыч 2024 ий марте «У сем» марий эстраде тӱшкан вуйлатышыже лийын. Марий калык ден эстраде мурым, романсым мурышо. Репертуарыштыже 120 утла муро шотлалтеш, профессионал марий композитор-влакын произведенийышт, утларакше В. Захаровын^[2], В. Куприяновын, В. Кульшетовын, Н. Арбанын да ятыр молынат улыт. Тудым Марий Элын поэт-мурызо усталык пашашт сымыстареныт: А. Иванован, А. Александровын, В. Регеж-Гороховын, А. Волкован. Раисия Исанбаева шке репертуаржым шагал йоҥгышо марий калык муро дене пойдара, тиде ончаш толшо-влаклан эре у шӱлыш. Тудо композиторын, авторын шонымыштым ӱшандарен почын йоҥгалтарыше мурызо, произведенийын содержаний келгытшым палемден мошта. Йӱкшӧ пеҥгыде лирике сопрано. Тудын шке шотан, виян, кумда диапазонжо калык мурым веле огыл мураш йӧным ышта, композитор произведений-влакат академий да эстраде муро семын муралтыт. Мурызын кӱкшӧ мастарлыкше, чапле пластике да сценысе сын ончышо-влакын чоныштым савыра. Ий еда Нефтекамск кугыжаныш филармонийын сценыштыже кугу сеҥымаш дене Исанбаеван концертше-влак эртат:

2020 ий — шкет мурымо «Лач пырляште весела» («Вместе всегда весело!») программе;
2021 ий — «Шошымсо кумыл» («Весеннее настроение»);
2022 ий — «Мом пала йӧратымаш йӧратымаш нерген!..» («Что знает о любви любовь»);
2023 ий — «Чонемын ший шулдыржо!» («Моей души серебряные крылья!»).

Исанбаева калык-влакын йӧратымашыштым да пагалымашыштым сулен, тудым Россий Федерацийын шуко олалаштыже, районлаште да областьлаште куанен вашлийыт. Тудын усталык пашаж дене Марий Эл Республикыште, Сургутышто, Тюменьыште, Екатеринбургышто, У Уренгойышто, Тошто Уренгойышто, Москошто, Киров кундемыште, Пермь велне, Самара, Оренбург областьлаште, Ямало-Ненецкий автоном округышто да тулеч молат сайын палыме улыт.

Кугу усталык сеҥымашлан, культур ден сымыктышым вияҥдымашке надырлан, тыгак мер илышыште кугу чолгалыкым ончыктымылан 2023 ийыште Раисия Исанбаевалан Пошкырт Республикын сулло артистше чаплӱмым пуымо.

Исанбаева Р. И. усталыкше ик гана веле огыл тӱшка увер йӧн дене палемдалтын, тудын мурымыжо чӱчкыдын радио дене йоҥга, Марий Эл Республикын телевидений фондыштыжо аралалтеш. «Башкир спутник телевиденийын» каналыштыже, «Марий Эл Радио» да «Говорит Москва» россий каналлаште мурыжо-влак йоҥгат. Тудо марий калыкын тӱвыражым Пошкырт Республикысе виктерын концертлаштыжат сайын ончыкта^[3].

Суаптар

Пошкырт Республикысе тӱвыра да сымыктышым аралымашке да вияҥдымашке надырлан Республикысе тӱвыра министерстве деч Чап грамото.
Марий Эл Республикын тӱвыра да калык паша шотышто министерствын 1997 ийысе марий муро да композитор творчестве шотышто «Чолман йӱк — 97» фестиваль-конкурсын Чап грамотыжо.
2001 ийысе марий муро да композитор творчестве шотышто «Чолман йӱк — 2001» фестиваль-конкурсын Пошкырт Республикысе тӱвыра да калыкле политике министествысе Пошкыртысе калык усталык рӱдерын Гран-при дипломжо — 2001 ий.
Марий Эл Республикысе тӱвыра министерствын «Ший памаш» («Серебряный родник») марий мурызо-влакын кундем кокласе 11-ше эстраде конкурсышто сеҥымашлан да пашам чолган шуктымылан Марий Эл Республикын тӱвыра министерствыж деч Чап грамот — 2001 ий.
Усталык сеҥымашлан, культур ден сымыктышым вияҥдымашке надырлан Нефтекамск ола администраций деч Чап грамот — 2003 ий.
Марий калыкле тӱвырам вияҥдымашке надырлан, олан илышыштыже чолган тыршымылан Нефтекамск ола администраций деч Тауштыман серыш — 2007 ий.
Пошкырт Республикысе тӱвыра да калыкле политике министерстве деч тӱвыра пашаште шуко ий тыршымылан Чап грамот — 2007 ий .
Марий тӱвыралан пӧлеклалтше эрвел марий эстрадын шӱдыржо-влак фестивал-концертыште Диплом — 2009 ий.
Марий Эл Республикын тӱвыра, савыктыш да калык-влак паша шотышто министерствын калык — влак коклаште ваш-ваш келшен илымашым аралымашке да вияҥдымашке надырлан Чап грамот — 2012 ий.
Марий Эл Республик Правительствын марий калыкын тӱвыражым арален вияҥдымылан Чап грамот — 2013 ий
«Чолман» республикысе газетын тӱҥ редакторжо деч Тауштыман серыш — 2014 ий.
Шуко ий пашам тыршен ыштымылан, кӱкшӧ профессионализмым ончыктымылан ГАУК ден Нефтекамск кугыжаныш филармоний деч Грамот — 2014 ий.
Пошкырт Республикысе Шаран администрацийже деч марий калыкле йӱлам да тӱвырам аралыме пашам шуктымылан Таумут серыш — 2016 ий
Шуко ий пашам тыршен ыштымылан Чап грамот, кӱкшӧ профессионализм да лӱмгечылан кӧра Пошкырт Республикысе Нефтекамск ола администраций деч Чап грамот — 2019 ий.
Инвалид-влакын тӱнямбал кечышт лӱмеш Поро кумылым ончыктышо концертлан ГБУ администрацийын Нефтекамск ПНИ деч Таумут — 2021 ий.
Пошкырт Республикын сем сымыктышыжым вияҥдымаште кугу профессионал мастарлыклан да кугу надыр пыштымылан Пошкырт Виктер деч Тауштыман серыш — 2022 ий.
Пошкырт Республикын гражданже-влакым мобилизацийлыме пунктлаштыже концерт программым эртарымылан Пошкырт Республикысе Нефтекамск ола администраций деч Таумут серыш — 2022 ий.

Палемдымаш

↑ Нефтекамская государственная филармония (неопр.). neft-gf.ru. Тергыме кече: 26 шыжа 2025.
↑ В его мелодиях – душа народа (руш.). Тергыме кече: 26 шыжа 2025.
↑ Сольный концерт Раисии Исанбаевой. (руш.). Тергыме кече: 26 шыжа 2025.

Кылвер-влак

[1] Нефтекамская государственная филармония (неопр.). neft-gf.ru. Тергыме кече: 26 шыжа 2025.

[2] В его мелодиях – душа народа (руш.). Тергыме кече: 26 шыжа 2025.

[3] Сольный концерт Раисии Исанбаевой. (руш.). Тергыме кече: 26 шыжа 2025.

[1]

[2]

[3]